AROMA 12

1TONDŨ wa maũndũ macio, ariũ a Ithe witũ-rĩ, ndamũthaitha nĩ ũndũ wa ũrĩa Ngai aanamũiguĩra tha, atĩ mwĩrute mĩĩrĩ yanyu ĩtuĩke ihaki rĩa kũmũhakĩra igongona narĩo rĩrĩ muoyo, na rĩĩ itheru, o rĩrĩa rĩngĩĩtĩkĩrĩka nĩ Ngai, arĩ guo ũtungati wa ũũhĩgu ũrĩa ũmwagĩrĩire. 2Na mũtikahaananie ũhoro wanyu na wa andũ a gũkũ thĩ, no rĩrĩ, mũgarũrũke ũndũ ũngĩ nĩ ũndũ wa ngoro cianyu gũthondekwo meciria ma cio makerũhio, nĩguo mũhotage kwĩmenyera kũna maũndũ marĩa Ngai endaga mekwo, namo no marĩa mega, marĩa mangĩĩtĩkĩrĩka, o marĩa makinyanĩru kũna.

3Tondũ wa Wega ũrĩa ndakinyĩirio nĩ Ngai-rĩ, ngwĩra mũndũ o wothe wa gĩkundi kĩanyu atĩrĩ, atĩ nĩatigage gwĩtua mũnene gũkĩra ũrĩa aagĩrĩirũo nĩ gwĩtua, no rĩrĩ, agĩage na meciria matarĩ ma mwĩtĩo, kũringana na ũrĩa Ngai aheete mũndũ o mũndũ riita rĩake kĩũmbe rĩa wĩtĩkio. 4#1 Kor 12.12.Amu-rĩ, o ta ũguo tũrĩ na ciĩga nyingĩ thĩinĩ wa mwĩrĩ ũmwe, na ciĩga icio ti cia wĩra mũthemba o ũmwe, 5no taguo na ithuĩ, o na gwatuĩka tũrĩ andũ aingĩ-rĩ, tũrĩ o mwĩrĩ ũmwe nĩ ũrĩa tũgwataine na Kristo, tũgagĩtuĩka atĩ mũndũ o mũndũ no ta kĩĩga kĩa ũrĩa ũngĩ. 6#1 Kor 12.4-11.Ningĩ kuona atĩ tũrĩ ahe iheo iria ciumanĩte na wega wa Ngai, o mũndũ akaheo mũthemba wake mwanya kũringana na Wega wa Ngai ũrĩa aagaĩirũo-rĩ, nĩ wega akorũo mũndũ aheetwo wĩra wa kũheana ũhoro, mũndũ ũcio aũheanage kũringana na ũrĩa wĩtĩkio wake ũigana; 7ningĩ akorũo nĩ wa gũtungatanĩra, ũcio nĩerutanagĩrie o gũtungatanĩra; ningĩ akorũo nĩ mũrutani wa ũhoro, ũcio nĩaũrutanage; 8ningĩ akorũo nĩ wa gũtaara andũ mekage wega, ũcio nĩataaranage o ũguo; nake mũndũ ũrĩa mũheani indo nĩaheanage na ũtana; ũrĩa wathanaga, nĩaathanage na kĩyo; ningĩ ũrĩa ũiguanagĩra tha, nĩekanage maũndũ make ma tha o akenete.

9Wendani wanyu nĩũtuĩkage o ũrĩa ũtarĩ na ũhinga. Ũndũ ũrĩa mũũru, ũthũũragei; naguo ũrĩa mwega-rĩ, mũkĩũrũmagie. 10Ha kwendana na ariũ arĩa angĩ a Ithe witũ-rĩ, mũndũ nĩendage ũrĩa ũngĩ na ngoro ya uumaandũ; na ha ũhoro wa gĩtĩo, mũndũ nĩendage kaba ũrĩa ũngĩ atĩwo mbere yake. 11Ningĩ ha ũhoro ũbatiĩ kĩyo-rĩ, menyai gũkaũgũtarĩra; rekei ngoro cianyu ihĩahĩagĩre thĩinĩ; na mũtungatagĩre Mwathani. 12Kenagai nĩ ũndũ wa ũrĩa mwĩ na kĩĩrĩgĩrĩro, na hĩndĩ ya thĩna, kiragĩrĩriai; nakuo kũhoya-rĩ, rũmanagĩriai kũhoya na kĩyo. 13Teithagiai andũ arĩa aamũre mabataro-inĩ mao, na mũtũũre mũgwatanaga ũgeni. 14#Mat 5.44; Luk 6.28.Andũ arĩa mamũnyariraga-rĩ, marathimagei; rathimanagai, na mũtikanarumane. 15Arĩa megũkena, kenagai hamwe nao, na arĩa mekũrĩra, mũrĩrage hamwe nao. 16#Thim 3.7.Iguanagai o mũndũ na mũndũ ũrĩa ũngĩ; tigagai kũgĩa na meciria ma mwĩtĩo, no mwĩtĩkĩre kũiganwo nĩ maũndũ marĩa manyinyi; tigagai kwĩona ta mũrĩ ogĩ.

17Menyai gũgathukĩra mũndũ o na ũrĩkũ ũũru nĩ ũndũ wa ũũru ũrĩa amwĩkĩte; wĩciragiei gwĩka maũndũ o marĩa mangĩonwo maagĩrĩire nĩ andũ othe; 18inyuĩ hanyu-rĩ, kũngĩhoteka, geragiai gũikarania na andũ othe mwĩ thayũ. 19#Gũcok 32.35.Endwa akwa, mũtikanerĩhĩrie, no mũtigagĩre Ngai arĩhanĩrie na marakara make: nĩ gũkorũo nĩ haandĩke atĩrĩ, Kũrĩhanĩria nĩ ũhoro wakwa, niĩ nĩ niĩ ngarĩhania; ũguo nĩguo Mwathani ekuuga. 20#Thim 25.21,22.Kaba rĩrĩ, mũndũ ũrĩa wĩ na ũthũ nawe angĩkorũo nĩahũtiĩ, mũhe irio; na angĩkorũo nĩanyotiĩ, mũhe gĩa kũnyua: amu weka ũguo nĩ makara me mwaki ũramũhũmbĩrĩra mũtwe. 21Tiga gũkanatorio nĩ ũũru, no rĩrĩ, toragia ũũru nĩ gwĩkaga wega.

Currently Selected:

AROMA 12: OGKBIBLE

Highlight

Copy