YOSHWA 6
6
Khuli Litaala lia Yeriko Liativitswa
1Vilivwa vi litaala lia Yeriko, viali viayikalwa khandi vialindwa vulahi khu Vaisraeli vavuli khwinjilamu. Mundu avulakhuho winjilamu inoho warulamu. 2Mwami Nyasaye yavoolela Yoshwa, “Khuheele tsingulu tsiu khukuura litaala lia Yeriko, vami valio nende vasikali valio voosi vi tsingulu. 3Yivi nende vasikali vovo voosi, khutukha muvotokhane litaala, shia lulala khumatukhu sita. 4Vavukula vasalisi saba, shia musalisi nachinji shisiliva, nivatsia imbeli wi Lisanduku li Lilakano. Khulitukhu lia saba, yivi nende vasikali, muliitsa khuvotokhana hali saba litaala vasalisi nivakhuvanga visiliva. 5Lwa vakhuva shisiliva nu muhumu mulala mukali, lwa muhulila vwangu muhumu kwenoko, vandu voosi valaanjilile ikulu muno, khu masisi ki litaala lienelo kayongovele. Vasikali voosi valiitsa khwinjila vulunji mu litaala lienelo.”
6Khulwa yako, Yoshwa mwana wa Nuni yalaanga vasalisi, navavoolela, “Vukuli Lisanduku li Lilakano liu Mwami Nyasaye, khandi murovole vasalisi saba khwimila imbeli walio nivachinji visiliva.” 7Yoshwa yavoolela vandu veve varaanje khuroonjela ni vavotokhana litaala, nivali na vasikali vandi vamanya khukwana, nivimili imbeli wi Lisanduku li Lilakano liu Mwami Nyasaye.
8Lwa Yoshwa yali namali khulomoloma khu Vaisraeli, vasalisi saba vali nivachinji visiliva saba imbeli wu Mwami Nyasaye varoonjela imbeli; nivakhuvanga visiliva viavo; khandi vandu vali nivachinji Lisanduku li Lilakano liu Mwami Nyasaye, va valondanga munyuma. 9Vasikali vali niviyavaale viuchi varoonjela imbeli wa vasalisi vakhuvanga visiliva, vasikali vandi nivalonda Lisanduku li Lilakano munyuma vakhuvanga visiliva isaa yeneyo yosi. 10Navutswa Yoshwa yali navoolele vandu veve vavuli khuyookakhu liyooko, khali khuvoolakhu shindu shiosi, nashili khuvavoolela vakhole kenako. 11Yoshwa yavoolela vandu venavo vavukule Lisanduku li Lilakano liu Mwami Nyasaye, vavotokhane nalio khundulu khwi litaala lienelo lulala lwonyene. Vakalukha mu maheemo ka vamenyamu, khandi nivakonamu vutukhu vwenovo.
12Yoshwa yavukha kushili mu mavwevwe khulitukhu lialondakhu, ma vasalisi nivavukula Lisanduku li Lilakano liu Mwami Nyasaye. 13Vasalisi saba vali nivachinji visiliva saba, vimila nivatsia imbeli; nivaroonjele imbeli wi Lisanduku li Lilakano liu Mwami Nyasaye nivakhuvanga visiliva viavo. Vasikali vali niviyavaale viuchi viavo, vimila nivatsia imbeli wavo. Vasikali vandi valonda Lisanduku li Lilakano liu Mwami Nyasaye munyuma, nivatsililila khukhuva visiliva viavo. 14Khulitukhu lia khavili yili, varoonjela nivavotokhana litaala lulala lwonyene, khandi nivakalukha mu maheemo ka vamenyamu. Vakhola ndio khumatukhu sita.
15Khulitukhu lia saba, vavukha nuvushele mu mavwewe, nivavotokhana hali saba litaala, khuli lwa vali nivalivotokhana yolo. Nalio liali litukhu lilala liele, lwa vavotokhana hali saba litaala likali lienelo. 16Lwa vasalisi vali nivamali khukhuva hali saba visiliva, Yoshwa yavoolela vandu, “Laanjilili! Shichila Mwami Nyasaye umali khumuha litaala likali yili. 17Litaala likali nende shia shindu shiosi shili mulio, viliitsa khwononyinywa khuli shihanwa khu Mwami Nyasaye. Mukhali mulaaya Rahabu wonyene, halala na vandu vi inzu yeye, navo valiitsa khuva mwoyo, shichila neye wavisa varunishitsi veru va khwali nu khwaruma. 18Navutswa muvuli khuvukulakhu, khali shindu shiosi khu vindu vitushili khwononyinywa. Niiva muliitsa khukhola ndio, muliitsa khulerela Vaisraeli matiinyu, khandi shia shindu shiosi, shili mu maheemo ka Vaisraeli vamenyamu shilitsa khutivitswa. 19Shia shindu shiosi shialombwa khu ifetsa, itsahabu, mukasa, inoho shivia ni shitakatifu khu Mwami Nyasaye. Shiliitsa khuvikhwa mu livishilu liu Mwami Nyasaye.”
20Nalwo lwa vandu vimba tsinyimbo, khandi visiliva nivikhuvwa. Lwa vandu vahulila vwangu muhumu kwi visiliva, vandu valaanjilila ikulu muno, ma masisi nikayongovela. Vasikali voosi vasimukha nivatsia vulunji khu shikulu, nivinjila mu litaala lienelo khandi nivalivukula ni tsingulu. 21Vasinza shia mundu wosi mu litaala lienelo ni shivavi, vandu vasatsa nende vakhali, vaana vatititi nende vasakhula. Viira khandi tsing'ombe, makondi nende tsipunda.
22Yoshwa yavoolela vandu vavili, vali nivarumikha khuli varunishitsi, “Ruli hanu mutsi khwinjila munzu mu mukhali wu kholanga vulaaya, khandi mumurulitsimu, halala na vandu vi inzu yeye, khuli lwa mwamulaaka.” 23Varunishitsi venavo, vinjilamu nivarulitsamu Rahabu, halala na tata wewe nende mama wewe, vamwavo veve, halala na vandu vandi voosi vali vu munzu mwemwe. Varulitsamu viikho veve voosi nende varukwa veve, nivavahila havundu handi vutswa, himbi mu maheemo ka Vaisraeli vamenyamu. 24Vasamba nu mulilu litaala likali liosi, halala ni vindu viosi viali nivili mulio; navutswa vavikha vindu vialombwa khu ifetsa, itsahabu, mukasa nende shivia mu livishilu liu Mwami Nyasaye. 25Navutswa Yoshwa yahonyinya vulamu vu mukhali wakholanga vulaaya Rahabu nende viikho veve voosi, shichila yavavisila varunishitsi vavili, va yali niyaruma mu litaala lia Yeriko. (Khali vitsukhulu va Rahabu vamenyanga mu shivala shia Israeli nunundi.)
26Mumatukhu kenako Yoshwa yisuuha, navoola,
“Mundu uliitsa khumbakha vuyia litaala lia Yeriko,
aliitsa khunyola shilaamo khurula khu Mwami Nyasaye.
Mundu uliitsa khuraanjitsa musinji kwi litaala yili,
aliitsa khukoritsa mwana wewe wi shiyayi mukhulundu;
Mundu uliitsa khumbakha vilivwa vi litaala yili,
aliitsa khukoritsa mwana wewe mushie.”
27Mwami Nyasaye yatsililila khuva na Yoshwa; khandi niyitsominywa shia havundu hosi mu shivala.
Currently Selected:
YOSHWA 6: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013