AROMA 15

1NA rĩrĩ, ithuĩ tũrĩ na hinya nĩtwagĩrĩirũo nĩ gũkuuithagia arĩa matarĩ na hinya maũndũ mao ma wagi-hinya, na to kwenda gwĩkenagia ithuene. 2Ithuĩ o mũndũ o mũndũ nĩakenagie ũrĩa ũngĩ na ũhoro ũrĩa ũngĩmwagĩrĩra, nĩ getha ongererũo hinya. 3#Thab 69.9.Nĩ gũkorũo Kristo o nake ndaacaragia ũrĩa angĩĩkenia we mwene, no rĩrĩ, nĩ ta ũrĩa haandĩkĩtwo, atĩrĩ: Inyenyo cia arĩa maakũnyenyaga ciagũire o na niĩ. 4Nĩ ũndũ-rĩ, maũndũ mothe marĩa maandĩkirũo tene, maandĩkirũo marĩ ma kwĩruta na ithuĩ, nĩ getha tũtũũre na kĩĩrĩgĩrĩro nĩ ũndũ wa ũrĩa tũhotithagio nĩ Maandĩko macio gũkirĩrĩria, o na ũrĩa tũũmagĩrĩrio nĩmo. 5Na rĩrĩ, Ngai, o we ũtũmaga andũ mahote gũkirĩrĩria o na mahotage kũũmĩrĩria, aroetĩkĩra gũtũma mũiguanage o mũndũ na ũrĩa ũngĩ o ta ũrĩa Kristo Jesu aatuonereirie; 6nĩ getha mũkoragwo mwĩ ngoro o ĩmwe, mũkĩgoocage Ngai na kanua o ro kamwe, o we Ngai wa Mwathani witũ Jesu Kristo, na nowe Ithe.

7Tondũ ũcio-rĩ, gĩĩtĩkĩranagei o ta ũrĩa inyuĩ mwetĩkĩrirũo nĩ Kristo, nĩguo Ngai agoocithagio. 8Amu ũrĩa nguuga nĩ atĩrĩ, atĩ Kristo, tondũ wa ma ĩrĩa ya Ngai, nĩaatuĩkire ndungata ya ũhoro ũrĩa wa kũrua, nĩ getha ekĩre ciĩranĩro hinya iria Ngai erĩire maithe maitũ arĩa a tene, 9#2 Sam 22.50; Thab 18.49.na ningĩ nĩ getha andũ a Ndũrĩrĩ magoocage Ngai nĩ ũndũ wa tha ciake; o ta ũrĩa kwandĩkĩtwo, atĩrĩ:

Tondũ wa ũguo no ngũcokagĩrie ngatho o nginya Ndũrĩrĩ-inĩ,

Rĩĩtwa rĩaku ndĩrĩinagĩre ngĩrĩkumagia.

10 # Gũcok 32.43. Na ningĩ hakerũo atĩrĩ,

Kenai, andũ aya a Ndũrĩrĩ, hamwe na kĩrĩndĩ gĩake.

11 # Thab 117.1. Na ningĩ atĩrĩ,

Kĩgoocei Mwathani, inyuĩ Ndũrĩrĩ, mũrĩ inyuothe;

Iruka ciothe cia andũ kũraha nĩikĩmũrahe.

12 # Isa 11.10. Ningĩ Isaia akoiga atĩrĩ,

Ũrĩa wĩtĩtwo thuuna ya Jesii agakorũo okĩte,

Arĩ we ũrĩa ũgokĩra atuĩke wa gwathaga Ndũrĩrĩ;

Ũcio-rĩ, nĩwe ũgatuĩka wa kwĩrĩgĩrĩrũo nĩ andũ acio a Ndũrĩrĩ.

13Na rĩrĩ, Ngai mwene kĩĩrĩgĩrĩro giitũ, arotũma mũiyũragwo o kũiyũrũo nĩ gĩkeno o na thayũ tondũ wa ũrĩa mwĩtĩkĩtie, nĩ getha mũkĩragĩrĩrie kũgĩa na kĩĩrĩgĩrĩro nĩ ũndũ wa hinya wa Roho Mũtheru.

14Na atĩrĩrĩ, ariũ a Baba, niĩ mwene o na niĩ nĩ’menyete o wega ũhoro wanyu, atĩ inyuĩ o na rĩu mũrĩ aiyũre o kũiyũrũo nĩ wega wa ngoro, na kũmenya mũkamenya maũndũ mũkaigania, o na mũkahota gũtaarana inyuene. 15No rĩrĩ, hamwe na hamwe ndĩmwandĩkĩire itarĩ na gũtaarana, ũhoro ũcio ũtuĩke ta wa kũmũririkania maũndũ, ngeka ũguo nĩ ũndũ wa Wega ũrĩa ndakinyĩirio nĩ Ngai, 16ũrĩa watũmire nduĩke mũtungatĩri wa Kristo Jesu, ndũmĩtwo kũrĩ andũ a Ndũrĩrĩ, ngatungatagĩre Ũhoro ũrĩa-Mwega wa Ngai o ta ndĩ mũthĩnjĩri-Ngai, ngagĩtũme andũ a Ndũrĩrĩ matuĩke ta ihaki rĩa igongona rĩrĩa rĩngĩĩtĩkĩrĩka, rĩrĩa rĩtherie nĩ Roho Mũtheru. 17Na tondũ ũcio-rĩ, tondũ wa ũrĩa ’nyitaine na Kristo Jesu, ndiagĩte ũndũ ingĩĩrahĩra ha ũhoro wa wĩra wa Ngai. 18Amu ndingĩeta kũgweta maũndũ mangĩ tiga o marĩa Kristo aanatũma mekĩke nĩ ũndũ wakwa, ma gũtũma andũ a Ndũrĩrĩ matuĩke aathĩku, marĩa maanekĩka na njĩra ya ũhoro ũkĩheanwo na ya maũndũ marĩa mekirũo, 19tondũ wa hinya ũrĩa watũmaga kũringwo ciama na kuonwo morirũ, tondũ o wa hinya wa Roho Mũtheru. Na nĩ ũndũ wa ũguo, kwarũma Jerusalemu ona kũrigicũka kinya Iluriko, nĩndĩkĩtie gũkũiyũria Ũhoro-ũrĩa-Mwega wa Kristo. 20Na rĩrĩ, ũrĩa ndũire ngeragia gwĩka nĩ ndigage kũũhunjia kũndũ kũrĩa rĩĩtwa rĩa Kristo rĩrĩkĩtie kũmenyeka, nĩ getha ndikanatuĩke ta mũndũ ũgwaka nyũmba igũrũ rĩa gĩtina gĩakĩtwo nĩ mũndũ ũngĩ; 21#Isa 52.15.no rĩrĩ, gũtuĩke ta ũrĩa haandĩkĩtwo, atĩrĩ,

Arĩa matarĩ merũo ũhoro wake, nĩo makawona;

Acio matarĩ maaũigua-rĩ, nĩo makaguũkĩrũo nĩguo.

22 # Rom 1.13. Kĩu nakĩo nĩkĩo gĩtũmi kĩrĩa kĩanangiria mahinda maingĩ njũke kũu kwanyu. 23No rĩu, tondũ ndirĩ na ũndũ wa kũnjikaria mabũrũri maya, na mĩaka ĩno mĩingĩ ĩthirĩte nĩngoragwo nyendete mũno gũũka kũu kwanyu, 24o rĩrĩa ngathiĩ Sipania, nĩngwĩrĩgĩrĩra atĩ nĩtũkonana na inyuĩ ndĩ rũgendo rũu, na atĩ nĩngoimagario nĩ inyuĩ ngĩthiĩ kuo, ndakorũo nyambĩte gũkenio nĩ gũikarania na inyuĩ ihinda. 25#1 Kor 16.1-4.No rĩu nĩ Jerusalemu ngũthiĩ, ngateithie andũ arĩa aamũre akuo. 26Nĩ gũkorũo andũ arĩa a Ũmakedonia na a Akaia nĩmonire arĩ wega mahothithanie mũhothi wa gũteithia athĩni a thiritũ ya andũ arĩa aamũre, acio me kũu Jerusalemu. 27#1 Kor 9.11.Ũguo nĩguo maakĩonire wagĩrĩire, na noguo, amu nĩ thirĩ me naguo wa andũ acio. Amu gwagĩtuĩka atĩ andũ a Ndũrĩrĩ nĩmetĩkĩrĩtio magwatanĩre nao maũndũ mao marĩa ma kĩĩroho-rĩ, o nao matirĩ hĩndĩ mataagĩrĩirũo nĩ kũmatungatĩra na maũndũ marĩa makoniĩ kĩĩmwĩrĩ. 28Rĩrĩa ngagĩkorũo ’ninĩte bata ũcio, nduĩke nĩndĩkĩtie gũkinyĩria andũ acio kĩndũ kĩrĩa kĩrute-rĩ, hĩndĩ ĩo nĩngokĩra kwanyu ngĩthiĩ Sipania. 29Na nĩnjũĩ atĩ rĩrĩa ngakinya kũu kwanyu, ngĩũka, ngakorũo ndehanĩte na kĩrathimo gĩa Kristo kĩrĩ kĩiyũru o kũiyũra.

30Na rĩrĩ, ariũ a Ithe witũ, nĩndamũthaitha nĩ ũndũ wa Mwathani witũ Jesu Kristo, o na ningĩ nĩ ũndũ wa wendani ũrĩa twĩkĩrĩtwo nĩ Roho, atĩ mũgianagĩre hamwe na niĩ mũkĩhoyaga Ngai nĩ ũndũ wakwa, 31nĩ getha ngahonokio kũrĩ andũ arĩa aremu a kũu Judea, o na atĩ wĩra ũcio ũgũtũma ’thiĩ Jerusalemu ũgetĩkĩrũo wega nĩ andũ arĩa aamũre akuo; 32nĩguo ngahota gũũka kũrĩ inyuĩ ngenete, Ngai angĩĩtĩkĩra, ngaya kũhurũka hamwe na inyuĩ. 33Ngai mwene thayũ aroikara hamwe na inyuĩ inyuothe. Amen.

Currently Selected:

AROMA 15: OGKBIBLE

Highlight

Copy