AROMA 7

1ATĨRĨRĨ, ariũ a Ithe witũ, nĩngarĩ mũngĩrigwo nĩ ũhoro wa watho (amu nĩ kwaria ndĩraaria na andũ arĩa moĩ maũndũ maguo-rĩ), atĩ watho wathaga mũndũ o hĩndĩ ĩrĩa yothe akoragwo arĩ muoyo? 2Amu mũtumia o wothe ũrĩa wĩ na mũrũme-rĩ, aikaraga mohanĩtio na mũthuriwe nĩ watho o hĩndĩ ĩrĩa mũthuri ũcio e muoyo; no rĩrĩ, mũthuri angĩkorũo nĩaakua-rĩ, mũtumia ũcio nĩaatigithũkana na watho ũcio ũramuohithanĩtie na mũthuriwe. 3Tondũ ũcio rĩ, angĩtuĩka wa mũndũ mũrũme ũngĩ hĩndĩ ĩo mũthuriwe e muoyo, mũtumia ũcio no atuwo mũtharia; no rĩrĩ, mũthuriwe angĩkorũo nĩakuĩte-rĩ, hĩndĩ ĩo arĩikaraga ta ohoretwo harĩ watho ũcio; o na angĩhikio nĩ mũndũ ũngĩ-rĩ, mũtumia ũcio ndangĩtuĩka mũtharia. 4O ũguo na inyuĩ, ariũ a Awa-rĩ, nĩmwatũmirũo mũtuĩke akuũ harĩ ũhoro wa watho na njĩra ya gũkua kwa mwĩrĩ wa Kristo, nĩ getha mũcoke mũtuĩke a mũndũ ũngĩ, o We ũrĩa wariũkire, akiuma kũrĩ arĩa akuũ, nĩguo tũciaragĩre Ngai maciaro. 5Tondũ-rĩ, hĩndĩ ĩrĩa twatũire tũrũmagĩrĩra ũhoro wa mwĩrĩ, merirĩria ma hinya marĩa moimaga mehia, o mo merirĩria marĩa maarahũragwo nĩ watho rĩ, maaikaraga o magĩthugundaga maũndũ mamo thĩinĩ wa ciĩga ciitũ, nĩ getha maciaragĩre gĩkuũ maciaro arĩ kĩo. 6No rĩu tũikaraga tũrĩ atigithanie na watho ũcio, nĩ ũndũ wa ũrĩa twakuire tũgĩthenga harĩ ũhoro ũcio watũnyitĩte, na tondũ ũcio tũgagĩtũũra tũtungataga na mũtungatĩre mwerũ, wa Roho, tiga mũtungatĩre ũcio wa tene wa gũtungatagĩra maũndũ marĩa maandĩke.

7 # Thama 20.17; Gũcok 5.21. Gwakĩhaana ũguo rĩ, tũkiuge atĩa? Githĩ watho nĩ ũndũ ũmwe na wĩhia? Hĩ, kũroaga gũtuĩka ũguo! No rĩrĩ, thengia watho rĩ, ndingĩamenyire ũhoro wa wĩhia: amu gũcumĩkĩra, ndingĩakĩmenyire ũhoro wakuo thengia watho woigire, Ndũkanacumĩkĩre kĩndũ kĩene. 8Ĩndĩ wĩhia, tondũ wa gũkĩona kamweke nĩ ũndũ wa rĩathani rĩu, ũgĩgĩthugunda ũcumĩkĩri wa mĩthemba yothe thĩinĩ wakwa, amu gũtarĩ watho-rĩ, wĩhia no ta mũkuũ. 9Kwĩ hingo niĩ ndarĩ muoyo itaamenyete watho, no rĩrĩa rĩathani rĩokire, ũhoro ũcio wa wĩhia ũkĩriũka, na niĩ-rĩ, hĩndĩ ĩo nĩ gũkua ndakuire; 10narĩo rĩathani-rĩ, o rĩu rĩarĩ rĩa gũtũma mũndũ atũũre muoyo, ngĩkora nĩ rĩa gũtũma akue. 11#Kĩam 3.13.Amu ũhoro wa wĩhia, tondũ wa kuona kamweke nĩ ũndũ wa rĩathani rĩu, nĩ kũ’henia wa’henirie, ũgĩkĩnjũraga narĩo. 12Gũgagĩtuĩka atĩ watho, guo nĩ mũtheru, o narĩo rĩathani no rĩtheru, na nĩ rĩa ũthingu, na nĩ rĩega.

13Hau nĩ atĩa? Kaĩ akĩrĩ kĩndũ kĩega gĩatũmire ngue? Hĩ, kũroaga gũtuĩka ũguo! No rĩrĩ, wĩhia nĩguo watũmire ngue, nĩ getha wonekane wega atĩ no wĩhia, nĩ kũndehere gĩkuũ na njĩra ya kĩndũ kĩu kĩega; nĩguo wĩhia ũtuĩke kĩndũ kĩaganu o makĩria nĩ ũndũ wa rĩathani rĩu. 14Nĩ gũkorũo nĩtũũĩ atĩ watho nĩ ũndũ uumanĩte na Roho, no niĩ-rĩ, ndĩ wa gĩthemba kĩa mwĩrĩ, ngakĩenderio ũhoro ũcio wa wĩhia ngatuĩka ngombo yaguo. 15#Gal 5.17.Amu maũndũ marĩa njĩkaga ndikoragwo ngĩmenya: tondũ-rĩ, ũrĩa ingĩenda gwĩka tiguo njĩkaga, ĩndĩ ũndũ ũrĩa ’thũire, nĩguo ngoragwo ngĩĩka. 16Na rĩrĩ, ndagĩtuĩka atĩ ũrĩa ngoragwo ngĩĩka nĩ ũrĩa itangĩenda gwĩka-rĩ, githĩ ti gwĩtĩkĩra njĩtĩkĩrĩte atĩ watho wa Ngai nĩ mwega? 17Tondũ ũcio-rĩ, nĩgwatiga gũtuĩka atĩ nĩ niĩ njĩkaga maũndũ macio, no nĩ ũhoro wa wĩhia ũmekaga, ũrĩa ũtũire thĩinĩ wakwa. 18Nĩ gũkorũo nĩnjũĩ atĩ thĩinĩ wakwa (ũguo nĩ ta kuuga thĩinĩ wa mwĩrĩ wakwa) gũtitũũraga ũndũ o na ũmwe mwega: amu-rĩ, kwenda nĩnyendaga gwĩka maũndũ marĩa mega, no hinya wa kũmeka nĩguo itarĩ. 19Nĩ gũkorũo wega ũrĩa nyendaga gwĩka, nĩguo itekaga: no rĩrĩ, ũũru ũrĩa itangĩenda gwĩka, nĩguo njĩkaga. 20No rĩrĩ, ndagĩkorũo atĩ maũndũ marĩa ngoragwo ngĩĩka nĩ marĩa itangĩenda gwĩka-rĩ, gũtingĩcoka gũtuĩka atĩ nĩ niĩ njĩkaga maũndũ macio, no gũtuĩke atĩ nĩ ũhoro wa wĩhia ũmekaga, ũrĩa ũtũire thĩinĩ wakwa. 21Tondũ wa ũguo, ha ũhoro wa watho rĩ, nĩnyonaga atĩrĩ, atĩ o na ngĩendaga gwĩka wega-rĩ, ũũru nĩũkoragwo ũnjikairie. 22Amu-rĩ, ngoro-inĩ yakwa thĩinĩ nĩngenagĩra watho wa Ngai: 23no rĩrĩ, ciĩga-inĩ ciakwa, nĩnyonaga kwĩ watho ũngĩ, ũrĩa ũrũaga na watho ũcio mũgathe nĩ meciria makwa, ũkandaha ũkandua ngombo ya watho wa ũhoro wa wĩhia ũrĩa ũrĩ thĩinĩ wa ciĩga ciakwa. 24Ĩiya wakwa-ĩ, niĩ mũthĩnĩki mũno-ĩ! Nũ ũngĩkĩ’honokia harĩ mwĩrĩ ũyũ wa gĩkuũ? 25Nĩndacokeria Ngai ngatho nĩ ũndũ wa Jesu Kristo Mwathani witũ! Gũgagĩtuĩka atĩrĩ, atĩ niĩ mwene, ha ũhoro wa meciria, ndũire ndungatagĩra watho wa Ngai, no rĩrĩ, ha ũhoro wa mwĩrĩ, ndĩ ndungata ya watho wa ũhoro wa wĩhia.

Currently Selected:

AROMA 7: OGKBIBLE

Highlight

Copy