YOSHWA 3
3
Vaisraeli Vambukha Muchela kwa Yorodani
1Litukhu lialondakhu nu kushili mu mavwevwe, Yoshwa nende Vaisraeli voosi varula havundu halaangwangwa Shitimu, nivatukha khu Muchela kwa Yorodani. Vamenyayo mu maheemo nivalindililanga khwambukha. 2Matukhu kavaka nikakhavira, vimilili vachenda nivakhalakanyila mu maheemo ka vandu vamenyamu, 3nivavoolela vandu, “Lwa muliitsa khulola vasalisi vuluhia lwa Levi nivachinji Lisanduku li Lilakano liu Mwami Nyasaye, uli Nyasaye wenyu, muliitsa khurula havundu ha muliitsa khuva numumenyanga mulilonde; 4nikanyalikha mumanye injila yamulondelakhu, shichila mushili khwitsilakhu khunjila yeneyo. Navutswa muliitsa khuva nu vwiyangu himbi ikilomita indala khurula khu Lisanduku li Lilakano; muvuli khwisuundakhu khulio himbi.”
5Yoshwa yavoolela vandu, “Mwitakase, shichila Mwami Nyasaye aliitsa khukhola mu munyi vene viloleshitsu litukhu lia mukamba.” 6Khulwa yako, Yoshwa yavoolela vasalisi, “Vukuli Lisanduku li Lilakano, muroonjele imbeli wa vandu.” Valivukula nivaroonjela imbeli wa vandu.
7Mwami Nyasaye yavoolela Yoshwa, “Nzitsanga khukhuha vukhumi nunundi Vaisraeli voosi, nivalolanga. Nalwo lwa valiitsa khumanya ndi niitsa khuva nivi, khuli lwa navetsanga na Musa. 8Voolela vasalisi vachinganga Lisanduku li Lilakano, ‘Lwa muliitsa khutukha khundulu khu Muchela kwa Yorodani, muliitsa khusinjila vulunji mu muchela kwenoko.’ ”
9Khulwa yako, Yoshwa yavoolela Vaisraeli, “Hambi himbi, muhulishitsi ku Mwami Nyasaye, uli Nyasaye wenyu yenyanga khumuvoolela. 10Nindi mutsitsanga khumanya ndi neye Nyasaye uli mwoyo mu munyi, khandi ndi atsitsanga khumukhunjila imbeli wenyu Vakanaani, Vaahitse, Vaahivi, Vapeerizi, Vagirigashi, Vaamori, nende Vayeebusi. 11Loli! Lisanduku li Lilakano liu Mwami Nyasaye wamihanga shia shindu shiosi khulilova, litsitsanga khwambukha Muchela kwa Yorodani munyi numushili inyuma. 12Khulwa yako, murovole nunundi vandu likhomi na vavili khurula mu vandu vi tsimbia tsia Israeli, shia mulala khurula mu vandu vuluhia lulala. 13Lwa vasalisi vachinganga Lisanduku li Lilakano liu Mwami Nyasaye wamihanga shivala shiosi valiitsa khuseena mu matsi, Muchela kwa Yorodani kuliitsa khulekha khukholomokha, khandi matsi kakholomokhanga, kaliitsa khwivunjitsa havundu halala.”
14Lwa vandu varula mu maheemo ka vamenyamu, khutsia khwambukha Muchela kwa Yorodani, vasalisi vachinganga Lisanduku li Lilakano, vimila nivatsia imbeli wavo. 15Lwa vandu vachinganga Lisanduku li Lilakano, vatukha ha Muchela kwa Yorodani, nivaseena mu matsi (muchela kwitsulanga matsi, nikasumeela mumatukhu koosi ki lichesa), 16matsi kakwo kalekhanga khukholomokha, nikivunjikha halala, ihale wene muno mu litaala lia Adamu, lili himbi mu litaala lia Zeratsani. Matsi kakholomokhanga nikatsukha mu Inyanza yi Ichumbi kasinjila vutswa, ma vandu nivambushila himbi mu litaala lia Yeriko. 17Lwa vandu vambukha mucheela khulilova liumakanu, vasalisi vachinganga Lisanduku li Lilakano, vasinjila khulilova liumakanu hakari wu Muchela kwa Yorodani kwenoko, khutukha lwa vandu voosi vambukha muchela.
Currently Selected:
YOSHWA 3: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013