LIVALITSWA 34
34
Mipaka chi Shivala shia Kanaani
1Mwami Nyasaye yavoolela Musa 2mivaalo ku khuvoolela Vaisraeli, “Lwa muliitsa khwinjila mu shivala shia Kanaani, shivala shia muheetsanga khuva shienyu, yichi nachio mipaka chi shivala shienesho. 3Mupaka kuli khuluveka luli ikuvanda, kuliitsa khuraanjila Mwichendanyama mwa Sini khuvirila khu mupaka kwa Edomu. Kuliitsa khuraanjila khuluveka luli ivukwi, khundulu ikuvanda wi Inyanza yi Ichumbi. 4Kuliitsa khushiama khutsia khuluveka luli ikuvanda, khutsia khutukha khu Injila ya Akurabimu, makutsililile khutsia khuvirila mu Shiangalangwi shia Sini khali khutukha ikuvanda wi litaala lia Kadeshi-bareneha. Kuliitsa khushiamilaho khutsia khuluveka luli ivuluka wi imbo wi litaala lia Hazari Adari, khutukha havundu halaangwangwa Azimoni, 5ha kuliitsa khushiamila khutsia mu luhoongo luli khu mupaka kwi shivala shia Misri, nu kumalilishila khu Inyanza ya Meditarenia.
6“Mupaka kwi shivala shienesho, khuluveka luli imbo kuliitsa khuva Inyanza ya Meditarenia.
7“Mupaka kuli khuluveka luli ivuluka, kuliitsa khutsia vulunji khuraanjila khu Inyanza ya Meditarenia khutukha khu Shikulu shia Hori 8khandi khutsia khurulaho kutsi khutukha khu Injila ya Hamaatsi; khali kutsililile khutsia khutukha havundu halaangwangwa Zedadi; 9khandi mu litaala lia Zifuroni; kumalilishile havundu halaangwangwa Hazari-enani.
10“Mupaka kuli khuluveka luli ivukwi, kuliitsa khutsia vulunji khuraanjila Hazari-enani khutsia khutukha havundu halaangwangwa Shefamu. 11Mupaka kwenoko kuliitsa khukholomokha, khuraanjila Shefamu khutukha mu litaala lia Ribula khuluveka luli ivukwi wi litaala lia Ahini, khandi kutsililile khutsia khutukha khu vikulu vili khuluveka luli ivukwi wi Inyanza ya Galilaya; 12mupaka kwenoko kuliitsa khukholomokha, khuvirila khundulu khu Muchela kwa Yorodani makumalilishile khu Inyanza yi Ichumbi.
“Natsio tsiliitsa khuva tsimbeka tsine tsiu mupaka kwi shivala shienyu.”
13Nalwo lwa Musa yavoolela Vaisraeli, “Yishi nashio shivala shia mutsitsanga khunyola numumali khukhuva ikura, shivala shiu Mwami Nyasaye aheele vandu vi tsimbia tisa nende inusu ya vandu vuluhia lulala. 14Vandu vi tsimbia tsia Rubeni nende Gadi nende inusu ya vandu vuluhia lwa Manaase khuluveka luli ivukwi vanyola khale lusomo lwavo, lwa vali nivanyola khulondokhana khu tsinzu tsiavo, 15khuluveka luli ivukwi wu Muchela kwa Yorodani, injelekha wi litaala lia Yeriko.”
Vimilili Vaheelwa Vunyali Vukhukavula Shivala
16Mwami Nyasaye yavoolela Musa, 17“Musalisi Eliazari nende Yoshwa mwana wa Nuni, valiitsa khukavulila vandu shivala. 18Muliitsa khurovola khandi shia mwimilili khurula mu shia luhia lwa vandu vi tsimbia tsia Israeli, amukhonye khukavula shivala. 19Yaka nako mira ka vandu varovolwa venavo,
Varovola Kalebu mwana wa Yefune, khurula mu vandu vuluhia lwa Yuda;
20Shemuheli mwana wa Amihudi, khurula mu vandu vuluhia lwa Simioni;
21Elidadi mwana wa Kisiloni, khurula mu vandu vuluhia lwa Benyamini;
22Buki mwana wa Yoguli, khurula mu vandu vuluhia lwa Dani;
23Haniheli mwana wa Efodi, khuva mwimilili khurula mu vandu vuluhia lwa Manaase, mwana wa Yosefu;
24Kemuheli mwana wa Shifutani, khuva mwimilili khurula mu vandu vuluhia lwa Efurahimu mwana wa Yosefu.
25Elizafani mwana wa Paranaka, khuva mwimilili khurula mu vandu vuluhia lwa Zabuloni;
26Palitieli mwana wa Azani, khuva mwimilili khurula mu vandu vuluhia lwa Isakari;
27Ahihudi mwana wa Shelomi, khuva mwimilili khurula mu vandu vuluhia lwa Asheri;
28Pedaheli mwana wa Amihudi, khuva mwimilili khurula mu vandu vuluhia lwa Nafutali.”
29Navo vandu vu Mwami Nyasaye yali niyaha vunyali vu khukavulila Vaisraeli miandu, lwa vali nivamenyanga mu shivala shia Kanaani.
Currently Selected:
LIVALITSWA 34: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
