LITSUSHITSWA 3

Khuli Mwami Ogu wa Bashani Yakuurwa

(Liv 21:31-35)

1“Lwa khwali nu khutikulukhanga khu muhaanda kutsitsanga mu shivala shia Bashani, Mwami Ogu nende vasikali veve, vakhukwana mu litaala lia Edurei. 2Navutswa Mwami Nyasaye yambolela, ‘Lekha khumuria; shichila mali khumuha tsingulu tsiu khukuura ye, vasikali veve nende shivala shieshie. Mukholi malala mele ka mwakhola Mwami Sihoni wa Vaamori, wamihanga mu litaala lia Heshiboni.’

3“Mwami Nyasaye, uli Nyasaye weru yakhukuurila khandi Mwami Ogu nende vasikali veve voosi. Khwamwiira nakhutsa, khandi mundu avulakhuho, wa khwarika nashili mwoyo. 4Mumatukhu kenako khwavukula ni tsingulu mataala keke koosi. Khwavukula mataala koosi -- koosi kali makhomi sita -- lusomo lwa Arigoba lwosi, lwa Mwami Ogu wa Bashani yali niyamiha. 5Mataala kenako koosi kali kayevwa na masisi maraambi, vilivwa nende milondi chiu khwikala vilivwa; khandi khwaliyo ni michitsi minyishi chiali nichiumbakhwa vuchila masisi. 6Khwativitsa shia shindu shiosi, khandi nu khwiira vandu vasatsa voosi, vakhali nende vaana, khuli khwakhola mu mataala ku Mwami Sihoni wamihanga mu litaala lia Heshiboni. 7Navutswa khwavukula mu mataala kenako miruku, khandi nu khuyaayamu shia shindu shiosi.

8“Mumatukhu kenako, khwavukula khurula khu vami vavili va Vaamori venavo, shivala khuluveka luli ivukwi wu Muchela kwa Yorodani, khuraanjila khu Muchela kwa Arunoni khutukha khu Shikulu shia Herimoni. 9(Vasidoni valaanganga Shikulu shia Herimoni lira lindi Sirioni. Vaamori vashilaanganga Seniri.) 10Khwavukula lusomo lu Mwami Ogu wa Bashani yamihanga: mataala kali mu lwomera, tsisomo tsia Gileadi nende Bashani, khali ivukwi khutukha khu mataala ka Saleka nende Edurei.”

11(Mwami Ogu neye wonyene, warikwa nashili mwoyo mu mindu chiaraambiha chiu luhia lwa Refahimu. Shitali shieshie, shiali shialombwa khu shivia. Shili nu vuraambi tsimita 4 nende vukalamu tsimita 2, khulondokhana khu shipimu shia matukhu kenako. Shitali shieshie shinyala khulolekha mu litaala lia Raba lia Vaamoni.)

Tsimbia Tsiali Ivukwi wa Yorodani

(Liv 32:1-42)

12“Lwa khwavukula shivala nu khumenyamu mumatukhu kenako, nakavula lusomo luli ivuluka wa khuluveka Aroheri, himbi khu Muchela kwa Arunoni khu vandu vi tsimbia tsia Rubeni nende Gadi, khali shivala shi vikulu shia Gileadi nende mataala ki shivala shienesho. 13Nakavula lusomo lwa Gileadi, lwali nulurikale khu inusu ya vandu vuluhia lwa Manaase nende shivala shia Bashani, wu Mwami Ogu yamihanga, nakhwo khuvoola lusomo lwosi lwa Arugoba.”

(Shivala shia Bashani nashio shialaangwangwa khale shivala shia Refahimu. 14Mwitsukhulu wa Manaase, walaangwangwa Yahiru, yavukula lusomo lwosi lwa Arugoba, nakhwo khuvoola shivala shia Bashani khali khutukha khu mipaka chia Geshuri nende Maaka. Yakulikha michitsi lira lielie; khandi chishilaangwangwa nunundi Michitsi chia Yahiru.)

15Nakavula lusomo lwa Gileadi khu vandu vu lwivulu lwa Makiri warulanga mu vandu vuluhia lwa Manaase. 16Navutswa nakavula lusomo luraanjilanga Gileadi, khukholomokha khutukha khu Muchela kwa Arunoni khu vandu vi tsimbia tsia Rubeni nende Gadi; hakari wu muchela kwenoko, nakwo mupaka kwi ikuvanda; mupaka khuluveka luli ivuluka nu Muchela kwa Yaboku, nu kuli mulala khu mupaka kwa Vaamoni. 17Lusomo lwavo lwraanjilanga imbo khutsia khutukha khu Muchela kwa Yorodani, khuraanjila khu Inyanza ya Galilaya, khuluveka luli ivuluka khutukha khu Inyanza yi Likhutsa khandi khutukha hasi hi Shikulu shia Pisiga shili ivukwi.

18“Mumatukhu kenako, namuvoolela, ‘Mwami Nyasaye, uli Nyasaye wenyu umuheele shivala khuluveka luli ivukwi wu Muchela kwa Yorodani mumenyemu. Hii vasikali venyu viuchi viu khukwanila nunundi, khutsia khwambukha Muchela kwa Yorodani vatushiyo imbeli wa vandu vi tsimbia tsindi tsia Israeli, va vakhonye khuvukula shivala shienesho. 19Ni vakhali venyu, vaana venyu, nende miruku chienyu chionyene -- manyi ndi muli ni miruku minyishi, nachio chirikala mu mataala ka niitsa khumuha. 20Khonyi Vaisraeli veshie khutukha lwa vavukula shivala shiu Mwami Nyasaye avaheetsanga khuluveka luli imbo wu Muchela kwa Yorodani khandi khutukha lwa Mwami Nyasaye achila vamenyeyo mu milembe, khuli yamukholela khale havundu ha mumenyanga hanu. Numwakhakhola ndio, munyala khukalukha mu shivala shia namukavulila shinu.’

21“Mumatukhu kenako, navoolela Yoshwa, ‘Uloli ni tsimoni tsiotsio koosi ku Mwami Nyasaye, uli Nyasaye wowo amali khukhola vami vavili venavo. Mwami Nyasaye aliitsa khukhola malala mele khu vami voosi vi vivala, via mutsitsanga khwinjilamu. 22Muvuli khuvaria; shichila Mwami Nyasaye, uli Nyasaye wenyu aliitsa khumukwanila.’

Musa Yakaywa Khwinjila Kanaani

23“Mumatukhu kenako, nasaaya nu mwoyo kwosi khu Mwami Nyasaye, nimbola, 24‘Mwami Nyasaye, nivi uranji khumanyinya inzi murumishi wowo tsingulu tsiotsio khandi vunyali vwovwo. Ni nyasaye shina mwikulu inoho khulilova, uli nu vunyali vu khukhola vikholwa nende vindu viu khuchenyinya khuli viovio? 25Mwami Nyasaye, nuyaanza lekha nzi khwambukha Muchela kwa Yorodani, manzi khulola shivala shilahi shili injelekha wu Muchela kwa Yorodani, shivala shilahi shi vikulu yeshio nende vikulu via Lebanoni.’

26“Navutswa ni munyi mwachila Mwami Nyasaye nandolela vurima niyambakhana khumbulishitsa. Nikhali Mwami Nyasaye yavoola, ‘Kakhatukha. Lekha khukalushila khulomoloma. 27Simukha utsi ha vutoonje hene hi Shikulu shia Pisiga, ma uheenze khuluveka luli ivuluka, ikuvanda, ivukwi nende imbo. Uheenzishitsi munjila indahi shivala shienesho, shichila uliitsa khuvula khwambukha Muchela kwa Yorodani. 28Navutswa wivaalile Yoshwa mivaalo kakhuheele. Mutinyilitsi khandi umuhe tsingulu, shichila neye utsitsanga khwimilila vandu khwambukha khutsia, khumenya mu shivala shiuloli yeshio.’

29“Khwatsililila khurikala mu luhoongo, khuluveka lundi lwi litaala lia Betsi Pehori.”

Currently Selected:

LITSUSHITSWA 3: LLLPRO

Highlight

Copy

Compare