ISAYA 2
2
Milembe chi Mihika ni Mihika
(Mika 4:1-3)
1Yili nalio likhuva lia Isaya mwana wa Amozi yalola khu lusomo lwa Yuda nende litaala likali lia Yerusalemi.
2Mumatukhu kaliitsa khuvaho, shikulu shi Litempeli liu Mwami Nyasaye liumbakhwakhu
shiliitsa khuraambiha khuvira vikulu vindi viosi,
shiliitsa khuva shiraambi khuvira rukulu riosi.
Vandu vi vivala vindi valiitsa khwitsa khushilola.
3Vandu vanyishi valiitsa khwitsa nivavoola,
“Hambi khutikulushi khu Shikulu shiu Mwami Nyasaye,
khwinjila mu Litempeli liu Mwami Nyasaye wa Yakobo;
nikanyalikha khukhwechitsa injila yeye,
nu khukhola ka yenyanga;
shichila malako kaliitsa khurula Sayoni,
likhuva liu Mwami Nyasaye khurula mu Yerusalemi.”
4Aliitsa khukhalachila vandu vi tsimbia tsiosi,
khandi aliitsa khurweshitsila vandu vanyishi katoto;
valiitsa khwiraanya marimu kavo khukwa machembe ku khulimila,
khandi vivavi viavo khukwa tsikhoni tsiu khuchesela
vivala viliitsa khukwanakana,
vuchila khumanyakhu shindu shiosi khu liihe.
5Munyi vitsukhulu va Yakobo, hambi,
chendeli mu vulavu vu Mwami Nyasaye!
Vwiloli Vuliitsa Khutivitswa
6Yivi Nyasaye, wayivilila vandu vovo vi inzu ya Yakobo.
Ni kilikali, vakhumu khuluveka luli ivukwi vayitsula mu munyi
khandi valoochi khurula mu shivala shia Vafilisti,
shichila valondanga miima chia vandu vi tsimbia tsindi tsinjeni.
7Shivala shiavo shiayitsula ifetsa nende itsahabu;
khandi muli ni livishilu mu vunyishi.
Shivala shiavo shili ni tsifarasi tsinyishi;
makaare kiliihe kavo kanyala khuvula khuvalitswa.
8Shivala shiavo shiayitsula misambwa;
khandi musikamilanga vindu
via vene mwalomba na makhoni kenyu.
9Vandu valiitsa khwichehitsa, nu khukholwa tsisoni --
Mwami Nyasaye, lekha khuvasemeha!
10Valiitsa khwinjila mu lwanda
nu khwivisa mu malova,
khwilukha khu vurima vu Mwami Nyasaye,
khurula khu tsingulu tsietsie nende vukhumi!
11Litukhu lili himbi khutukha lwa mundu wi shileche
aliitsa khulekha shileche;
khandi vandu vichinjililanga valiitsa khuchehitswa,
ma Mwami Nyasaye wonyene aliheelwa vukhumi.
12Khulitukhu lienelo, Mwami Nyasaye wi Mikaanda Chiliihe
aliitsa khuchehitsa shia mundu wosi uli ni tsingulu,
shia mundu wosi mwiloli khandi mwichinjilili.
13Aliitsa khutivitsa misala chiosi chia ceda chia Lebanoni
nende miseno chiosi chia Bashani.
14Aliitsa khutandasa vikulu viraambi
nende rukulu rwosi,
15shia munaara kwosi muraambi,
nende masisi koosi ki tsimbinga.
16Aliitsa khwinikha mu matsi
khali tsimeli tsingali tsiosi tsia Tarishishi
khandi tsiasiaywa vulahi vwene.
17Shileche shiu mundu shiliitsa khuchehitswa,
vwichinjililu vwa vandu vukholelwi tsisoni.
Ni Mwami Nyasaye wonyene uliitsa khuheelwa vukhumi
khulitukhu lienelo.
18Misambwa chiliitsa khutivitswa.
19Vandu valiitsa khwivisa mu luhoongo luli mu lwanda
khandi mu vwina vuli hasi mulilova
khuchelitsa khwilukha khu Mwami Nyasaye
avuli khuvalolela vurima
khandi khwivisa tsingulu tsietsie nende vukhumi vwevwe,
lwa aliitsa khulolekha khutechelitsa shivala.
20Khulitukhu lienelo, vandu valiitsa khusiuvila machiungu nende manyinya
misambwa chia valomba khu itsahabu nende ifetsa,
khusaala khuchio.
21Valiitsa khwilukha nivatsia mu luhoongo mu lwanda,
khandi mu vwina vwalama
khuchelitsa khwilukha Mwami Nyasaye
avuli khuvavukulila vurima
khandi khwilukha tsingulu tsietsie
nende vukhumi vwevwe.
22Lekhani nu mundu wenyekhanga khukhutsa,
weselananga miuya mu muulu keke,
nu vukhala shina vwa vali navwo khwinzi?
Currently Selected:
ISAYA 2: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013