LIVALITSWA 33
33
Luchendo lu Khurula Misri khutsia Moabu
1Yivi navio vikha viu luchendo lwa Vaisraeli, lwa vali nivakharula mu shivala shia Misri, khulondokhana khu vandu vi tsimbia tsiavo, Musa nende Haruni ni vavimililanga. 2Mwami Nyasaye yavoolela Musa ahandichi hasi vikha viu luchendo lwavo. Yivi navio vikha viu luchendo lwavo:
3Vaisraeli varula mu shivala shia Misri, khulitukhu li likhomi na kharanu, nililili litukhu liu mweli ku khuraanga khumuhika, litukhu lialondanga Mulukha kwa Pasaka ku khuraanga. Mwami Nyasaye yavalinda vulahi, nivarula mu litaala lia Ramesesi, Vamisri nivavalolanga, 4lwa vali nivayeveelanga mu shilindwa vaana vi shiyayi vakhulundu khwivulwa, vu Mwami Nyasaye yali namali khwiira. Lwa Mwami Nyasaye yakhola kenako, yamanyinyanga ndi ali ni tsingulu tsinyishi khuvira vanyasaye va Vamisri.
5Vaisraeli varula mu litaala lia Ramesesi, nivamenya mu maheemo mu litaala lia Sukotsi. 6Varula Sukotsi, nivatsia khumenya mu maheemo mu litaala lia Etsamu, lili khundulu khwi shiangalangwi. 7Vasimukha nivarula mu litaala lia Etsamu, nivashiama khutsia havundu halaangwangwa Pi Hahirotsi, khuluveka luli ivukwi wi litaala lia Bali Zefoni, nivamenya mu maheemo mu litaala lia Migidoli. 8Varula Pi Hahirotsi, nivakhalakanyila mu Inyanza Imuuchi, khutsia khwinjila mu Shiangalangwi shia Shuri. Lwa vali nivakhachenda khumatukhu kavaka, vatukha havundu halaangwangwa Mara, wa vamenya mu maheemo. 9Varulaho nivatsia mu litaala lia Elimu, ha vamenya mu maheemo, shichila khwaliho ni tsisieveye tsia matsi likhomi na tsivili, nende misala chia mashindu makhomi saba.
10Varula Elimu nivatsia khumenya mu maheemo, himbi khu Inyanza Imuuchi. 11Varula ha Inyanza Imuuchi, nivatsia khumenya mu maheemo mu Shiangalangwi shia Sini. 12Varula Mwichendanyama mwa Sini, nivamenya mu maheemo havundu halaangwangwa Dofuka. 13Varulaho nivatsia khumenya mu maheemo mu litaala lia Alushi. 14Varula Alushi nivatsia khumenya mu maheemo mu litaala lia Refidimu, ha vandu vavula khunyola matsi ka vanyala khung'wa.
15Varula Refidimu nivatsia khumenya mu maheemo mu Shiangalangwi shia Sinai. 16Varulamu nivatsia khumenya mu maheemo mu litaala lia Kiburotsi-hatava, 17mwa varula nivatsia khumenya mu maheemo mu litaala lia Hazerotsi. 18Varulaho nivatsia khumenya mu maheemo mu litaala lia Ritsima. 19Varulaho nivatsia khumenya mu maheemo mu litaala lia Rimoni Perezi. 20Varulaho nivatsia khumenya mu maheemo mu litaala lia Libuna, 21mwa varula nivatsia khumenya mu maheemo mu litaala lia Risa. 22Varula mu litaala lia Risa, nivatsia khumenya mu maheemo mu litaala lia Rehelatsa, 23mwa varula nivatsia khumenya mu maheemo ha Shikulu shia Sheferi. 24Varula ha Shikulu shia Sheferi, nivatsia khumenya mu maheemo mu litaala lia Harada, 25mwa varula nivatsia khumenya mu maheemo mu litaala lia Makhelotsi. 26Varula Makhelotsi, nivatsia khumenya mu maheemo havundu halaangwangwa Tahatsi, 27ha varula nivatsia khumenya mu maheemo mu litaala lia Tera. 28Varula Tera, nivatsia khumenya mu maheemo mu litaala lia Mitsika, 29mwa varula nivatsia khumenya mu maheemo mu litaala lia Hashimona. 30Varula Hashimona, nivatsia khumenya mu maheemo mu litaala lia Moserotsi, 31mwa varula nivatsia khumenya mu maheemo mu litaala lia Bene-yahakani. 32Varula Bene yahakani, nivatsia khumenya mu maheemo mu litaala lia Hori Hagidigadi, 33mwa varula nivatsia khumenya mu maheemo mu litaala lia Yotibata. 34Varula Yotibata, nivatsia khumenya mu maheemo mu litaala lia Aburona, 35mwa varula nivatsia khumenya mu maheemo mu litaala lia Ezioni Geberi. 36Varula Ezioni Geberi, nivatsia khumenya mu maheemo mu litaala lia Kadeshi, lili Mwichendanyama mwa Sini.
37Varula Kadeshi, nivatsia khumenya mu maheemo ha Shikulu shia Hori, shili khu mupaka kwa Edomu. 38Mwami Nyasaye yavoolela Haruni anini khu Shikulu shia Hori, wa Haruni yakhutsila khulitukhu liu khuraanga, liu mweli wa kharanu khumuhika kwi likhomi na khane, lwa Vaisraeli vali nivarula mu shivala shia Misri. 39Haruni yali nali ni mihika imia indala na makhomi kavaka, na kavaka lwa yakhutsila khu Shikulu shia Hori.
40Mwami wa Aradi, wali Mukanaani, yahulila ndi Vaisraeli vali khunjila vitsanga.
41Vaisraeli varula ha Shikulu shia Hori, nivatsia mu litaala lia Zalumona, 42wa varula nivatsia khumenya mu maheemo havundu halaangwangwa Punoni. 43Varula Punoni, nivatsia khumenya mu maheemo mu litaala lia Obotsi, 44mwa varula nivatsia khumenya mu maheemo mu litaala lia Iye Abarimu, lili khu mupaka kwa Moabu. 45Varula Iye Abarimu, nivatsia khumenya mu maheemo mu litaala lia Diboni Gadi, 46wa varula nivatsia khumenya mu maheemo havundu halaangwangwa Alumoni Dibulatsahimu. 47Varula Alumoni Dibulatsahimu, nivamenya mu maheemo mu Vikulu via Abarimu, vili himbi mu litaala lia Nebo.
48Vaisraeli varula mu Vikulu via Abarimu, nivatsia khumenya mu maheemo mu lwomera lwa Moabu khundulu khu Muchela kwa Yorodani, injelekha wundi wi litaala lia Yeriko. 49Varula mu lwomera lwa Moabu, nivatsia khumenya mu maheemo kali himbi khu Muchela kwa Yorodani, nuli mu litaala lia Betsi-yeshimotsi khutsia mu litaala li misala chi minyenye.
Mivaalo khu Vandu Nivashili Khwambukha Muchela kwa Yorodani
50Mwami Nyasaye yavoolela Musa mu lwomera lwa Moabu, himbi khu Muchela kwa Yorodani nuli mu litaala lia Yeriko, 51“Lomoloma khu Vaisraeli, uvavoolele, ‘Lwa mwambukha Muchela kwa Yorodani, khwinjila mu shivala shia Kanaani, 52muliitsa khukhunganyinya vandu voosi vamenyanga mu shivala shienesho. Muliitsa khupomolanyinya misambwa chiavo nende vifwanani viavo via valoonga, nu khusambulanyinya shia havundu hosi ha vasikamanga nivasaala. 53Muliitsa khuvukula shivala shienesho mumenyemu, shichila nashio shia muheele shive shienyu. 54Muliitsa khukavula shivala shienesho khuvirila khu ikura, khulondokhana khu tsinzu tsienyu. Muliitsa khuha inzu ingali lusomo lukali, khandi inzu indititi, lusomo luti; lusomo lwosi lwa vanyola khuvirila khu ikura luliitsa khuva lwavo. Muliitsa khukavula shivala khulondokhana khu vandu vi tsimbia tsia vakuuka venyu. 55Navutswa niiva muliitsa khukhaywa khukhunga vandu vamenyanga mu shivala shienesho, yavo varikalamu valiitsa khumuluminya murwi, khuli tsisenyenje mu tsimoni mwenyu, khandi khuli mavwa mutsimbalu tsienyu. Navo valiitsa khumukwana. 56Niiva muliitsa khukhaywa khuvakhunga, niitsa khumutivitsa, khuli lwa nali ninaloshitsa khumutivitsa.’ ”
Currently Selected:
LIVALITSWA 33: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
