AROMA 9
9
1NĨ ũhoro wa ma ngwaria ndĩ mũndũ wĩ thĩinĩ wa Kristo; ti maheni ndĩraaria; o nayo thamiri yakwa nĩyo mũira wakwa, nĩ ũndũ wa gũikarũo nĩ Roho Mũtheru, 2atĩ ndũire ndĩ na kĩeha kĩnene, na ngoro yakwa ndĩthiragwo nĩ ruo. 3Amu njiguaga ta ingĩendire niĩ mwene njikio na kĩano nyingatwo harĩ Kristo ithenya rĩa andũ a mũhĩrĩga witũ, o acio tũrĩ a rũrĩra rũmwe nao ha ũhoro wa mũciarĩre. 4#Thama 4.22.Nĩo Aisiraeli; na nĩo Ngai aatuire ciana ciake, na nĩo maikaraga na riri ũrĩa wake, nacio irĩkanĩro nĩ ciao, na kũheo maathani, o na ũtungatĩri wa magongona, nacio ciĩranĩro nĩo merĩirũo. 5Ningĩ maithe maitũ arĩa a tene maarĩ a kĩruka kĩu, o na Kristo nake, ha ũhoro wa mwĩrĩ, no wakĩo, nake nĩwe ũrĩ igũrũ rĩa maũndũ mothe, akĩrĩ we Ngai, o we ũtũũraga e mũgathe tene na tene. Amen.
6No ti atĩ uuge wa Ngai nĩũthahĩte ũgatuĩka wa tũhũ. Nĩ ũndũ-rĩ, andũ arĩa marĩ a Isiraeli gũciarũo, ti atĩ othe nĩ Aisiraeli a ma: 7#Kĩam 21.12.ningĩ ti atĩ othe nĩ ciana cia Iburahimu no ũndũ wa gũtuĩka atĩ nĩ a mbeũ yake, no rĩrĩ, ũrĩa erirũo nĩ ũũ: Thĩinĩ wa Isaaka nĩho mbeũ ĩrĩ, ĩrĩa ĩrĩĩtanagio nawe. 8Ũguo nĩ ta kuuga atĩrĩ, atĩ ti ciana iria njiare na mũciarĩre wa mwĩrĩ ingĩtuĩka cia Ngai, no rĩrĩ, ciana iria cia kĩĩranĩro, nĩcio cia gũtuwo mbeũ ĩrĩa ya ma. 9#Kĩam 18.10.Amu-rĩ, kiugo gĩa kĩĩranĩro nĩ gĩkĩ, atĩrĩ, Ihinda rĩrĩ rĩa mwaka rĩakomanĩria, nĩrĩo ngacoka gũũka, nake Sara nĩakagĩa na kahĩĩ. 10Na to ũguo wiki, no rĩrĩ ningĩ, Rebeka o nake, rĩrĩa aarĩkirie kũgĩa ihu rĩa mũthuri ũmwe, nake nĩwe ithe witũ Isaaka-rĩ, 11#Kĩam 25.23.o na ciana icio itanaciarũo, kana igakorũo ciĩkĩte ũndũ o na ũmwe mwega kana mũũru-nĩ getha ũhoro ũcio mũthugunde nĩ Ngai wa gwĩthurĩra andũ ũrũme, gũtikanatuĩke atĩ marĩthuragwo nĩ ũndũ wa maũndũ marĩa mekĩte, tiga o ũndũ wa kwenda kwa ũcio mũmeti-rĩ, - 12o hĩndĩ ĩo Rebeka ũcio akĩĩrũo atĩrĩ, Ũrĩa mũkũrũ agatuĩka ngombo ya ũrĩa mũnyinyi. 13#Mal 1.2,3.Naguo ũguo no ta ũrĩa haandĩkĩtwo atĩrĩ, Nĩ Jakubu ndendete, na Esau ngamũthũũra.
14Tũkiuge atĩa nĩ ũndũ wa ũhoro ũcio? Ngai nĩangĩgĩtua ũndũ ũtarĩ wa kĩhooto? Hĩ, kũroaga gũtuĩka ũguo! 15#Thama 33.19.Amu-rĩ, ũrĩa erire Musa nĩ atĩrĩ, Nĩndĩrĩiguagĩra mũndũ tha o ũrĩa ndenda kũiguĩra tha, na gũcaĩra ndĩĩcayagĩra o ũrĩa ndenda gũcaĩra. 16Tondũ ũcio-rĩ, ũguo nduonekaga nĩ ũndũ wa ũrĩa mũndũ ekwenda, kana wa ũrĩa mũndũ erutanagĩria, no nĩ ũndũ wa ũrĩa Ngai aiguanagĩra tha. 17#Thama 9.16.Amu ningĩ, Maandĩko-inĩ Firauni ekwĩrũo atĩrĩ, Ũndũ o ũcio kĩũmbe nĩguo watũmire ngũtũũgĩrie, atĩ nĩguo nyonanie hinya wakwa na ũndũ waku, nayo ngumo ya rĩĩtwa rĩakwa ĩhunjio thĩ yothe. 18Ũguo-rĩ, gũgakĩoneka atĩ nĩaiguagĩra tha o ũrĩa enda kũiguĩra, ningĩ ũrĩa enda kũũmia ngoro, ũcio akamũũmia.
19Nĩ ũndũ wa ũhoro ũcio-rĩ, wee no gũkĩnjũria atĩrĩ, Nĩ kĩ gĩgĩtũmaga atũũre atetanagia? Nĩ mũndũ ũrĩkũ ũkĩregete gwĩka o ta ũrĩa Ngai ekwenda? 20#Isa 29.16; 45.9.Ai! mũndũ ũyũ, kaĩ wee arĩ wee ũ, ũrenda gũcokanĩria na Ngai? Kĩndũ kĩombirũo-rĩ, gĩakĩhota kũũria mũkĩũmbi, Wa’thondekire ũũ nĩkĩ? 21Mũũmbi wa nyũngũ nake-rĩ, githĩ ndarĩ na hinya eke o ũrĩa ekwenda na rĩũmba rĩu ombaga; ngũmba o ĩmwe athondeke kĩenyũ kĩmwe kĩayo gĩtuĩke kĩndũ gĩa gũtĩwo, na kĩngĩ gĩtuĩke kĩndũ gĩtarĩ gĩa gũtĩwo? 22Ĩ kũngĩgĩkorũo atĩrĩ, atĩ Ngai, o na akĩendaga kuonania marakara make, na amenyithanie hinya wake, nĩ gũkirĩrĩria atũire akirĩrĩirie na gĩeterero kĩnene andũ arĩa matariĩ ta nyũngũ iria cia kũrakarĩrũo, iria ciagĩrĩire o kũũragwo? 23O na ningĩ ageka ũguo nĩ getha ahote kũmenyithania ũrĩa riri wake ũingĩhĩte ũtugi, ũgĩtugaga arĩa mahaana ta nyũngũ iria njiguĩre tha, arĩa aathagathagire o tene matuĩke a gũkagĩa na riri ũcio? 24na nĩo ithuĩ, o ithuĩ arĩa etire, na to gwĩta aatwĩtire tũrĩ Ayahudi oiki, no rĩrĩ, tũrĩ andũ a Ndũrĩrĩ o nao. 25#Hos 2.23.Naguo ũguo no ta ũrĩa oigĩte ibuku-inĩ rĩa Hosea, atĩrĩ:
Kĩrĩndĩ kĩrĩa gĩtaarĩ gĩakwa, nĩkĩo ngeta kĩrĩndĩ gĩakwa;
mũtumia ũrĩa ũtaarĩ mwende, nĩwe ngeta mwendwa wakwa.
26 #
Hos 1.10. Na gũgatuĩka atĩrĩ, atĩ kũndũ o kũrĩa merirũo, Inyuĩ mũtirĩ andũ akwa-rĩ,
kũu nĩkuo magetagwo ariũ a Ngai ũrĩa wĩ muoyo.
27 #
Isa 10.22,23. Ningĩ ha ũhoro wa Isiraeli-rĩ, Isaia ekwanĩrĩra akoiga ũũ:
O na kũngĩtuĩka atĩ ciana cia Isiraeli igĩtarũo ciigana ta mũthanga wa iria-inĩ rĩrĩa inene-rĩ, no matigari macio makahonoka:
28nĩ ũndũ Mwathani nĩakahingia ũhoro ũrĩa atuĩte, woneke o gũkũ thĩ, aũrĩkie narua ategũtindĩrĩra.
29 #
Isa 1.9. Na no ta ũrĩa Isaia oigĩte mbere ũndũ ũcio ũtanakinya, atĩrĩ: Guca Mwathani, Mũnene wa ita, aatũtigĩirie mbeũ-rĩ, tũngĩatuĩkire ta Sodomu, tũngĩakĩhaananirio na Gomora.
30Tũkiuge atĩa nĩ ũndũ wa ũhoro ũcio? No tuuge atĩrĩ, atĩ andũ a Ndũrĩrĩ, o na mataathingatanaga na ũthingu-rĩ, o nĩmaaũkinyĩrĩire, magĩkĩgĩa na ũthingu ũrĩa ũgĩagwo naguo nĩ ũndũ wa gwĩtĩkia, 31no atĩ andũ a Isiraeli, o na maatũire mathingatanĩte na watho wa gũtũma matuĩke athingu, o-rĩ, makĩaga gũkinyĩrĩra watho ũcio. 32Nĩ ũndũ kĩ? Nĩ ũndũ rĩrĩ, matiaũcaragia na njĩra ya wĩtĩkio, no maũcaragia moĩ woneka na njĩra ya gwĩka maũndũ. Andũ acio-rĩ, nĩmaagũithirio nĩ ihiga rĩrĩa rĩgũithanagia, 33#Isa 28.16.o ta ũrĩa kwandĩkĩtwo,
Atĩrĩrĩ, nĩ kũiga ngũiga Zayuni ihiga rĩa kũgũithania, o ihiga rĩa kũhĩngithania;
Nake ũrĩa ũrĩkoragwo amwĩhokete ndarĩ hĩndĩ agaconorithio.
Currently Selected:
AROMA 9: OGKBIBLE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
