AROMA 11

1 # Filip 3.5. TONDŨ ũcio-rĩ, ngũũria atĩrĩ, Githĩ Ngai nĩ gwĩthamba ethambire kĩrĩndĩ gĩake? Hĩ, kũroaga gũtuĩka ũguo! Amu niĩ o na niĩ ndĩ Mũisiraeli, wa mbeũ ĩo ya Iburahimu, na wa mũhĩrĩga wa Benjamini. 2Aca-ni, Ngai ndaigana gwĩthamba kĩrĩndĩ kĩu gĩake o kĩrĩa emenyeire o tene. Kana hihi mũtiũĩ ũrĩa Maandĩko mekuuga harĩa haandĩkĩtwo ũhoro wa Elija? Ũrĩa aathaithire Ngai agĩcuka Isiraeli, 3#1 Ath 19.10,14.akiuga, Mwathani, nĩ kũũraga moragĩte anabii aku, o na makenjera igongona iria waakĩirũo magacigũithia thĩ; na no niĩ nyiki ndigaire, nao nĩ kũnjaria maranjaria manjũrage o na niĩ. 4#1 Ath 19.18.No rĩrĩ, icokio rĩrĩa aacokeirio nĩ Ngai rĩkuuga atĩa? Rĩkuuga atĩrĩ: Nĩndĩĩtigĩirie andũ ngiri mũgwanja matarĩ maaturĩria Baali ndu. 5Na rĩrĩ, o na rĩu hĩndĩ ĩno tũrĩ, o ũndũ ũmwe, nĩgũtũire matigari, kũringana na ũrĩa Ngai ethurĩire andũ na Wega wake. 6No rĩrĩ, gwagĩtuĩka atĩ nĩ Wega wake watũmire amathure, gũtingĩtuĩka atĩ mathurĩtwo nĩ ũndũ wa ciĩko ciao: kũngĩkorũo ti ũguo-rĩ, Wega ũcio wake ndũngĩtuĩka atĩ nĩ Wega kũrĩ.

7Rĩu ũhoro ũtariĩ atĩa? Ũtariĩ atĩrĩ, atĩ ũndũ ũrĩa Aisiraeli matũire marongoragia, matiigana kũwona; ĩndĩ gĩkundi kĩrĩa gĩthure rĩ, kĩo nĩkĩawonire, nao arĩa angĩ othe, ngoro ciao ikĩũmio; 8#Gũcok 29.4; Isa 29.10.o ta ũrĩa kwandĩkĩtwo, atĩrĩ, Ngai akĩmekĩra ngoro ta ya andũ magonetio nĩ toro, maitho mao matũũre matonaga, na matũ mao maagage kũigua, o nginya mũthenya ũyũ tũrĩ. 9#Thab 69.22,23.Daudi o nake ekuuga atĩrĩ,

Metha yao ya kũrĩĩra ĩrotuĩka mũtego, ĩgĩtuĩke o kĩndũ gĩa kũmagwatia;

O na ta mũhĩnga wa kũmahĩnga, ĩgĩtuĩke o irĩhi rĩa ũũru wao:

10Maitho mao marogĩa nduma, matige kuona; na ũtũme hingo ciothe mathiage o mainamĩrĩire.

11Tondũ ũcio-rĩ, ngũkĩũria atĩrĩ, Nĩ kũhĩngwo maakĩhĩngirũo ihĩnga rĩa gũtũma magũe o kũgũa? Hĩ, kũroaga gũtuĩka ũguo! Ũrĩa kũrĩ, nĩ atĩ tondũ wa ihĩtia rĩu rĩao, ũhoro wa kũhonokania nĩũkinyĩrĩire andũ a Ndũrĩrĩ iria ingĩ, nĩ getha ũndũ ũcio ũiguithie a Isiraeli ũiru. 12Na atĩrĩrĩ, gwagĩkorũo ihĩtia rĩu rĩao nĩrĩtũmĩte andũ arĩa angĩ a thĩ mone ũtonga ũcio, ũtingiaru wao ũgagĩtuĩka ũtonga wa andũ a Ndũrĩrĩ-rĩ, ĩ rĩrĩa mũigana wao ũkahinga, githĩ ndũngĩgatũma kuoneke wega mũnene o makĩria?

13Na rĩrĩ, nĩ inyuĩ mũrĩ a Ndũrĩrĩ ndĩraariria. Tondũ wa ũrĩa ndĩ mũtũmwo ũtũmĩtwo kũrĩ andũ a Ndũrĩrĩ-rĩ, wĩra ũcio ndũmĩtwo nĩndĩwĩkagĩrĩra mũno; 14ngageragia kana hihi ndahota gũtũma acio a rũruka ruitũ maigue ũiru, ngĩtũme amwe ao mahonoke. 15Amu-rĩ, kũngĩkorũo gũteo kwao nĩkuo gwa gũtũma andũ a thĩ maiguithanio na Ngai, ĩ gwĩtĩkĩrũo kwao nakuo-rĩ, kũngĩkĩrehe ũhoro ũrĩkũ, tiga o ũhoro wa gũcokwo muoyo nĩ arĩa akuũ? 16Na rĩrĩ, kũngĩkorũo kĩenyũ kĩa mũtu mũkime nĩ gĩtheru-rĩ, kĩmere gĩothe nakĩo no gĩtheru; o nakĩo gĩtina kĩa mũtĩ kĩgĩkorũo nĩ gĩtheru, honge o nacio no theru. 17Na rĩrĩ, kũngĩtuĩka atĩ honge imwe cia mũtamaiyũ-wa-mũgũnda nĩ gũkahũrũo ciakahũrirũo, nawe, ũrĩ o rũhonge rũa mũtamaiyũ-wa-kĩrĩti, ũgacoka ũgaciarithanio na mũtĩ ũcio gatagatĩ-inĩ ka honge ciaguo, ũgakĩgwatanĩra nacio gĩtina kĩa mũtamaiyũ-wa-mũgũnda, ũkagaĩrũo ũnoru waguo-rĩ; 18menya wĩgathe ũkĩmenaga honge icio. Ũngĩenda kwĩgatha-rĩ, ririkana atĩ tiwe ũkuuaga gĩtina kĩa mũtĩ, nĩ gĩtina kĩu gĩgũkuuaga wee. 19Wee no gũkiuga atĩrĩ, Githĩ honge imwe itiakahũrirũo nĩ getha niĩ njoke njiarithanio na mũtĩ? 20Ũguo noguo: gũkahũrũo nĩcĩakahũrirũo nĩ ũndũ wa ũrĩa ciagĩte gwĩtĩkia, wee nawe nĩ gũikara ũikarĩte ho no ũndũ wa ũrĩa wĩtĩkĩtie. Ndũgagĩĩtĩe, tiga o gwĩtigĩra wĩtigĩre, 21amu Ngai angĩkorũo ndaigana gũcaĩra honge icio cia ndũire-rĩ, o nawe ndangĩgũcaĩra. 22No kĩone wega ũtugi wa Ngai, o naguo wĩĩ wake: arĩa maagũire, nĩ gũthũkĩrũo maathũkĩirũo; no wee-rĩ, Ngai nĩ gũgũtuga agũtugaga, waikara o ũrũmĩtie ũtugi ũcio wake: na waaga gwĩka ũguo, wee o nawe no ũtinio. 23Andũ acio o nao, mangĩtiga kũrũmia ũhoro ũcio wao wa kwaga gwĩtĩkia, no macoke gũciarithanio na mũtĩ wao guo mwene, nĩ gũkorũo Ngai aahota kũmaciarithania naguo rĩngĩ. 24Amu-rĩ, ũngĩkorũo wee niwatemirũo ũkĩrutwo mũtamaiyũ-inĩ wa mũthemba wa kĩrĩti, ũgĩcoka ũgĩciarithanio na mũtamaiyũ mwega wa mũgũnda, na ũcio nĩ ũhoro ũtarĩ wa ndũire-rĩ, andũ acio marĩ o honge ciaguo cia ndũire kaĩ matangĩkĩria mũno gũciarithanio na mũtamaiyũ-wa-mũgũnda, o ũcio warĩ wao kĩũmbe?

25Amu rĩrĩ, ariũ a Ithe witũ, nĩguo mũtikae kwĩona ta mũrĩ ogĩ-rĩ, ndikwenda mwage kũmenya ũhoro ũyũ wa hitho, atĩrĩ, atĩ andũ a Isiraeli, amwe nĩ anyite nĩ ũhoro wa kũũma ngoro, maikare naguo o nginya andũ a Ndũrĩrĩ magakorũo maingĩrĩte, mũigana wao ũkahinga. 26#Isa 59.20,21.Na noguo a Isiraeli makahonoka othe, o ta ũrĩa haandĩkĩtwo, atĩrĩ:

Ũrĩa ũkahonokania akoima Zayuni;

Nĩagathengia maũndũ ma kũregana na Ngai mathire kwa Jakubu.

27 # Isa 27.9. Na nĩ ũguo kĩrĩkanĩro kĩrĩa ngarĩkanĩra nao gĩkahingio,

Rĩrĩa ngamehereria mehia mao.

28Ha ũhoro wa kũhunjanĩrio kwa Ũhoro-ũrĩa-Mwega-rĩ, andũ acio nĩ atue thũ nĩ getha inyuĩ mũgunwo; no rĩrĩ, ha ũhoro wa gũthurũo kũrĩa maathurirũo, nĩ kwendwo mendetwo mũno nĩ ũndũ wa maithe mao. 29Nĩ gũkorũo iheo iria Ngai aheanaga na Wega wake, o na gwĩtana kũrĩa etanaga nakuo, ndacokaga kwĩricũkwo. 30Nĩ ũndũ-rĩ, o ta ũrĩa inyuĩ tene mwaregete gwĩtĩkia Ngai, na rĩu mũkaiguĩrũo tha nĩ ũndũ wa kũrega gwĩtĩkia kwa andũ acio-rĩ, 31rĩu no taguo andũ acio ningĩ maregete gwĩtĩkia, nĩ getha o nao macoke rĩu kũiguĩrũo tha, nĩ ũndũ wa ũrĩa inyuĩ mũiguĩrĩirũo tha. 32Nĩ gũkorũo Ngai aanahingĩra andũ othe ũhoro-inĩ wa kũrega gwĩtĩkia, nĩ getha acoke kũmaiguĩra tha othe.

33 # Isa 55.8. Ĩ ũũgĩ wa Ngai, o naguo ũmenyi wake-rĩ, matikĩrĩ maingĩ na mariku! Matuĩro make, kaĩ matingĩcarĩka gĩtũmi kĩamo; mĩgendere yake nayo, kaĩ ndĩngĩtuĩrĩka-ĩ! 34#Isa 40.13.Amu nĩ mũndũ ũrĩkũ wanamenya meciria ma Mwathani? kana nĩ ũrĩkũ wanatuĩka wa ndundu yake? 35#Ayub 41.11.Kana rĩrĩ, nũ wanaamba kũmũhe kĩndũ, nake acoke akarĩhwo kĩndũ kĩu? 36#1 Kor 8.6.Amu-rĩ, maũndũ mothe no harĩ we moimire, na gũtũũrio matũũragio no we, na no kũrĩ we merekeire. Nake arogoocagwo tene na tene. Amen.

Currently Selected:

AROMA 11: OGKBIBLE

Highlight

Copy