LITSUSHITSWA 2

1“khwraanjilayo luchendo lu khukalukha mu shiangalangwi, khuvirila khu muhaanda kutsitsanga khu Inyanza Imuuchi, khuli Mwami Nyasaye yali nambolele. Khwaliyo khumatukhu manyishi nu khuhuya huyanga mu shivala shi vikulu shia Edomu.

2“Nalwo lwa Mwami Nyasaye yambolela, 3ndi lwa khumali matukhu manyishi nu khuhuya huyanga mu shivala shi vikulu, leshi khutikulushi khuluveka luli ivuluka. 4Yambolela muhe mivaalo yaka, ‘Muli himbi khukhalakanyila mu shivala shi vikulu shia Edomu, nululi lusomo lwa viikho venyu, vitsukhulu va Esau vamenyamu. Valiitsa khumuria, navutswa muve vacheli muno; 5muvuli khukwana navo; shichila shinzitsanga khumuhaakhu khali luveka lulala khu shivala shiavo, shia munyala khuseenamu tawe. Mali khuha Esau shivala shi vikulu shia Edomu khuva shieshie. 6Muliitsa khukuula khuvo shiukhulia shiamulia nende matsi kamung'wa.’

7“Ni kilikali, Mwami Nyasaye, uli Nyasaye wenyu wamukasitsa mu mihinzilu chienyu chiosi chia mukholanga. Yamulinda vulahi vwene lwa mwachenda numuhuya huya mu shiangalangwi shivambalalu yishi. Mwami Nyasaye, uli Nyasaye wenyu yali na munyi khumihika makhomi kane yichi; khandi shindu shivulakhuho shia mwacheheelwa.

8“Khwatsililila nu luchendo lweru manukhuvira havundu ha vamwiru veru, nivali vitsukhulu va Esau vamenyanga mu shivala shi vikulu shia Edomu. Khwalekha inyuma muhaanda kutsitsanga havundu halaangwangwa Araba, khurula mu mataala ka Elatsi nende Eziongeberi. Khwashiamila iweneyo nu khutsia khuvirila khu injila yu mwichendanyama mwa Moabu. 9Mwami Nyasaye yambolela, ‘Uvuli khunyashitsa Vamoabu, nivali vitsukhulu va Loti, inoho khuraanga khukwana navo. Mali khuvaha litaala lia Ari, khandi nzitsanga khuvula khumuhaakhu, khali lusomo lulala khurula khu shivala shiavo.’ ”

10(Mumatukhu kenako, lwivulu lwi mindu miraambi chi tsingulu chialaangwangwa Amimu, chiamenyanga mu litaala lia Ari. Chiali miraambi muno khuli mindu chiu lwivulu lwa Anakimu. 11Chialaangwangwa lira lindi Refahimu, khuli Vanakimu; navutswa Vamoabu vachilaanganga Amimu. 12Khali ndio, Vahoori navo vamenyanga mu shivala shia Edomu; navutswa vitsukhulu va Esau vavakhungamu, nivamulula luhia lwavo, nivamenyamu vene, khuli Vaisraeli vakhunga vatsiku vavo, khurula mu shivala shiu Mwami Nyasaye yali niyavaha.)

13“Khwambukha Muchela kwa Zeredi khuli Mwami Nyasaye yali navooli khukhole. 14Khwavukula mihika makhomi kavaka na munane, khuchenda khurula mu litaala lia Kadeshi-bareneha, khutukha lwa khwambukha Luhoongo lwa Zeredi. Vasikali voosi viliihe vi likhula lienelo vali nivakhutsa, khuli Mwami Nyasaye yali niyavoola valiitsa khukhutsa. 15Mwami Nyasaye yatsililila khuvahinganyinya khutukha lwa yamulula voosi.

16“Mumatukhu ka vasikali venavo voosi vali nivakhutsa, 17Mwami Nyasaye yambolela, 18‘Mutsitsanga khukhalakanyila nunundi mu lusomo lwa Moabu khu muhaanda kutsitsanga mu litaala lia Ari. 19Lwa muliitsa khutukha mu shivala shia Vaamori, muvuli khuvanyashitsa inoho khukwana navo; shichila nzitsanga khuvula khumuhaakhu, khali lusomo lulala khu shivala shiavo. Mali khuha vitsukhulu va Loti shivala shienesho.’ ”

20(Shivala shienesho shivukulwangwa khandi khuva shia Refahimu, lira lia vandu vamenyayo khale; khali niiva Vaamoni va valaanganga lira lindi Zamuzumimu; 21mindu miraambi chi tsingulu khuli mindu chia Anakimu. Chiali chiayivulana mu vunyishi, khandi chili ni tsingulu tsinyishi. Navutswa Mwami Nyasaye yachitivitsa, ma Vaamori nivavukula shivala shienesho. 22Mwami Nyasaye yakholela malala mele Vaedomu, nivali vitsukhulu va Esau, vamenyanga mu shivala shi vikulu; lwa yativitsa Vahoori, khu vamenye mu shivala shienesho; khali vashimenyayo nunundi. 23Shivala shili khundulu khuluchinga lwi Inyanza ya Meditarenia nashio, shia Vaavimu varulanga mu shisulu shia Kurete vamenyamu. Vativitswa nivamenya mu shivala shienesho, khutsia khutukha mu litaala lia Gaza.)

24“Lwa khwali nu khumali khukhalakanyila mu shivala shia Moabu, Mwami Nyasaye yakhuvoolela, ‘Ranji luchendo lwenyu nunundi mutsi khwambukha Muchela kwa Arunoni. Muheele tsingulu tsiu khukuura Mwami Sihoni wa Vaamori, wumenyanga mu litaala lia Heshiboni nende shivala shieshie. 25Khuraanjila nunundi nzitsanga khulomba vandu shia havundu hosi khumuria munyi. Lwa mundu aliitsa khuhulilakhu shindu shiosi khulondokhana khu munyi, aliitsa khutechela naria shichila munyi.’

Vaisraeli Vakuura Mwami Sihoni

(Liv 21:21-30)

26“Naruma varumwa khurula mu Shiangalangwi shia Kedemotsi khutsia khulola Mwami Sihoni wamenyanga mu litaala lia Heshiboni ni likhuva liu khwenya milembe, 27‘Nuyaanza khuhuchilile khukhalakanyile mu shivala shioshio shia wamihanga. Khuliitsa khuvirila vulunji khu muhaanda, vuchila khutsia haluveka handi. 28Niitsa khukhurunga tsisenti khu shiukhulia shiungulitsila nende matsi kakhung'wa. Nuyaanza khuhuchilile khukhalakanyile khu vilenje mu shivala shioshio -- 29khutukha lwa khwambukha Muchela kwa Yorodani, khwinjila mu shivala shiu Mwami Nyasaye, uli Nyasaye weru akhuheetsanga, khuli vitsukhulu va Esau, vamenyanga mu shivala shia Edomu, nende Vamoabu vamenyanga mu litaala lia Aru vakholi.’

30“Navutswa Mwami Sihoni wamenyanga mu litaala lia Heshiboni, shiyali ni lienya liu khukhuhuchilila khukhalakanyile mu shivala shieshie tawe. Mwami Nyasaye, uli Nyasaye wenyu yachila nava vahaaka khandi muhingani, khu khumukuuri, khandi khuvukule shivala shieshie khuli akholi nunundi.

31“Nalwo lwa Mwami Nyasaye yambolela, ‘Loli, mali khumukuurila Mwami Sihoni nende shivala shieshie; vukuli nunundi shivala shieshie mumenyemu.’ ” 32Lwa Mwami Sihoni yitsa na vasikali veve voosi khukhukwana mu litaala lia Yahazi; 33Mwami Nyasaye, uli Nyasaye weru yakhukuurila. Khwiira ye, vaana veve nende vasikali veve voosi. 34Mumatukhu kenako, khwavukula ni tsingulu mataala keke koosi; khandi khwativitsanga shia mundu wosi, ave musatsa, mukhali nende mwana. Mundu avulakhuho wa khwarika nashili mwoyo. 35Miruku chiavo chia khwayaaya chionyene, nachio chia khwavukula khuva chieru; khumeetakhu khandi vindu via khwayaaya khurula mu mataala, ka khwali nu khuvukule ni tsingulu. 36Mwami Nyasaye, uli Nyasaye weru yakhuha tsingulu tsiu khuvukula mataala koosi, khuraanjila mu litaala lia Aroheri, lili khundulu lu Luhoongo lwa Arunoni, khandi litaala mu luhoongo lwenolo, khutukha khu lusomo lwa Gileadi. Litaala livulakhuyo liali ni liumbakhwa ni lisisi liraambi, liali linyala khukhukuura ni tsingulu. 37Navutswa khwambakhana khwisuundakhu himbi mu lusomo lwa Vaamoni, inoho khali khuluchinga lu Muchela kwa Yaboku inoho khu mataala mu shivala shi vikulu, inoho khali havundu handi hosi wu Mwami Nyasaye, uli Nyasaye weru yakhuvoolela khuvuli khutsia.

Currently Selected:

LITSUSHITSWA 2: LLLPRO

Highlight

Copy

Compare