TSINGANU 11
11
1Tsilaatili tsiu vuvehi ni shifwavi imbeli wu Mwami Nyasaye,
navutswa vipimu viatoto vichilanga ava nu vuyaanzi.
2Vwiloli vwimililanga tsisoni;
navutswa vwichehitsi vuleranga vusitsa.
3Vandu valahi vimililwangwa ni vikholwa viavo vilahi;
Navutswa vukoyanu vwa vandu vanyala khuvula khusuuvililwa
vuliitsa khuvativitsa.
4Vuhinda vuvula vukhonyi vwosi khulitukhu liu khusalilitswa;
navutswa vikholwa viu vulunji virulitsanga mundu mu likhutsa.
5Vikholwa viu vulunji viu mundu musuuvilwa vichilanga amenya limenya lilahi;
navutswa mundu mutamanu aliitsa khwitivitsa mwene
khurulana khu vikholwa vievie vitamanu.
6Vikholwa viu mundu wi likhola liu vulunji vimuhonyinyanga,
navutswa mundu unyala khuvula khusuuvililwa
akumilwangwa mu likomba lielie.
7Lwa mundu mutamanu akhutsanga, lisuuvilitswa lielie litivanga naye,
shichila wasuuvilila mwene mu tsingulu tsietsie.
8Vandu vi likhola liu vulunji varulitswangwa mu vutiinyu,
vandu vatamanu vakwitsanga muvwo.
9Makhuva matamanu kativitsanga mureende;
navutswa makhuva ku vucheli kahonyinyanga vandu vi likhola liu vulunji.
10Lwa vandu vi likhola liu vulunji vakholelwa ka venyanga, litaala likali likhoyanga;
navutswa lwa vandu vatamanu vativitswangwa,
vandu vasangalanga nivalaanjilila liyooko liu vuyaanzi.
11Khuvirila khu tsikhaavi tsia vandu vi likhola liu vulunji,
litaala likali linyolanga vuhinda;
navutswa litivitswangwa khuvirila khu lilomoloma lia vandu vatamanu.
12Mundu uchayanga mureende wewe avula vucheli vwosi,
navutswa mundu uli ni limanya atsilililanga khuhonjela.
13Mundu mumoonyi achendanga navoolela vandu makhuva ku muvwivisi,
navutswa mundu unyala khusuuvililwa alekhanga khuvoola kaviswa.
14Ha vwimilili vu vusitsa vuvula, shivala shitivitswangwa;
navutswa nu khuli na mechitso manyishi,
milembe chinyolekhaho.
15Mundu wirulitsanga khusinjilila mundu mucheni uli ni likoovi,
aliitsa khukwa mu maraava;
navutswa woyo wambakhananga khuva musinjilili wi likoovi
aliitsa khuva mu vulindi vulahi.
16Mukhali wi tsimbavasi aheelwangwa luyali,
navutswa musatsa wu kholanga muhinzilu kwekwe ni tsingulu akwitsanga muhinda.
17Mundu mulahi khu vandi yinyolelanga vukhala;
navutswa mundu mululu yisalilitsanga mwene.
18Mundu mutamanu anyolanga mirungu chiu vuvehi,
navutswa mundu wi likhola liu vulunji anyolanga shihanwa shiatoto.
19Mundu utsilililanga khuva wi likhola liu vulunji mu likhola aliitsa khuva mwoyo,
navutswa woyo ulondelelanga vindu vitamanu aliitsa khukhutsa.
20Mwami Nyasaye wayambakhana vandu vi tsinganakani tsindamanu,
navutswa wayaanza yavo vakholanga likhola liu vulunji.
21Ni kilikali, vandu vatamanu valiitsa khusalilitswa,
navutswa vandu vi likhola liu vulunji valiitsa khuhonyinywa.
22Mukhali wakaasa likoondo, uvula vucheli
ali khuli ibete yalombwa khu itsahabu muliulu li ingulume.
23Likomba liu mundu wi likhola liu vulunji lichilanga vindu vilahi nivikholekha;
ka vandu vatamanu valindililanga khunyola,
kachilanga nivasalilitswa.
24Mundu uhaananga nu mwoyo mulala, ameetwangwa;
navutswa mwimani, anuulwangwa ava mumanani.
25Mundu uhaananga nu mwoyo mulala, alakholwa khuva muhinda;
navutswa woyo usuminyanga wundi, aliitsa khusuminywa.
26Vandu valaamanga mundu uvisanga imu vuchila khukuulitsa,
nalindililanga vukuuli khumeetekha,
navutswa vakasitsanga mundu ukuulitsanga.
27Niiva ka ukanakananga khukhola ni malahi, uliitsa khuheelwa luyali,
navutswa niiva wukhavanga vindu vitamanu,
navio via atsitsanga khunyola.
28Mundu wasuuvilila mu miandu chiechie aliitsa khuvungulukha,
navutswa vandu vi likhola liu vulunji valiitsa khuneera khuli masambu maviisi.
29Mundu ulerelanga vandu vi inzu yeye vutiinyu
aliitsa khuvula shianyola.
Vandu vayiingwa navo valiitsa khurumishila vandu vu vusitsa.
30Vandu vi likhola liu vulunji vali khuli misala chiamanga litunda lihaananga vulamu,
navutswa likhola litamanu lirulitsaho vulamu.
31Niiva mundu wi likhola liu vulunji aheelwangwa shihanwa khulilova khunu,
ni vianga vitamanu via vandu vatamanu nende vooni vatushili khuheelwa!
Currently Selected:
TSINGANU 11: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013