LIVALITSWA 35

Mataala ka Vandu Vuluhia lwa Levi Vaheelwa

1Mwami Nyasaye yavoolela Musa, nali mu lwomera mu shivala shia Moabu, injelekha wu Muchela kwa Yorodani mu litaala lia Yeriko, 2“Voolela Vaisraeli vahe vandu vu lwivulu lwa Levi, malala khu mataala ka vamenyamu nende lwayilu lu khwayitsamu miruku chiavo himbi khu mataala kenako, khurula khu miandu chiavo. 3Mataala kenako kaliitsa khuva kavo ku khumenyamu. Tsing'ombe tsiavo, makondi nende miruku chindi chiosi, chiliitsa khwayitswa havundu ha vayitsanga miruku chiavo. 4Lwayilu lu khwayitsamu luli mu mataala ka vandu vu lwivulu lwa Levi vaheelwa, luliitsa khuva tsimita 450 khurula khu lisisi li litaala likali mu shia tsimbeka tsiosi, 5khu khuve na havundu halekhana mu tsimbeka tsine tsiosi tsimita tsimia 9 khu shia luveka, litaala likali nilili hakari.

6“Muliitsa khuha vandu vu lwivulu lwa Levi, mataala sita ku khwilushilamu, ku mundu anyala khwilukha khutsiamu, niiva aliitsa khwitsukhana niyiiri wundi vuchila khumanya. Khumeeta khu kenako, muliitsa khuvaha mataala kandi makhomi kane na kavili 7nende lwayilu lu khwayitsamu miruku chiavo, koosi halala makhomi kane na munane. 8Mataala ka muliitsa khuha vandu vu lwivulu lwa Levi mu shia luhia lwa Vaisraeli, kaliitsa khumanyikhana khulondokhana khu vunyishi vwa vandu vamenyanga mu lusomo lwenolo.”

Mataala Kukhwilushilamu

(Litsu 19:1-13; Yosh 20:1-9)

9Mwami Nyasaye yavoolela Musa 10avoolele Vaisraeli, “Lwa muliitsa khwambukha Muchela kwa Yorodani, numwinjila mu shivala shia Kanaani, 11muliitsa khurovola mataala kaliitsa khukwa mataala ku khwilushilamu, ku mundu anyala khwilukha khutsia khumenyamu, niiva aliitsa khwitsukhana niyiiri wundi vuchila khwenya khumwiira. 12Aliitsa khuva havundu ha aliitsa khwivisa, khurula khu mundu unyala khwenya khuvanza shisahi, khu mundu wiiri wundi woyo avuli khukhutsa, nashili khuyaalwa na vandu mushiina. 13Mataala sita ka muliitsa khuhaana kenako, kaliitsa khuva mataala kenyu ku khwilushilamu. 14Muliitsa khuhaana mataala kavaka, khuluveka lu Muchela kwa Yorodani yulu, khandi kandi kavaka mu shivala shia Kanaani, khuva khuli mataala ku khwilushilamu. 15Mataala sita kenako, kaliitsa khuva ka Vaisraeli vanyala khwilushilamu. Kaliitsa khuva ka vacheni nende vandu vandi voosi vamenyanga muvo; khu mundu unyala khwitsukhana niyiiri wundi vuchila khumanya, aliitsa khwilukha atsimu. 16Navutswa niiva mundu wundi anyala khurumula ni shivia wundi, kaloleshe ndi mundu warumuli mwenoyo umali khukhutsa, mundu urumuli wundi mwenoyo nu mulumindi; mundu mulumindi aliitsa khwiirwa. 17Inoho niiva mundu ali ni lichina mu mukhono kwekwe linyala khwiira wundi, marumulili wundi akhutsi, nu mundu mulumindi; mundu mulumindi aliitsa khwiirwa. 18Inoho niiva mundu ali ni shikong'o mu mukhono kwekwe, shianyala khwiirila wundi, khali atuuyili wundi khutukha lwa akhutsa, nu mundu mulumindi; mundu mulumindi aliitsa khwiirwa. 19Mundu uliitsa khuva navanzanga shisahi, aliitsa khwiira mundu mulumindi mwenoyo. Lwa aliitsa khwakana naye, aliitsa khumwiira.

20“Niiva mundu wahima wundi nu khumwiira, lwa amulukura khukwa hasi inoho khumusiuvila shindu 21inoho khumurumula shikhusi, aliitsa khuva umali khwiira mundu; khali ye mwene aliitsa khwiirwa. Mundu uliitsa khuva navanzanga shisahi, aliitsa khwiira mulumindi mwenoyo. Lwa aliitsa khwakana naye, aliitsa khumwiira.

22“Navutswa khuvoole, mundu anyala khwitsukhana niyiiri mundu wa yavula khuhima, kave khumulukura khukwa hasi inoho khumusiuvila shindu. 23Inoho khuvoole vuchila khulolakhu, mundu anyala khulesa wundi ni lichina nu khumwiira nakhenyinji khumwiira, lwa avula vutsiku naye. 24Vandu vi shikhaalo, valiitsa khukhalaka hakari hehe nende mundu uliitsa khuva navanzanga shisahi, khulondokhana khu malako yaka. 25Vandu vi shikhaalo, valiitsa khulinda mundu mulumindi mwenoyo, khurula khu mundu uliitsa khuva navanzanga shisahi khurumwa mu litaala liu khwilushilamu, lia yilukha natsiamu. Aliitsa khumenyayo khutukha lwa Mukali wa vasalisi voosi aliitsa khukhutsa, wavekhwa na makura ku vutakatifu. 26Niiva mundu mulumindi mwenoyo, aliitsa khusila lwakho lwi litaala lia yilushilamu 27ma mundu uliitsa khuva navanzanga shisahi woyo amunyole nu khumwiira, khuvanza khwekhwe khutsitsanga khumukhola khuvula khuva mulumindi. 28Mundu mulumindi mwenoyo, aliitsa khutsililila khumenya mu litaala lia yilushilamu, khutukha lwa Mukali wa vasalisi voosi aliitsa khuva niyakhakhutsa. Nikamali khwikholekha kario, nalwo lwa aliitsa khutsia ingo. 29Malako yaka kaliitsa khurumikha khu munyi halala na vitsukhulu venyu, shia havundu hosi ha muliitsa khuva numumenyanga.

30“Mundu mulumindi aliitsa khwiirwa, shichila nu mulumindi niiva vashiahidi vavili inoho vanyishi, valiitsa khuhaana vushiahidi khulondokhana khu makhuva kenako. Navutswa mundu aliitsa khuvula khwiirwa shichila vushiahidi vu mundu mulala wonyene. 31Mundu mulumindi aliitsa khwiirwa. Muvuli khuhuchililakhu murungu kwi shivaso khurula khu mundu mulumindi. 32Niiva mundu wayilukha watsia khumenya mu litaala liu khwilushilamu, muvuli khumuhuchililakhu khurunga murungu, nikanyalikha akalushi ingo wewe, Mukali wa vasalisi voosi nashili khukhutsa. 33Niiva muliitsa khukhola kenako, muliitsa khuva nu mwononyinyanga shivala shia mumenyamu. Shiraano shiononyinyanga shivala; mundu mulumindi nashili khwiirwa, mulukha kuvulakhuho ku khukhola khunihitsa vandu mu shivala, shiu mundu yiirilamu wundi. 34Muvuli khwononyinya shivala shia mumenyamu, shichila ninzi Mwami Nyasaye, khandi menyanga mu Vaisraeli.”

Currently Selected:

LIVALITSWA 35: LLLPRO

Highlight

Copy

Compare