AROMA 6

1HAKĨRĨ ũguo, tũkiuge atĩa? Nĩtũtũũre o twĩhagia nĩguo Wega wa Ngai ũingĩhage? Hĩ, tũroaga gwĩka ũguo! 2Kaĩ ithuĩ arĩa twakuire, tũgĩthenga ũhoro-inĩ wa kwĩhia o gũthenga-rĩ, tũngĩgĩtũũra atĩa o twĩhagia? 3Kaĩ mũtoĩ atĩ ithuothe arĩa twabatithirio tũtonyio thĩinĩ wa Kristo Jesu twabatithirio tũtonyio thĩinĩ wa gũkua gwake? 4#Kol 2.12.Tondũ ũcio-rĩ, twabatithio, nĩ gũthikwo twathikirũo hamwe nake gĩkuũ-inĩ kĩu: nĩ getha atĩ, o ta ũrĩa Kristo aariũkirio agĩkiuma kũrĩ arĩa akuũ nĩ hinya wa riri wa Ithe, ithuĩ na ithuĩ tũtũũre na mĩtũũrĩre ya muoyo mwerũ. 5Amu twagĩkorũo nĩ gũciarithanio tũciarithanĩtio nake na kĩgerekanio kĩu gĩa gũkua gwake-rĩ, no taguo tũgũtũũra tũciarithanĩtio nake na kĩgerekanio gĩa kũriũka gwake o nakuo. 6Tondũ nĩtũũĩ ũũ, atĩ ũmũndũ witũ wa kĩĩmerera nĩwaambanĩirio nake mũtĩ igũrũ, nĩ getha mwĩrĩ ũrĩa wa wĩhia ũninwo, nĩguo tũtikanacoke gũtuĩka ngombo cia wĩhia; 7nĩ gũkorũo mũndũ ũrĩkĩtie gũkua ũguo nĩatuĩtwo mũthingu agatigithanio na wĩhia. 8Na rĩrĩ, twagĩkorũo nĩ gũkua twakuire hamwe na Kristo, nĩtũgwĩtĩkia atĩ o na gũtũũra tũrĩ a gũtũũra muoyo hamwe nake. 9Amu nĩtũũĩ atĩ Kristo, tondũ nĩaariũkirio akiuma kũrĩ arĩa akuũ-rĩ, ndarĩ hingo agacoka gũkua; we-rĩ, gĩkuũ gĩtirĩ na hinya wa gũkanamwatha rĩngĩ. 10Nĩ gũkorũo gũkua kũu aakuire, aakuĩrĩire ũhoro wa wĩhia o rĩmwe rĩa kũigana, agĩthenga harĩ guo o gũthenga: no rĩrĩ, muoyo ũrĩa atũũraga rĩu, atũũraga mũtũũrĩre werekeire o Ngai. 11Na inyuĩ, o ũndũ ũmwe, wĩonagei ta arĩ gũkua mũkuĩrĩire ũhoro wa wĩhia mũthenge harĩ guo, naguo muoyo ũcio mwĩ naguo mũtue atĩ mũrĩ a gũtũũra mũtũũrĩre werekeire o Ngai, mwĩ thĩinĩ wa Kristo Jesu.

12Tondũ ũcio-rĩ, mũtikanareke ũhoro wa wĩhia ũthamakagĩre mĩĩrĩ yanyu ĩo ĩkuaga, atĩ nĩguo mwathĩkage nĩ merirĩria mayo, 13na mũtigakĩneanage ciĩga cianyu harĩ ũhoro ũcio wa wĩhia atĩ ituĩke ta indo ciaguo cia ita cia kwagana nacio: no rĩrĩ, wĩheanei harĩ Ngai, ta andũ maakuire na rĩu mwĩ muoyo, muumĩte gĩkuũ-inĩ; nacio ciĩga cianyu mũgĩciheane o harĩ Ngai ituĩke ta indo cia ita cia gwĩkaga maũndũ ma ũthingu nacio. 14Nĩ ũndũ-rĩ, ũhoro wa wĩhia ndũgacoka kũgĩa na hinya wa kũmwatha, nĩ gũkorũo rĩu mũtirĩ a gũthamakagĩrũo nĩ watho, mũrĩ a gũthamakagĩrũo nĩ Wega wa Ngai.

15Gwatuĩka ũguo-rĩ, tũkiuge atĩa? Nĩtũtũũre twĩhagia nĩ ũndũ wa ũrĩa tũtarĩ a gũthamakagĩrũo nĩ watho, tiga o Wega wa Ngai? Hĩ! tũroaga gwĩka ũguo! 16Kaĩ mũtegũkĩmenya atĩ mũndũ o ũrĩa mũngĩĩheana harĩ we atĩ mũtuĩke ngombo mwathĩkage nĩwe - o ũcio mwathĩkaga nĩwe, mũrĩ o ngombo ciake, o na kũngĩtuĩka nĩ ngombo cia ũhoro wa wĩhia, ũrĩa ũtũmaga mũndũ akue, kana ngombo cia ũhoro wa gwathĩka nĩ Ngai, ũrĩa ũtũmaga mũndũ atuwo mũthingu? 17No rĩrĩ, Ngai arocokerio ngatho nĩ ũndũ, o na mwakorũo atĩ mbere mwarĩ ngombo cia wĩhia, nĩmwacokire gũtuĩka a gwathĩkĩra na ngoro ũrutani ũrĩa mwanengerirũo mũtuĩke aguo, 18na mwakĩrĩkia kuohorũo muume ũkombo-inĩ wa wĩhia, mũgĩcoka mũgĩtuĩka ngombo cia ũthingu. 19Nĩ kũmũhe ndĩramũhe ũhoro ngĩũgerekanagia na maũndũ ma andũ, nĩ ũndũ wa wagi-hinya wanyu wa ũmwĩrĩ. Nĩ ũndũ-rĩ, o ta ũrĩa mwaneanĩte ciĩga cianyu ituĩke ngombo cia merirĩria marĩa matarĩ matheru, o na cia waganu, o kinya waganu ũgagĩkĩrĩrĩria-rĩ, rĩu o taguo kĩneanei ciĩga cianyu ituĩke ngombo cia ũthingu nĩguo mwamũrũo mũkaya gũgatuĩka atheru. 20Nĩ ũndũ-rĩ, hĩndĩ ĩrĩa mwarĩ ngombo cia wĩhia mũtiarĩ na ũhoro na ũthingu o na hanini. 21Hĩndĩ ĩo-rĩ, mwakĩonaga maciaro marĩkũ harĩ maũndũ macio matũmaga mũconoke rĩu? amu marigĩrĩrio ma maũndũ macio nĩ gĩkuũ. 22No rĩu, tondũ mũkĩrĩ ohore mũkoima ũkombo-inĩ wa wĩhia, na mũgatuĩka ndungata cia Ngai-rĩ, nĩmũrĩ na maciaro manyu harĩ ũhoro ũcio wa kwamũrũo mũgĩtheragio na marigĩrĩrio maguo nĩ muoyo wa tene na tene. 23Nĩ gũtuĩka mũcara wa wĩhia nĩ gĩkuũ, no kĩheo kĩrĩa Ngai aheanaga kiumanĩte na Wega wake nĩ muoyo wa tene na tene, ũrĩa wĩ thĩinĩ wa Kristo Jesu Mwathani witũ.

Currently Selected:

AROMA 6: OGKBIBLE

Highlight

Copy