AROMA 14

1 # Kol 2.16. NA rĩrĩ, mũndũ ũrĩa ũkoragwo arĩ na wĩtĩkio mũnyinyi-rĩ, mwamũkĩrei, no ti atĩ mũmũcirithagĩrie maũndũ marĩa mathanganagĩrio. 2Nĩ ũndũ-rĩ, wĩtĩkio wa mũndũ ũmwe nĩũrekaga arĩe irio mĩthemba yothe atarĩ na nganja, no ũrĩa wa wĩtĩkio mũnyinyi arĩaga o irio cia mũgũnda. 3Ũrĩa ũrĩaga mĩthemba yothe nĩatigage kũmena ũcio ũtamĩrĩaga, nake ũcio ũtamĩrĩaga nĩatigage gũtuĩra ũrĩa ũrĩaga mĩthemba yothe, nĩ gũkorũo Ngai we nĩamwamũkĩrĩte. 4Kaĩ wee ũrĩ ũ ũratuĩra ndungata yene? Mwene yo nowe wa gũtua kana nĩĩrũngiĩ wega kana nĩĩgũĩte. O na no kũrũgama ĩrĩrũgamithagio, nĩ ũndũ Mwathani nĩwe wĩ na hinya wa gũtũma ĩtũũre o ĩrũngiĩ. 5Mũndũ ũmwe-rĩ, onaga ta kwĩ mũthenya mũnene kũrĩ ĩrĩa ĩngĩ; mũndũ ũngĩ akona ta mĩthenya yothe ĩhaanaine. Wega no mũndũ o mũndũ akorũo emenyeire o wega na ngoro yake atĩ ũguo onaga nĩguo. 6Ũrĩa ũrĩ mũthenya aamũraga, awamũraga nĩ ũndũ wa Mwathani; nake ũrĩa ũrĩaga irio mĩthemba yothe, amĩrĩaga no ũndũ wa Mwathani, nĩ ũndũ wa ũrĩa acokagĩria Ngai ngatho. Nake ũcio ũngĩ, ũcio ũtarĩaga mĩthemba yothe-rĩ, aregaga kũmĩrĩa o ũndũ wa Mwathani, na nĩacokagĩria Ngai ngatho o nake. 7Amu ithuĩ-rĩ, gũtirĩ mũndũ o na ũmwe ũtũũraga no ũndũ wake wiki, o na gũkua gũtirĩ ũkuaga no ũndũ wake wiki. 8Nĩ ũndũ tũngĩkorũo tũgũtũũra muoyo, twatũũra tũrĩ a Mwathani; na tũngĩkorũo tũkuĩte, twakua tũrĩ o ro a Mwathani: tondũ ũcio-rĩ, o na kũngĩtuĩka nĩ rĩu tũrĩ muoyo, o na kana rĩrĩa tũngĩkorũo tũkuĩte-rĩ, tũrĩ o a Mwathani. 9Amu ũhoro ũyũ nĩguo watũmire Kristo akue na acoke muoyo, atĩ nĩguo atuĩke Mwathani o wa arĩa maanakua na wa arĩa marĩ muoyo. 10#2 Kor 5.10.Wee nawe ũgũtuĩra mũrũ wa thoguo nĩkĩ? Wee o nawe-rĩ, nĩ kĩ gĩgũtũma ũmene mũrũ wa thoguo? Amu-rĩ, ithuothe no mũhaka tũkarũgama mbere ya gĩtĩ kĩa Ngai gĩa ituĩro. 11#Isa 45.23.Tondũ nĩ haandĩke ũũ:

O ta ũrĩa ndũũraga-rĩ, (ũguo nĩguo Mwathani oiga,) gũtirĩ iru o na rĩrĩkũ rĩtagaturio mbere yakwa,

O na rũrĩmĩ gũtirĩ o na rũmwe rũtagakumia Ngai.

12Hakĩrĩ ũguo-rĩ, ithuĩ ithuothe gũtirĩ ũtakaheana ũhoro wake we mwene mbere ya Ngai.

13Tondũ ũcio-rĩ, nĩtũtigage gũcirithania ithuĩ ene: kaba mũtue atĩrĩ, atĩ mũndũ o na ũmwe ndakaneke mũrũ wa Ithe ũndũ wa kũmũgũithia njĩra-inĩ, kana wa kũmũhĩngithia. 14Niĩ nĩnjũĩ, na ngamenya na ma, tondũ ndĩ thĩinĩ wa Mwathani Jesu, atĩ gũtirĩ kĩndũ gĩĩ thahu kĩo kĩene: thengia atĩ kũrĩ mũndũ ũrĩa wonaga ta kĩndũ kĩna kĩrĩ thahu, kũrĩ ũcio-rĩ, nĩkĩrĩ thahu. 15Kũngĩkorũo irio iria ũrĩaga nĩitũmaga mũrũ wa thoguo aigue ũũru-rĩ, wee nĩ gũtiga ũtigĩte gwĩtwara na mĩthiĩre ya wendani. Mũndũ wakuĩrĩirũo nĩ Kristo-rĩ, wee tiga gũtũma ore nĩ ũndũ wa irio icio ciaku. 16Mũtikanagĩtũme ũndũ ũrĩa inyuĩ muonaga ũrĩ mwega ũcambio: 17nĩ ũndũ ũthamaki wa Ngai ti ũhoro wa kũrĩa na kũnyua, no nĩ wa ũthingu, na thayũ, o na gĩkeno, iria ciumaga kwĩ Roho Mũtheru. 18Nake ũrĩa ũtungatagĩra Kristo na njĩra icio nĩakenagĩrũo nĩ Ngai, o na akonagwo arĩ mwega nĩ andũ. 19Hakĩrĩ ũguo-rĩ, nĩtũrũmagĩrĩrei maũndũ marĩa marehage thayũ, o na marĩa mangĩtũma tuonganagĩrĩre hinya, 20Menya ũtharũrie wĩra wa Ngai o ũndũ wa ũhoro wa irio. Nĩ ma, indo ciothe no theru; no rĩrĩ, mũndũ angĩrĩaga kĩndũ kĩhĩtithagia mũndũ ũngĩ-rĩ, nĩ ũũru. 21Wega nĩ gũtige kũrĩagwo nyama, o na kana kũnyuagwo ndibei, o na kana gwĩkagwo ũndũ o na ũrĩkũ ũrĩa ũngĩtũma mũrũ wa thoguo ahĩtithio nĩguo. 22Wee, wĩtĩkio ũcio wĩ naguo-rĩ, wĩikaragĩre naguo o ũguo mbere ya Ngai. Mũndũ gũkena-rĩ, nĩ ũrĩa ũtarĩ ũndũ angĩĩcukĩra wa marĩa onaga marĩ mega akĩmeka. 23No rĩrĩ, mũndũ ũrĩa ũngĩgĩa na mathangania, na acoke arĩe irio iria athanganĩirie-rĩ, ũcio gwĩtuĩra nĩetuĩrĩire atĩ nĩ mwĩhia, nĩ ũndũ ndakoragwo arĩ na wĩtĩkio agĩcirĩa; naguo ũndũ o wothe ũtoimĩte ũhoro-inĩ wa gwĩtĩkia nĩ wĩhia.

Currently Selected:

AROMA 14: OGKBIBLE

Highlight

Copy