LIVALITSWA 36
36
Malako khu Vakhali Vahilwa
1Vimilili va vandu vi tsinzu tsiu lwivulu lwa Gileadi, mwana wa Makiri khandi mukuuka wa Manaase, mwana wali wa Yosefu, vasimukha nivatsia khu Musa halala na vimilili vandi. 2Vavoola, “Mwami Nyasaye amuvoolele mukavule shivala khu Vaisraeli, khuvirila khu ikura. Amuvoolele khandi muhaane miandu, chiali chiu mwiikho weru Zelofehadi khu vaana vi shikhana veve. 3Navutswa kenyekhanga mumanye, niiva valahilwa na vasatsa vuluhia lundi, miandu chiavo chiliitsa khuva chia vandu vuluhia lwenolo; khandi isavu yi miandu chia khwaheelwa khucheha. 4Khumuhika ku khukalushilwa, lwa miandu chiosi chiali ni chiakuulitswa, chikalushitswa khu vandu vene vali vu khuraanga, miandu chia vaana vi shikhana va Zelofehadi, chiliitsa khuva chia vandu vuluhia lwa vatsiamu lukhali khumatukhu koosi; ma luhia lweru luve lukoritsi miandu chienecho.”
5Nalwo lwa Musa yahaana lilako khu Vaisraeli khulondokhana khu Mwami Nyasaye; navoola, “Vitsukhulu vuluhia lwa Yosefu vavooli ku vulunji. 6Mwami Nyasaye avoolanga ndi vaana vi shikhana va Zelofehadi, ni vavoholole khutsia lukhali khu musatsa wosi, wa valolanga anyala khuvahila; navutswa vatsia lukhali khu vasatsa varulanga mu vandu vuluhia lwa tata wavo yivulwamu; 7khu miandu chia Vaisraeli chilitsililila khuva mu Vaisraeli. Navutswa khuvukulwa na vandu luhia lundi tawe; shichila miandu chia Vaisraeli, chilatsililila khuva mu vandu vu lwivulu lwa vakuuka vavo. 8Mundu mukhali wosi, uliitsa khunyola miandu mu vandu vuluhia lwosi lwa Vaisraeli, aliitsa khutsia lukhali khu musatsa urulanga mu vandu vuluhia lwenolo; munjila yeneyo, shia mundu wosi Muisraeli, aliitsa khunyola miandu chiali chia vakuuka veve. 9Miandu chiliitsa khuvula khurulakhu mu shia luhia, khutsia mu vandu vuluhia lundi; shia luhia lwosi lwa Vaisraeli, luliitsa khutsililila khuva ni miandu chialwo lwene.”
10Khulwa yako, vaana vi shikhana va Zelofehadi, vakhola khuli Mwami Nyasaye yali navoolele Musa vakhole. 11Vaana vi shikhana va Zelofehadi yivula nivali Mahula, Tiruza, Hogula, Milika, nende Noha vatsia lukhali khu vasiala vavo. 12Vatsia lukhali mu vandu vi tsinzu tsia vandu vuluhia lwa Manaase, mwana wa Yosefu; ma miandu chiavo nichirikala mu vandu vu lwivulu lwa tata wavo.
13Yaka nako malako nende mechitso ku Mwami Nyasaye yavoolela Vaisraeli valonde khuvirila khu Musa, lwa yali nali mu shivala shi vikulu shia Moabu khuluveka lundi lu Muchela kwa Yorodani, nuli mu litaala lia Yeriko.
Currently Selected:
LIVALITSWA 36: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
