AROMA 8

1TONDŨ wa maũndũ macio rĩ, rĩu andũ arĩa me thĩinĩ wa Kristo Jesu ti a gũtuĩrũo atĩ nĩ ehia o na hanini. 2Amu watho wa Roho, ũrĩa ũtũmaga tuone muoyo harĩ Kristo Jesu, guo nĩwakĩnjohorire ndige gũikara njohetwo nĩ watho ũrĩa werekagĩria harĩ ũhoro wa wĩhia na gĩkuũ. 3Nĩ gũkorũo ũndũ ũrĩa ũtangĩahotekire nĩ watho ũcio, nĩ ũndũ wa kwagithio hinya nĩ ũhoro wa mwĩrĩ-rĩ, Ngai nĩaawĩkire nĩ kũrekia Mũrũwe o ũrĩa wake mwene, arĩ na mwĩrĩ ũhaanaine na ĩno iitũ ya wĩhia, atĩ we atuĩke thĩnjo nĩ ũndũ wa wĩhia; agĩgĩtua cira na njĩra ĩo atĩ ũhoro wa wĩhia ũtorio mĩĩrĩ-inĩ ya andũ: 4nĩ getha ũthingu ũrĩa mwathane watho-inĩ ũhingio thĩinĩ witũ, ithuĩ tũtatwaranaga na ũhoro wa mwĩrĩ, tiga ũrĩa wa Roho. 5Nĩ gũkorũo andũ arĩa marũmagĩrĩra ũhoro wa mwĩrĩ, nĩ maũndũ ma mwĩrĩ meciragia: no andũ arĩa marũmagĩrĩra ũhoro wa Roho, acio meciragia maũndũ ma Roho. 6Amu kũrũmĩrĩra meciria marĩa moimanaga na mwĩrĩ kũrehanagĩre gĩkuũ: no rĩrĩ, kũrũmĩrĩra meciria marĩa moimaga kwĩ Roho kũrehanagĩre muoyo, o na thayũ. 7Nĩ gũkorũo meciria marĩa moimanaga na mwĩrĩ matũũraga marĩ ũthũ na Ngai, nĩ ũndũ matiathĩkagĩra watho wa Ngai, o na kũhota matingĩhota: 8nao andũ arĩa matũire marũmagĩrĩra ũhoro wa mwĩrĩ matingĩhota gũkenia Ngai. 9No inyuĩ-rĩ, mũtitũire mũrũmĩrĩire ũhoro wa mwĩrĩ; mũrũmĩrĩire ũhoro wa Roho, akorũo Roho wa Ngai nĩwe ũtũũraga ngoro-inĩ cianyu. No rĩrĩ, mũndũ o wothe ũtarĩ na Roho wa Kristo, mũndũ ũcio-rĩ, ti wake. 10Na rĩrĩ, akorũo we Kristo nĩatũire ngoro-inĩ cianyu-rĩ, o na gwagĩtuĩka atĩ mĩĩrĩ yanyu nĩ mĩkuũ nĩ ũndũ wa wĩhia, maroho manyu-rĩ, mo nĩ magĩu muoyo nĩ ũndũ wa ũthingu. 11#1 Kor 3.16.Na ningĩ, akorũo Roho wa Ũrĩa wariũkirie Jesu oime kũrĩ arĩa akuũ atũũraga ngoro-inĩ cianyu-rĩ, Ũcio wariũkirie Kristo Jesu oime kũrĩ arĩa akuũ no agatũma mĩĩrĩ yanyu ĩo ya gũkua ĩgĩe na muoyo o nayo, ĩgĩe naguo nĩ ũndũ wa Roho wake ũcio ũtũire ngoro-inĩ cianyu.

12Tondũ ũcio, ariũ a Ithe witũ-rĩ, ti mĩĩrĩ iitũ tũrĩ na thirĩ nayo, atĩ nĩguo tũtwaranage na maũndũ mayo: 13nĩ ũndũ mũngĩtũũra mũtwaranaga na maũndũ ma mwĩrĩ-rĩ, no mũhaka mũgakua; no mwatũũra mwĩgiragia ciĩko icio cia mwĩrĩ na hinya wa Roho, o ta arĩ gũciũraga rĩ, no mũtũũre muoyo. 14Nĩ gũkorũo andũ arĩa othe matongoragio nĩ Roho wa Ngai, acio nĩo ciana cia Ngai. 15#Gal 4.5-7.#Mar 14.36; Gal 4.6.Amu mũtiaheirũo roho wa gũtũma mũcoke kũigua ta mũrĩ ngombo, mwĩtigagĩre; mwaheirũo roho wa gũtũma mũmenye atĩ mũrĩ ciana ciake cia kwĩrererũo, na nĩguo ũtũmaga twanĩrĩre tũkoiga, Abba,#8.15 Abba: rora kohoro kaandĩkĩtwo Mat 14.36. Baba! 16Roho Mũtheru we mwene nĩwe mũira, hamwe na maroho maitũ, wa gũtũmenyithia atĩ tũrĩ ciana cia Ngai: 17na rĩrĩ, akorũo tũrĩ ciana ciake, ningĩ tũrĩ agai, o agai a Ngai, tũgagĩtuĩka tũrĩ a gũkagayanĩrio hamwe na Kristo, ũguo nĩguo tũtariĩ kũngĩgĩtuĩka atĩ nĩtũnyamarĩkanagĩra nake, nĩ getha tũkahota o na kũgwatanĩra riri nake.

18Amu-rĩ, ngũkĩona atĩ mĩnyamaro ĩrĩa tũgĩaga nayo hingo ĩno tũrĩ ndĩrĩ kĩene o na hanini ĩkĩgerekanio na riri ũrĩa tũkiriĩ kũguũrĩrio ũtuĩke witũ. 19Tondũ indo ciothe iria ciombirũo itũire o cietereire kũguũranĩrio gwa ciana cia Ngai, igĩcũthagĩrĩria irĩ na mĩĩto mĩnene. 20#Kĩam 3.17-19.Nĩ ũndũ ciũmbe icio, na tondũ ciathĩrĩirio atĩ itũũre ciagĩte kĩene-rĩ, itiathĩrĩirio ũguo ciĩyendeire cio nyene, no nĩ ũndũ wa Ũrĩa waciathĩrĩirie ciikare ũguo, kũrĩ na wĩrĩgĩrĩro; 21tondũ-rĩ, ciũmbe icio, cio nyene, no ikohorũo ciume ũkombo-inĩ wa ũhoro wa kũbutha ikinye ũhoro-inĩ ũrĩa ũtarĩ wa ũkombo o na hanini, o ũrĩa ũkonainie na riri ũrĩa ũkaheo ciana cia Ngai. 22Amu nĩtũũĩ atĩ ciũmbe icio ciothe o nginya rĩu itũire icayaga o hamwe, ikĩiguaga ruo ta rũa mũndũ-wa-nja akĩrũmwo. 23#2 Kor 5.2-4.Na tocio ciiki, no rĩrĩ, ithuĩ o na ithuĩ, arĩa tũrĩ na mũtũrio wa maciaro ma Roho, ithuene no tũcayaga ngoro-inĩ ciitũ thĩinĩ, o twetereire hĩndĩ ĩkinye ĩrĩa tũgakorũo tũtuĩtwo ciana cia Ngai, na nĩyo hĩndĩ ĩrĩa mĩĩrĩ iitũ ĩgakũũrũo ũkombo-inĩ. 24Nĩ ũndũ-rĩ, twahonokirio harĩ na wĩrĩgĩrĩro: no rĩrĩ, kwĩrĩgĩrĩra kĩndũ kĩoneku-rĩ, kũu ti kwĩrĩgĩrĩra kũrĩ; amu kĩndũ mũndũ ekuona-rĩ, aagĩcoka gũkĩĩrĩgĩrĩra atĩa? 25No twakorũo nĩtwĩrĩgĩrĩire kĩndũ tũtekuona-rĩ, hĩndĩ ĩo nĩ gweterera tũgĩetagĩrĩra o tũkirĩrĩirie.

26O ũndũ ũmwe, Roho nake nĩatũgwatagĩrĩra nĩ ũndũ wa ũrĩa tũtarĩ na hinya: nĩ gũtuĩka tũtikoragwo tũũĩ ũrĩa twagĩrĩirũo nĩ kũhoya; no Roho we mwene nĩwe ũtũthaithanagĩrĩra na mũcayo ũtangĩheanĩka na ciugo: 27nake Ũrĩa ũtuĩragia ngoro cia andũ nĩamenyaga ũrĩa Roho ekwenda kuuga, nĩ gũkorũo athaithanagĩrĩra andũ arĩa aamũre kũringana o na ũrĩa Ngai endete. 28Ningĩ nĩtũũĩ atĩ harĩ andũ arĩa menda Ngai, nĩo arĩa metĩtwo nĩwe kũringana na ũrĩa aathugundire eke-rĩ, maũndũ mothe nĩmateithanagia hamwe mamarehagĩre kĩrathimo. 29Nĩ gũkorũo andũ arĩa emenyeire o tene nĩo orereire o tene matuĩke a kũhaananio na ũrĩa Mũrũwe atariĩ, nĩ getha ũcio atuĩke irigithathi rĩa andũ aingĩ a Ithe ũmwe. 30Nao acio orereire ũguo o tene nĩo ningĩ etire; nao acio etire, ningĩ nĩo aatuire athingu; nao acio aatuire athingu, nĩo ningĩ ekĩrire riri.

31Tũkiuge atĩa tondũ wa maũndũ macio? Akorũo Ngai arĩ mwena witũ-rĩ, nũ ũngĩkĩhota gũtũtuma ũthũ? 32Ũcio ũtaigana gũcaĩra Mũriũ wake mwene-rĩ, tiga o kũmũruta aamũrutire nĩ ũndũ witũ ithuothe-rĩ, agĩtũheete Ũcio, angĩkĩrega atĩa gũtũtugaga na indo iria ingĩ ciothe? 33Atĩrĩrĩ, andũ arĩa Ngai ethurĩire-rĩ, nũ ũngĩona ũndũ angĩmathitakĩra? Githĩ ti Ngai mũmatui athingu? 34Nũ ũngĩhota kũmatua ehia? Githĩ ti Kristo Jesu wakuire, o na makĩria akĩriũkio oime kũrĩ arĩa akuũ, na rĩu atũire guoko-inĩ kwa ũrĩo kwa Ngai, o na nĩwe ũtũthaithanagĩrĩra? 35Nũ ũngĩtũtigithũkania na wendani wa Kristo? Anga nĩ kuona thĩna, kana kwĩhĩrũo nĩ ruo, kana kũnyarirũo, kana ng’aragu, kana kwaga nguo, kana ũgwati, kana rũhiũ rũa njora? 36#Thab 44.22.O ta ũrĩa haandĩkĩtwo rĩ,

Tũtindaga tũkĩũragwo mũthenya wothe nĩ ũndũ waku;

tũtuagwo ta igondu cia gũthĩnjwo.

37No rĩrĩ, o na tũkĩonaga maũndũ macio mothe-rĩ, gũtoria tũrĩ atoria o: makĩria nĩ ũndũ wa Ũcio watwendire. 38Amu nĩndĩkĩtie kũmenya mũno, atĩ o na kũngĩtuĩka nĩ ũhoro wa gũkua, kana wa gũtũũra muoyo; o na kana araika, kana monene ma na kũu igũrũ; o na kana maũndũ marĩa me ho rĩu, kana marĩa magoka; o na kana mahinya o na marĩkũ, 39gwata ũraihu wa kũrĩa gũthiĩte na igũrũ mũno, kana ũriku wa kũrĩa gũthiĩte na thĩ mũno; o na kana kĩndũ kĩngĩ o kĩrĩkũ kĩa iria ciothe ciombirũo-rĩ; hatirĩ o na kĩmwe kĩngĩkĩhota gũtũtigithũkania na wendani wa Ngai, o ũcio wĩ na Kristo Jesu Mwathani witũ.

Currently Selected:

AROMA 8: OGKBIBLE

Highlight

Copy