TSINGANU 22
22
1Nu vulahi khuva ni lira lilahi khuvira miandu minyishi;
khandi khuheelwa luyali khuvira ifetsa inoho itsahabu.
2Vahinda nende vamanani vasanganga shindu shilala:
Ni kilikali, Mwami Nyasaye neye wa valoonga voosi.
3Mundu wacheliha alolanga maraava avula khukwamu;
navutswa muyiingwa akachayanga nivanyakhana.
4Shihanwa shiu vwichehitsi khandi khuha Mwami Nyasaye luyali,
nu khuva ni miandu, khuheelwa luyali nende vulamu.
5Injila ya vandu vakoyanu yayitsula mavwa nende mireeko,
vandu venyanga khwihonyinya khutukha vave ihale wene khurula khuyo.
6Mwechitsi vaana khuli vanyala khumenya limenya lilahi,
navo nivasakhula, valivula khwivililakhu mu limenya liavo.
7Mundu muhinda yamihanga mumanani,
navutswa mundu wikopanga shindu nu murukwa wu mundu wikopitsanga.
8Mundu uranjitsa vindu vitamanu aliitsa khukwa mu matiinyu,
khandi tsingulu tsietsie tsiu khukhola vindu vitamanu tsiliitsa khuvwa.
9Mundu uli nu mwoyo ku khuhaana aliitsa khukasitswa,
shichila asanganga na vamanani shiukhulia shieshie.
10Khunganyinya mundu wi likhola li shihenye henye,
lilembana nende manyeko kaliitsa khuva kavwele.
11Mundu uli nu mwoyo mulahi khandi makhuva malahi,
aliitsa khuva mulina wu mwami.
12Mwami Nyasaye alindanga vucheli,
navutswa ativitsanga vindu via vandu vatamanu valoshitsanga khukhola.
13Mundu mukaara ahonganga hango;
avoolanga ndi nikava anyala khutsia ilwanyi isimba ilamwiira.
14Lilomoloma liu mukhali muheeyi lili khuli vwina vwatsia hasi musi;
mundu wa Nyasaye alolelanga vurima neye uliitsa khukwamu.
15Vuyiingwa vuli mu mwoyo ku mwana muti,
navutswa numushuti shivoko vuyiingwa vurulanga muye.
16Mundu uheetsanga vahinda vihanwa
inoho khutambitsa vamanani khwenya khuva muhinda,
aliitsa khukwa mumanani.
Livoola lia Vandu Vali nu Vusitsa
17Hulishitsa ka vandu vali nu vusitsa vavoolanga;
ukare mu mwoyo kwokwo nulondelela vucheli,
18shichila uliitsa khuva nu vuyaanzi nukarele mu mwoyo kwokwo,
khandi wirecheshe khukarumishila mulilomoloma.
19Nyenyanga ure lisuuvilitsa liolio mu Mwami Nyasaye;
Nako kachilanga nikhwechitsa nunundi.
20Mali khukhuhandichila livoola makhomi kavaka,
livoola liu khukhuchelihitsa nu khukhukhonya inganakani,
21khwenya khukhukhwechitsa likhola liu vulunji khandi katoto;
nikanyalikha uhaane lichipu liatoto khu vandu vali nivakhuruma.
-1-
22Uvuli khunuulakhu mumanani miandu chiechie shichila nu mumanani,
inoho khwihonela mushiina vandu vanyashitswangwa;
23shichila Mwami Nyasaye aliitsa khuvayaalila shiyaalo,
nu khutivitsa vulamu vwa vandu va vanyashitsanga.
-2-
24Uvuli khulombakhu vulina nu mundu wi lirima lialeka,
inoho khuchenda halala nu mundu mululu.
25Unyala khweka mwiima kwekwe,
nu khuvula khukalukhana mu likhola liolio.
-3-
26Uvuli khuva mulala khu vandu vayaanza khulaaka,
vandu virulitsanga khusinjilila vandu vacheni vali na makoovi.
27Niiva unyala khukhaywa khurungakhu shindu,
vanyala khuvula shitali shioshio shia ukonakhu.
-4-
28Uvuli khusuundakhu lwakho lwali lwa khale,
lwasimiikhwa na vakuuka vovo.
-5-
29Mundu anyala khuva alikhuho wamanya khukhola muhinzilu kwekwe?
Aliitsa khurumishila vami;
shialiitsa khurumishila vandu vandi vutswa tawe.
Currently Selected:
TSINGANU 22: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013