TSINGANU 23
23
-6-
1Nuwikhale khulia nu mwamihi,
uheenzishitsi mwene ulole ni viina uli naye mwenoyo.
2Niiva uli nu luusa liu khulia shiukhulia shinyishi,
uchehitsi khulia.
3Uvuli khwikombakhu shiukhulia shieshie shinuulu,
shichila shinyala khukhukaatilitsa.
-7-
4Uvuli khunyakhana nuchelitsanga khwenya khuva muhinda;
vusitsa navwo vwenyekhananga.
5Tsisenti tsiotsio tsinyala khukora vwangu vutswa khuli vulavu,
khuli tsiameela tsimbaha nu khuraanga khupulukha khuli shilitsa.
-8-
6Uvuli khuliakhu nu mundu uhuunyanga vukuundu or khwikomba viukhulia vievie;
7shichila avalitsanga shiuliitsa mu mwoyo kwekwe.
Alakhuvoolela, “Lia, nung'wa!”
Navutswa ali ihale wene khurula khu yivi.
8Uliitsa khusala viukhulia via walia,
lisanditsa liolio liliitsa khuva li shikhaya.
-9-
9Uvuli khulomolomakhu shindu imbeli wu mundu muyiingwa;
shichila alachaya vusitsa vuli mu makhuva koko.
-10-
10Uvuli khusuundakhu mupaka kwali kwa khale
inoho khuvukula mulimi kwa vavisandu;
11shichila Nyasaye, uli Muhonyinyi wavo ali ni tsingulu tsiosi,
naye aliitsa khukhuyaala shichila vo.
-11-
12Rumishila vucheli vwovwo khulonda mechitso;
rumishila maroyi koko khuhulishitsa makhuva ku vucheli.
-12-
13Uvuli khulekhakhu khuchelihitsa mwana;
niiva ularumishila shivoko khumushuta, shianyala khukhutsa tawe.
14Niiva unyala khumushuta ni shivoko,
ulamuhonyinya khurula mu likhutsa.
-13-
15Yivi mwana wanje, niiva uli nu vusitsa,
khali inzi mwene niitsa khusangala.
16Niitsa khwikhoya mu mwoyo kwanje,
lwa nulomolome makhuva ku vulunji.
-14-
17Uvuli khulolela imbotokha vandu vooni;
navutswa utsililile khuha Mwami Nyasaye luyali.
18Ni kilikali, uliitsa khuva ni limenya lilahi mumatukhu kitsanga
khandi lisuuvilitswa liolio liliitsa khutsililila khuvaho.
-15-
19Yivi mwana wanje, uhulishitsi, uve nu vusitsa;
kanakanakhu khuli mwene wumenyanga.
20Uvuli khuva mulala khu vandu vang'wetsanga idivai,
inoho vanyeseli vayaanza khulia inyama;
21shichila vatandi nende vanyeseli valakwa vamanani;
mundu wurumishilanga vwiyangu vwevwe khukona alifwala vitasi.
-16-
22Hulishitsa tata wowo wa khwivula;
nu khuvula khuchaya mama wowo lwa ali mushele.
23Katoto, vusitsa, khweka, nende vucheli vulahi -- vienyekhanga khurungwa;
navutswa vili nu vukuuli vululu muno khu yivi khukuulitswa.
24Tata wu mundu wi likhola liu vulunji
ali ni shivune shilahi shinyala khumukhola khuva nu vuyaanzi.
Mwana uli nu vusitsa anyala khukhukhola usangale.
25Lekha tata wowo nende mama wowo vasangale;
lekha mama wowo wa khwivula ave ni likhoya.
-17-
26Mwana wanje, mbulishitsa vulahi vwene,
ma ulonde mwiima kwanje.
27Vakhali valaaya nende vakhali vi shifwavi
vali khuli mireeko mitamanu muno.
28Vakhukonekhanga vandu khuli vanuuli,
nu khulomba vandu vasatsa vanyishi khuvula khuva vasuuvilwa.
-18-
29Ni viina wamenya nali mu vutiinyu?
Ni viina wavelela mu mwoyo?
Ni viina wamenya nakwananga?
Ni viina wamenya nalembananga?
Ni viina uli ni tsimbala khu mmbili vuchila shivune shiosi?
Ni viina wi tsimoni tsietsie tsiamuuchiha?
30Ni yavo vamenya nivang'wetsanga idivai mu vutukhu vwosi;
yavo vachelitsanga khung'wa idivai lukanu na lukanu.
31Ukhachelitswa ni idivai, khali nikava yamuuchiha papapa,
khali niiva ivimbilanga mu shikombe,
nisuundulwa hasi vulahi vwene tawe.
32Litukhu lilondakhu ulahulila mu mmbili khuli shindu shikhulumi
khuli inzukha yu vutsiva ilumanga.
33Ularanga khulola ni tsimoni tsiotsio vindu vicheni,
khali ukanakane nuvoola vindu vi shifwavi vi shikhaya.
34Ulalolekha khuli mundu ukoni hakari hi inyanza,
khuli woyo wikhale ikulu wu musala kwi ipendera.
35Uliitsa khuvoola,
“Vandumula, navutswa mbulakhu ha nasalilitswa;
vashiuta, navutswa shinahulilakhu vululu tawe.
Niitsa khuvukha mu tsindolo isaa shina?
Nzitsanga khukhava shiu khung'wa shindi.”
Currently Selected:
TSINGANU 23: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013