LITSUSHITSWA 4

Musa Yasaya Vaisraeli Valonde Malako

1Nalwo lwa Musa yavoolela Vaisraeli, “Mulonde malako koosi ka mwechitsanga; khu mu limenya mu shivala shiu Mwami Nyasaye, uli Nyasaye wa vakuuka venyu amuheetsanga. 2Muvuli khumeeta khu mechitso ka mwechitsi shindu inoho khuchehitsakhu shindu; navutswa mulonde malako kamwechitsi ku Mwami Nyasaye, uli Nyasaye wenyu. 3Munyi vene mwalola ku Mwami Nyasaye yakhola ha Shikulu shia Pehori. Yamulula shia mundu wosi, wasaala khu musambwa kwa Baali havundu henaho; 4navutswa valala khu munyi, valolekha khuva vasuuvilwa khu Mwami Nyasaye, uli Nyasaye wenyu vashili mwoyo khutukha nunundi.

5“Mali khumwechitsa malako koosi, khuli Mwami Nyasaye, uli Nyasaye wanje yambolela khole. Mukalonde lwa muliitsa khuva numumenyanga mu shivala, shia muli himbi khutsia khuseera. 6Muve vasuuvilwa khukalonda, shichila kalamanyinya vandu vi tsimbia tsindi tsiosi ndi muli nu vusitsa. Lwa valiitsa khuhulila shindu shiosi khulondokhana khu malako kenako, nalwo lwa valiitsa khuvoola, ‘Ni kilikali, vandu vuluhia lwi tsingulu yulu luli na vandu vitsula vusitsa nende limanya!’

7“Luhia lundi luvulakhuho, khali luve ni tsingulu tsinyishi, luli na nyasaye uli himbi lwa venyanga avakhonye khuli Mwami Nyasaye, uli Nyasaye weru akhukholelanga. 8Luhia lundi luvulakhuho, khali luve ni tsingulu tsinyishi, luli na malako katoto khuli ka mwechitsi nunundi. 9Navutswa muve vacheli khandi mwiheenze vulahi, khu muvuli khwivilila khumatukhu koosi ka mushili mwoyo, ka munyi vene muloli inoho mwechitswi. Yechitsi vaana venyu nende vitsukhulu venyu 10makhuva khulondokhana khulitukhu lia mwasinjilakhu imbeli wu Mwami Nyasaye, uli Nyasaye wenyu ha Shikulu shia Sinai; lwa Mwami Nyasaye yambolela, ‘Nanjila halala vandu. Nyenyanga vahulile makhuva kaanje, vatsililile khweka khuli vamba luyali, khumatukhu koosi ka vashili mwoyo; valiechitsa vaana vavo vakhole malala mele.’

11“Mwisuunda numusinjila himbi ha shikulu shiakhanga nushituuma mwooshi mwikulu. 12Nalwo lwa Mwami Nyasaye yalomoloma khu munyi khuvirila mu mulilu, khuli mwahulila nalomolomanga; navutswa shiumwamulola khuli asasanga tawe. 13Yamuvoolela makhuva khulondokhana khu lilakano lielie, namuvoolela mulonde, nakhwo khuvoola Malako Likhomi; ka yahandikwa khu machina kavili kakhongwa. 14Mumatukhu kenako, Mwami Nyasaye yambolela mwechitsi mivaalo nende malako koosi kamulonda, numuli mu shivala shia mutsitsanga khumenyamu.

Lichelihitswa khuvula Khusaala khu Misambwa

15“Lwa mwakhalolakhu ha Shikulu shia Horebu, khuli Mwami Nyasaye asasanga lwa yalomoloma khu munyi khuvirila mu mulilu, muve vacheli khandi mwiheenzeshitsi vene, 16khu muvuli khukoyana nu mwilombela vene musambwa khusasa shindu shiosi -- kave kusasanga mundu musatsa inoho mukhali, 17inyama yosi khulilova, inoho linyonyi liosi lipulukhanga, 18inoho khusasa shilombe shimolakanga hasi inoho isutsi imenyanga mu matsi. 19Lwa muheenzanga mwikulu mulola liuva, mweli, nende tsinyining'ini, vindu vili mwikulu viosi, vindu viu Mwami Nyasaye, uli Nyasaye wenyu yalomba vive viu khukhonya vandu voosi khulilova, muvuli khukoyana, khali khusaala khuvio inoho khuvinamila. 20Navutswa Mwami Nyasaye, neye wamurulitsa mu shivala shia Misri, shivala shili khuli lijiko liakhanga mulilu mululu. Yamurovola khumukhola khuva vandu veve mwene, khuli lwa muli nunundi. 21Mwami Nyasaye, uli Nyasaye wenyu yambukulila vurima shichila munyi, niyisuuha navoola havulavu ndi shinzitsanga khwambukha Muchela kwa Yorodani, khwinjila mu shivala shilahi shia ye mwene amuheetsanga mumenyemu tawe; 22shichila nzitsanga khukhutsila mu shivala shinu. Shinzitsanga khwambukha Muchela kwa Yorodani tawe. Navutswa munyi mutsitsanga khwambukha, nu khutsia khumenya mu shivala shilahi shienesho. 23Muve vacheli muvuli khwivilila lilakano liu Mwami Nyasaye, uli Nyasaye wenyu yakhola na munyi. Muvuli khwilombelakhu musambwa khusasa shindu shiosi, shiu Mwami Nyasaye, uli Nyasaye wenyu yambakhana; 24shichila Mwami Nyasaye, uli Nyasaye wenyu yakhanga khuli mulilu kwakhanga, nu kulaalitsa shia shindu shiosi; ni Nyasaye wi lishiendekha.

25“Lwa muliitsa khuva numumenyanga mu shivala shienesho, muliitsa khwivula vaana nende vitsukhulu, ma musakhuli; muvuli khukoyana lwa mwilombela vene musambwa khusasa shindu shiosi. Nu vutamanu khukhola ndio imbeli wu Mwami Nyasaye; khandi kaliitsa khuchila amuvukulile vurima. 26Nzisuuhanga khu likulu nende khulilova, khuli vashiahidi khu munyi ndi niiva muliitsa khwambakhana khulonda malako kaanje, muliitsa khukhutsila mu shivala, shia mutsitsanga khwambukha Muchela kwa Yorodani mumenyemu. Muliitsa khuvula khumenyayo khumatukhu manyishi, navutswa ni kilikali muliitsa khutivitswa. 27Mwami Nyasaye aliitsa khumusalanyinya mu vandu vi tsimbia tsindi; ni isavu indititi ya vandu mu munyi valiitsa khurikala nivashili mwoyo. 28Muliitsa khusaalilayo vanyasaye va vandu valomba, khu misala nende lichina, vanyasaye vakhaywangwa khulola inoho khuhulila, khulia inoho khuhuunya hunya khu shindu shiosi. 29Muliitsa khukhavilayo Mwami Nyasaye, uli Nyasaye wenyu, khandi muliitsa khumunyola, nikava muliitsa khumukhava nu mwoyo kwosi. 30Lwa muliitsa khunyolekha mu matiinyu ma vindu vienevo vikholeshe khu munyi, muliitsa khukalukhalu khumalilikha khu Mwami Nyasaye ma mulonde malako keke. 31Mwami Nyasaye, uli Nyasaye wenyu neye Nyasaye wi tsimbavasi. Aliitsa khuvula khumulekha inoho khumutivitsa inoho khwivilila lilakano lia yakhola na vakuuka venyu.

32“Runishitsi nunundi vindu viakholekha mumatukhu kakhale, lwa mwali numushili khwivulwa, khuraanjila khulitukhu lia Nyasaye yaloonga vandu khulilova. Runishitsi shia havundu hosi khulilova. Shindu shikali khuli shienesho, shinyala khuva shiakholekhakhu? Mundu alikhuho wahulilakhu shindu khuli shienesho? 33Mundu alikhuho mu vandu venyu ushili mwoyo niyakhahulila nyasaye nalomolomanga khuvirila mu mulilu, khuli munyi mwahulila mamuli mwoyo? 34Toto, khulikhuho na nyasaye wosi wachelitsa khutsia mu shivala shindi khurulitsamu vandu nu khuvakhola khuva veve mwene, khuli Mwami Nyasaye, uli Nyasaye wenyu yakholela mu shivala shia Misri, vene numulolanga? Munyi vene mwalola khuli yarumishila tsingulu tsietsie nende vunyali vwevwe. Yavalerela matiinyu nende liihe, nakhola viloleshitsu nende vindu viu khuchenyinya, khandi nachila vindu viu khurishitsa nivikholekha. 35Mwamanyinywa vindu vienevo khu mumanye ndi Mwami Nyasaye neye Nyasaye; wundi avulakhuho khuli ye. 36Yachila numuhulila mwoyo kwekwe khurula mwikulu, khumuchelihitsa khulondokhana khu ka munyala khukhola. Yachila numulola mulilu kwekwe kwi tsingulu khulilova, lwa mwahulilanga nalomoloma khurula mu mulilu kwenoko; 37Yarovola munyi vitsukhulu vavo, shichila yali wayaanza vakuuka venyu. Yamurulitsa mu shivala shia Misri khuvirila khu tsingulu tsietsie tsiu khuchenyinya. 38Yakhunganyinya vandu vi tsimbia tsindi tsi tsingulu tsinyishi khuvira tsienyu; lwa mwisuundanga, khumwinjilitsamu nu khumuha shivala shiavo, nishili shivala shia mumenyamu nunundi. 39Nu vulahi numumanyi nunundi khandi muvuli khwivilila ndi Mwami Nyasaye neye Nyasaye wu mwikulu nende lilova. Khuvulakhuho nyasaye wundi. 40Mulonde mivaalo nende malako keke koosi kamwechitsanga nunundi, mumenye limenya lilahi, munyi nende vitsukhulu venyu; khandi mutsililile khumenya mu shivala shiu Mwami Nyasaye, uli Nyasaye wenyu amuheetsanga mumenyemu mihika ni mihika.”

Mataala Kukhwilushilamu Ivukwi wu Muchela kwa Yorodani

41Nalwo lwa Musa yahula haluveka mataala kavaka khuluveka luli khuluveka luli ivukwi wu Muchela kwa Yorodani 42ku mundu anyala khwilushilamu nu khuvulwa khwiirwa, nikava aliitsa khwitsukhana niyiiri mundu ukhalolekhanga nu mutsiku wewe; anyala khwilushila mu litaala lilala khu mataala kenako nu khuvulwa khwiirwa. 43Vandu vuluhia lwa Rubeni vaheelwa litaala lia Bezeri, lili mu shivala shichingukha mu shiangalangwi. Vandu vuluhia lwa Gadi vaheelwa litaala lia Ramotsi mu lusomo lwa Gileadi; vandu vuluhia lwa Manaase vaheelwa litaala lia Golani mu lusomo lwa Bashani.

Khuranga Khukhuhaana Malako ka Nyasaye

44Musa yechitsa Vaisraeli malako. 45Yaka nako mechitso, mivaalo nende Malako ka Musa yechitsa Vaisraeli, lwa vali nivakharula mu shivala shia Misri; 46nivali mu luhoongo luli ivukwi wu Muchela kwa Yorodani, himbi mu litaala lia Betsi-pehori. Kakholeshela mu shivala shiu Mwami Sihoni wa Vaamori, wamihanga nali mu litaala lia Heshiboni, wa Musa nende Vaisraeli vakuura, nivakharula mu shivala shia Misri. 47Vavukula shivala shieshie nivamenyamu, khandi shivala shiu Mwami Ogu wa Bashani, vami vavili va Vaamori vamihanga khuluveka luli ivukwi wu Muchela kwa Yorodani. 48Shivala shienesho shiali shiavambalala khuraanjila mu litaala lia Aroheri, khundulu khu Muchela kwa Arunoni, khutikulukha ivuluka khutsia khutukha khu Shikulu shia Sirioni, nakhwo khuvoola, Shikulu shia Herimoni. 49Shialimu khandi nu lusomo khuluveka luli ivukwi wu Muchela kwa Yorodani, khutukha khu Inyanza yi Likhutsa khuluveka luli ikuvanda, khandi hasi hi Shikulu shia Pisiga khuluveka luli ivukwi.

Currently Selected:

LITSUSHITSWA 4: LLLPRO

Highlight

Copy

Compare