YOSHWA 5
5
1Lwa vami va Vaamori vamenyanga khuluveka luli imbo wu Muchela kwa Yorodani, khandi vami vi shivala shia Kanaani khuluchinga lwi Inyanza ya Meditarenia, vahulila makhuva khulondokhana khuli Mwami Nyasaye yakhaaminya matsi ku Muchela kwa Yorodani, khutukha lwa Vaisraeli vambukha, varaanga khuria khandi nivakhutsa ikholo, shichila Vaisraeli.
Yoshwa Yasheva Vasatsa va Israeli
2Mumatukhu kenako, Mwami Nyasaye yavoolela Yoshwa, “Lomba tsilutwa khurula khu machina, usheve Vaisraeli.” 3Nalwo lwa Yoshwa yakhola khuli Mwami Nyasaye yali namuvoolele, nashevela Vaisraeli havundu halaangwangwa Shikulu shiu Khushevelakhu. 4Yoshwa yavasheva, shichila Vaisraeli vasatsa voosi vali nivaruli mu shivala shia Misri, vasikali voosi, vali vakhutsila khunjila nivatsitsanga mu shiangalangwi, lwa vali nivakharula mu shivala shia Misri. 5Khali niiva vasatsa voosi vali nivarula mu shivala shia Misri vali vashevwa, nikhali vandu voosi vali nivivulwa nivali khunjila mwichendanyama, lwa vali nivakharula mu shivala shia Misri, vali nivashili khushevwa. 6Vaisraeli vachenda chenda mwichendanyama, khumihika makhomi kane khutukha, lwa vandu vali nivatushi mihika chiu khukwana muliihe, vali nivamali khurula mu shivala shia Misri vali nivakhutsa, shichila vambakhana khulonda malako ku Mwami Nyasaye, yali niyavavoolela valonde. Mwami Nyasaye yali wayisuuha imbeli wavo ndi shivaliitsa khulolakhu shivala, shia yali niyalaaka aliitsa khuha vakuuka vavo, shivala shiu vuhinda khandi shili ni lilova linuulu tawe. 7Khulwa yako, vaana va vandu venavo vali nivashili khushevwa, khandi vandu vi likhula liyia yili, nalio lia Yoshwa yasheva.
8Lwa vasatsa Vaisraeli voosi, vali nivamali khushevwa, vatsililila khumenya mu maheemo khutukha lwa vahona. 9Mwami Nyasaye yavoolela Yoshwa, “Mali khumurulitsilaho nunundi tsisoni, tsiu khukholwa varukwa mu shivala shia Misri.” Nashio shivune shichilanga havundu henaho nalaangwa Gilugali, khali khutukha nunundi.
10Lwa Vaisraeli vali nivamenyanga mu litaala lia Gilugali, mu lwomera mu litaala lia Yeriko, vakhola Mulukha kwa Pasaka halukolovo, khulitukhu li likhomi na khane, liu mweli kwenoko. 11Litukhu lialondakhu, nivamali khwikhoyela Mulukha kwa Pasaka, nalio liali liu khuraanga lia Vaisraeli valia viraakwa viu mu shivala shia Kanaani: tsimu tsiasihilwa nende mikati chialombwa vuchila mamela. 12Khulitukhu lialondakhu, lwa vali nivakharaanga khulia viraakwa viu mu shivala shienesho, maana shikaroonya hasi khurula mwikulu tawe. Vaisraeli valekha khandi khuliakhu maana, navutswa khumuhika kwenoko, valia viraakwa viu mu shivala shia Kanaani.
Yoshwa Yalola Mundu Nakumile Shivavi
13Lwa Yoshwa yali nali himbi mu litaala lia Yeriko, yalola vwangu mundu nasinjile imbeli wewe, nakumile shivavi. Yoshwa yisuunda himbi khuye, namureeva, “Unyala khuva mulala khu vasikali veru inoho uli mutsiku?”
14Mundu mwenoyo yachipa Yoshwa, “Shindi mulala khuvo tawe; navutswa ndi hanu khuli mwimilili wu mukaanda kwa vasikali vu Mwami Nyasaye.”
Yoshwa yinama hasi manasaala, navoola, “Mwami Nyasaye, ndi murumishi wowo. Wenyanga khukholele shina?”
15Mwimilili wu mukaanda kwa vasikali vu Mwami Nyasaye yavoolela Yoshwa, “Navula vilaaro viovio; wusinjile Havundu Hatakatifu.” Yoshwa yakhola khuli yavoolelwa.
Currently Selected:
YOSHWA 5: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013