YOSHWA 4
4
Machina ku Khwitsushitsilakhu Kasimiikhwa
1Lwa Vaisraeli voosi, vali nivamali khwambukha Muchela kwa Yorodani, Mwami Nyasaye yavoolela Yoshwa, 2“Muliitsa khurovola vandu likhomi na vavili khurula mu vandu, shia mulala mu shia luhia, 3nu khuvavoolela vavukule machina likhomi na kavili hakari wu Muchela kwa Yorodani, havundu halala hele, ha vasalisi vali nivasinjilenje. Vavoolele vachinji machina kenako, khandi vakare hasi havundu ha utsitsanga khukona vutukhu.”
4Nalwo lwa Yoshwa yalaanga vandu likhomi na vavili va yali narovole, 5navavoolela, “Ranji mutsi mu Muchela kwa Yorodani, Lisanduku li Lilakano liu Mwami Nyasaye, uli Nyasaye wenyu, nilishili khutukhayo. Shia mulala khu munyi, alachinga lichina lilala khu maveeka keke, shia luhia khulondokhana khu vunyishi vwa vandu vi tsimbia tsia Israeli. 6Machina yaka kaliitsa khuva shimanyilu mu munyi. Lwa vaana venyu, valiitsa khumureeva mumatukhu kaliitsa khuvaho, shia machina kenako kamanyinyanga khu munyi, 7muliitsa khuvavoolela ndi matsi ku mu Muchela kwa Yorodani kalekha khukholomokha, lwa Lisanduku li Lilakano liu Mwami Nyasaye, liambushitswa muchela kwenoko. Machina yaka kaliitsa khuva khuli shimanyilu shiu khwitsushitsa Vaisraeli shia khase khosi, khulondokhana khu makhuva kikholekha hanu.”
8Vaisraeli vakhola ka Yoshwa, yali navavoolele vakhole. Vavukula machina likhomi na kavili khurula hakari wu Muchela kwa Yorodani, khulondokhana khu isavu yi tsimbia tsia Israeli, khuli Mwami Nyasaye yali navoolele Yoshwa, nivachinga machina kenako, khukahila mu maheemo ka vamenyamu, nivakara hasi. 9Yoshwa yasimiikha khandi machina likhomi na kavili hakari mu matsi ku Muchela kwa Yorodani, havundu ha vasalisi vachinganga Lisanduku li Lilakano, vali nivasinjilenje. (Khali machina kenako, kashiliho nunundi.) 10Vasalisi vatsililila khusinjila hakari mu matsi ku Muchela kwa Yorodani, khutukha lwa vandu voosi vakhola vindu viu Mwami Nyasaye, yali navoolele Yoshwa vakhole, khuli Musa yali niyavoolela Yoshwa. Vandu vambukha Muchela kwa Yorodani vwangu. 11Lwa vandu voosi vali nivamali khwambukha, vasalisi vali nivachinji Lisanduku li Lilakano liu Mwami Nyasaye vimila nivatsia imbeli wa vandu. 12Vandu vi tsimbia tsia Rubeni nende Gadi, khandi inusu ya vandu vuluhia lwa Manaase, niviyavaale viuchi viu khukwanila, vali vu khuraanga khwambukha, nivava imbeli wa vandu vandi voosi, khuli Musa yali niyavavoolela vakhole. 13Vasikali himbi tsiheelefu makhomi kane, niviyavaale viuchi viu khukwanila, vambukha nivatukha mu lwomera lwi litaala lia Yeriko, imbeli wu Mwami Nyasaye khutsia khukwana. 14Khulitukhu lienelo, Mwami Nyasaye yachila Vaisraeli nivahaana vukhumi khu Yoshwa. Vamuha luyali khumatukhu koosi ka yali nashili mwoyo, khuli vali nivahaana luyali khu Musa.
15Mwami Nyasaye yavoolela Yoshwa, 16“Voolela vasalisi vachinganga Lisanduku li Lilakano, varuli mu matsi ku Muchela kwa Yorodani.” 17Yoshwa yavoolela vasalisi, “Ruli mu matsi ku Muchela kwa Yorodani.” 18Lwa vasalisi vali nivamali khutukha khuluchinga lu Muchela kwa Yorodani, matsi karaanga khukholomokha vwangu khandi, nikaraanga khwitsula nu khusumeela khu tsindulu tsiu muchela.
19Vandu vambukha Muchela kwa Yorodani, khulitukhu li likhomi liu mweli ku khuraanga, khandi nivamenya mu maheemo mu litaala lia Gilugali, khuluveka luli ivukwi wi litaala lia Yeriko. 20Yoshwa yasimiikha machina likhomi na kavili, ka vali nivarulitse mu Muchela kwa Yorodani mu litaala lia Gilugali lienelo. 21Yoshwa yavoolela Vaisraeli, “Lwa vitsukhulu venyu valiitsa khumureeva, mumatukhu kaliitsa khuvaho, shia machina yaka kamanyinyanga khu munyi, 22muliitsa khuvavoolela makhuva khulondokhana khumatukhu ka Vaisraeli vambukha Muchela kwa Yorodani, nivachendelanga khulilova liumakanu. 23Vavooleli ndi Mwami Nyasaye, uli Nyasaye wenyu yakhaaminya matsi ku Muchela kwa Yorodani, khutukha lwa mwambukha, khuli yali niyakhaaminyakhu matsi mu Inyanza Imuuchi shichila khutsi. 24Yakhola ndio, khu vandu voosi mu shivala vamanye ndi Mwami Nyasaye, ali ni tsingulu tsinyishi muno; khandi khu munyi muhe Mwami Nyasaye, uli Nyasaye wenyu luyali mihika ni mihika.”
Currently Selected:
YOSHWA 4: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013