TSINGANU 12
12
1Mundu uyaanzanga khuchelihitswa, wayaanza vucheli,
navutswa woyo wambakhananga khuchelihitswa nu muyiingwa.
2Mundu mulahi ayaanzitsanga Mwami Nyasaye,
navutswa Nyasaye yambakhananga mundu wi likhola litamanu.
3Mundu mutamanu shianyala khuva wasinjila ni tsingulu khurula khu vutamanu tawe;
navutswa mundu wi likhola liu vulunji wasinjila ni tsingulu.
4Mukhali wu mwiima mulahi ali khuli itaachi yu musatsa wewe,
navutswa mukhali wi tsisoni khu musatsa wewe
ali khuli likuule liu mu vikuumba livula lunyasi.
5Ka mundu wi likhola liu vulunji akanakananga ni katoto;
navutswa mechitso ka vandu vatamanu nu ku vuvehi.
6Lilomoloma lia vandu vatamanu lileranga likhutsa,
navutswa lilomoloma liu mundu wi likhola liu vulunji lihonyinyanga vandu.
7Vandu vatamanu vakuurwangwa luva luvwele,
navutswa vandu vi inzu yu mundu wi likhola liu vulunji
valiitsa khutsililila khuvaho.
8Mundu yitsominywangwa khurulana khu vucheli vwevwe vulahi,
navutswa mundu musilo achaywangwa.
9Nu vulahi khuva murumishi mwichehitsi
wu kholanga mwene muhinzilu kwekwe
khuvira khuva mundu wikholanga ali tsingulu tsinyishi
navutswa inzala yenyanga khwiira.
10Mundu wi likhola liu vulunji alindanga vulahi miruku chiechie,
navutswa vandu vatamanu ni valulu khu chiavo.
11Mundu ulimanga mulimi kwekwe ni tsingulu
aliitsa khuchesa shiukhulia mu vunyishi;
navutswa woyo umalilanga tsisaa tsietsie
khu mihinzilu chi shikhaya avula vucheli.
12Vandu vatamanu vikombanga khukhola vindu vitamanu,
navutswa vandu vi likhola liu vulunji vatsilililanga khusinjila ni tsingulu.
13Mundu mutamanu areekwangwa khurulana khu lilomoloma lielie liu vwoni,
navutswa mundu wi likhola liu vulunji ahonanga khurula mu vutiinyu.
14Mundu anyolanga murungu kwekwe khurulana khu lilomoloma lielie lilaho;
khandi muhinzilu kwekwe nakwo kumuheetsanga shia yenyi.
15Mundu muyiingwa akanakananga shia khase khosi ndi nu wi likhola liu vulunji;
navutswa mundu uli nu vusitsa ahulishitsanga inganakani yu mundu amukhonyanga nayo.
16Mundu muyiingwa alekanga vwangu,
navutswa mundu mucheli yambakhananga khulondelela manyeko.
17Mushiahidi watoto avoolanga katoto;
navutswa mushiahidi wu vuvehi avoolanga vuvehi.
18Lilomoloma li shikhaya lisalilitsanga nilikhalaka vululu khuli shivavi;
navutswa makhuva ku mundu uli nu vusitsa
alomolomanga kahonyinyanga.
19Katoto kahindilanga,
navutswa vuvehi shiuvuhindilanga tawe.
20Vukaati vuli mu mioyo chia vandu vakholanga vindu vitamanu;
navutswa yavo valoshitsanga khukhola vindu vilahi vali nu vuyaanzi.
21Shindu shitamanu shivulakhuho shikwilanga mundu wi likhola liu vulunji,
navutswa mundu mutamanu avirilanga mu vutiinyu vunyishi.
22Mwami Nyasaye wayambakhana vandu vavehi,
navutswa ayaanzanga vandu vavoolanga katoto.
23Mundu mucheli avisanga vucheli vwevwe,
navutswa mundu muyiingwa alanditsanga vusilo vwevwe shia havundu hosi.
24Khukhola muhinzilu ni tsingulu kuchilanga mundu ava mwimilili;
khuva mukaara khuchilanga mundu ava murukwa.
25Liheenda mwoyo lichilanga mundu avula khuyaanzilila mu limenya lielie,
navutswa likhuva lilahi limutinyilitsanga.
26Mundu wi likhola liu vulunji alekhananga ni vindu vitamanu,
navutswa ka vandu vatamanu vakholanga kachilanga nivakoyana.
27Muhiitsi mukaara avulakhu khuli anyala khunyola shia ahiitsanga;
navutswa mundu uli ni tsingulu mu muhinzilu kwekwe
aliitsa khunyola miandu.
28Likhola liu vulunji lichilanga mundu atsililila khuva mwoyo,
navutswa likhola liu vutamanu lilerelanga mundu likhutsa.
Currently Selected:
TSINGANU 12: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013