ISAYA 3
3
Shileeche mu Yerusalemi
1Loli! Mwami Nyasaye wi Mikaanda Chiliihe
arulitsanga mu Yerusalemi nende Yuda
shia shindu shiosi shiu vukhonyi --
khali vukhonyi vwosi vwi shiukhulia,
vukhonyi vwosi vwa matsi --
2mundu wi tsingulu nende musikali wi liihe,
mukhalachi nende muprofeti,
mukhumu nende mwimilili musakhulu,
3mwimilili wa vasikali makhomi karanu
nende mundu waheelwa luyali,
mukhonyani wi inganakani nende muloochi wechela khulooka
khandi wurumishilanga vikaanda.
4Niitsa khukhola vaana vi shiyayi khuva vimilili vavo;
khandi vaana vatoro valiitsa khuvamiha.
5Vandu valiitsa khutambitswa,
shia mundu aliitsa khutambitsa weshie,
khandi shia mureende aliitsa khutambitsa weshie;
vavukha valiitsa khuhinganyinya vasakhulu,
khandi vandu vavula vukhonyi valilechelitsa varuchi vavo.
6Matukhu kaliitsa khutukha ka mulala khu vamwavo
aliitsa khukumila amwavo wewe hango ha tata wewe,
mamuvoolele,
“Lwa uli ni tsinguvu tsiu khwifwala,
nu vulahi nuvele mwimilili weru,
mumatukhu ka khuli mu vutiinyu yaka.”
7Navutswa aliitsa khuchipa mumatukhu kenako,
“Inzi mbulakhu khuli nyala khumukhonya;
mbulakhu shiukhulia nende tsinguvu mu inzu yanje;
leshi khukhola khuva mwimilili wa vandu!”
8Lolikhu khuli litaala likali lia Yerusalemi lisikarila,
khuli lusomo lwa Yuda lwativitswa!
Lilomoloma liavo nende vikholwa viavo
ni vitamanu khu Mwami Nyasaye,
khali valechelitsanga khuvaho khwekhwe mu vukhumi.
9Liheenza liavo lihaananga vushiahidi khuvo;
vakholanga vwoni vwavo mu vandu havulavu
khuli litaala lia Sodomu,
shivanyala khuvuvisa tawe.
Wooyi! Vali khu vutiinyu!
Shichila navo vene vilerela vutamanu.
10Vandu vi likhola liu vulunji valiitsa khuva ni ikhaavi;
shichila valiitsa khulia lucheeli lwavo.
11Navutswa vandu vatamanu valiitsa khu khu vutiinyu,
shichila ka vakhola vandi nako ka valiitsa khukholwa.
12Va vanduvukha valiitsa khutambitsa vandu vaanje,
vandu vakhali valiitsa khuvamiha.
Munyi vandu vaanje, navo va vimilili venyu vanyashitsanga,
ni vakoyanyinya mu limenya lienyu.
13Mwami Nyasaye umali khuvukula vwiyangu vwevwe
khuraanga khuyaala mushiina;
khandi umali khwirechekha khukhalachila vandu.
14Mwami Nyasaye uraanji khukhalachila
vasakhulu nende vimilili va vandu.
Avayaalanga navoola,
“Nu munyi mwononyinya mulimi kwi misabibu;
muli ni vindu via mwayaaya vandu vamanani mu tsinzu tsienyu.
15Ni shina shia mumanyinyanga
lwa mutambitsanga vandu vaanje,
nu mwihonela vandu vamanani.
Inzi Mwami Nyasaye wi Mikaanda Chiliihe mali khuvoola.”
Khuli Vandu Vakhali mu Yerusalemi Vachelihitswa
16Mwami Nyasaye avoolanga,
“Lolikhu khu vakhali va Sayoni vilola,
vachendanga nivachinguula mirwi chiavo,
viheenzanga nivikola kola vutswa,
nivifwali tsibanjili khu makhono kavo.
17Khulwa yako, Mwami Nyasaye aliitsa khusiuvila vakhali va Sayoni
mavimba khu mirwi chiavo;
Mwami Nyasaye aliitsa khuvakhola khuva ni viole.”
18Khulitukhu lienelo Mwami Nyasaye aliitsa khuvanuula
vindu via valolanga ni vilahi muno:
tsibanjili tsiavo, vitambaya via vivohanga
khu mirwi chiavo nende matongolo ku mwing'ori mwavo;
19matemba mu maroyi kavo,
tsibanjili nende vitambaya,
20tsikofia tsiu khu mirwi,
tsilisi tsia vivohanga khu makhono kavo nende mu visiindi viavo;
21tsibete tsia vafwalanga khu makhono kavo
khandi mu maroyi kavo;
22tsikaanzu tsindahi tsiene, tsikaanzu tsindambi tsiene,
tsinguvu nende visiko viavo;
23khandi viiho, tsinguvu tsiavo tsia machioro malahi,
vitambaya viu mu makhono, nende vitambaya via vivohanga mwing'ori.
24Vukhala vu khurumishila makura ku khwivekha,
khuliitsa khuvaho nu vukuundu vutamanu;
vukhala vu khurumishila tsikhanda tsiu mu shisiindi,
valiitsa khwifwalanga mikoye miele;
vukhala vu khuva ni liiswi lilahi,
valiitsa khuva nivioole;
vukhala vu khwifwala tsinguvu tsindahi tsiene
valiitsa khwifwalanga tsinguvu tsia makunia;
vukhala vukhuva ni likoondo lilahi liene valiitsa khunyola tsisoni!
25Vandu venyu valiitsa khusinzwa ni shivavi,
vasikali venyu vi tsingulu
valiitsa khukhutsila muliihe.
26Vandu vali mu vilivwa via Sayoni valiitsa khwikhula nu khulila;
liliitsa khuva khuli mukhali wanavulwa tsinguvu wikhala hasi.
Currently Selected:
ISAYA 3: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013