MATHAYO 13
13
1MŨTHENYA ũcio Jesu nĩoimire nyũmba, agĩthiĩ, agĩikara thĩ hakuhĩ na iria. 2#Luk 5.1-3.Na kĩrĩndĩ kĩingĩ ma nĩkĩamũũnganĩire, agĩkĩhaica marikabu agĩikara thĩ ho. Nakĩo kĩrĩndĩ gĩothe gĩkĩrũgama hũgũrũrũ-inĩ cia iria. 3Nake akĩmaarĩria mohoro maingĩ na ngerekano, akĩmera atĩrĩ, Mũhuri nĩoimagarire agĩthiĩ kũhura mbeũ; 4na rĩrĩa aahuraga, mbeũ imwe ikĩgũa thĩ mũkĩra-inĩ wa njĩra, na nyoni igĩthiĩ igĩcirĩa: 5na ingĩ ikĩgũa rũnyanjara-inĩ, ikĩaga tĩri mũingĩ ho: nacio ikĩmera o narua, nĩ gũkorũo hatiarĩ tĩri mũriku: 6na riũa rĩara, ikĩhĩa; na tondũ itiarĩ na mĩri, ikĩũma. 7Na ingĩ ikĩgũa mĩigua-inĩ; nayo mĩigua ĩgĩkũra, ĩgĩithararia: 8na ingĩ ikĩgũa tĩri-inĩ ũrĩa mũnoru igĩciara; imwe maita igana, na imwe mĩrongo ĩtandatũ, na imwe mĩrongo ĩtatũ. 9Ũrĩa wĩ na matũ ma kũigua nĩakĩigue.
10Na arutwo ake magĩũka kũrĩ we makĩmũũria, Atĩrĩrĩ, waragia nao na ngerekano nĩkĩ? 11Nake akĩmacokeria akĩmera atĩrĩ, Inyuĩ nĩ inyuĩ mwĩtĩkĩrĩtio kũmenya maũndũ marĩa ma hitho ma ũthamaki wa Igũrũ, no o matiĩtĩkĩrĩtio. 12#Mat 25.29; Mar 4.25; Luk 8.18; 19.26.Nĩ ũndũ o mũndũ ũrĩa wĩ na indo, nĩwe ũkaheo, na akĩrĩrĩrio: no ũrĩa ũtarĩ na indo, nĩagatunyũo o na kĩrĩa arĩ nakĩo. 13Nĩkĩo njaragia nao na ngerekano: nĩ ũndũ kuona mationaga, na kũigua matiiguaga, o na kana makamenya ũndũ. 14#Isa 6.9,10.Nĩo makinyĩirũo nĩ ũhoro ũrĩa warathirũo nĩ Isaia, atĩrĩ,
Kũigua nĩmũkaiguaga na mũtikanamenye ũndũ;
Na kuona nĩmũkonaga na mũtikanakuũke,
15Nĩ ũndũ ngoro cia andũ aya nĩ ngingitaru,
Na matũ mao nĩ nginini;
Ningĩ maitho mao nĩmamahingĩte,
Matikae kuona na maitho,
Kana maigue na matũ,
Na mamenye na ngoro,
Macoke magarũrũke,
Na niĩ ndĩmahonie.
16 #
Luk 10.23,24. No rĩrĩ, gũkena-rĩ, nĩ maitho manyu, nĩ ũndũ nĩmonaga; o na matũ manyu, nĩ ũndũ nĩmaiguaga. 17Tondũ ngũmwĩra na ma, atĩ anabii aingĩ, o na andũ aingĩ athingu, nĩmendaga kuona maũndũ marĩa muonaga, na matiamonire; o na kũigua maũndũ marĩa mũiguaga, na matiamaiguire.
18Nĩ ũndũ ũcio-rĩ, ta iguai ũhoro wa ngerekano ĩo ya mũhuri. 19Mũndũ aigua Ũhoro wa ũthamaki, na ndamenye gĩtũmi kĩaguo, hĩndĩ ĩo ũrĩa mũũru okaga, akamũtunya kĩrĩa kĩhandĩtwo ngoro-inĩ yake. Ũcio nĩwe ũrĩa wahurirũo mũkĩra-inĩ wa njĩra. 20Na ũrĩa wahurirũo rũnyanjara-inĩ, nĩwe ũrĩa ũiguaga Ũhoro, na akaũgwata o rĩmwe na gĩkeno; 21nake ndarĩ mĩri thĩinĩ wake, no gũikara aikaraga kahinda; na rĩrĩ, kwagĩa thĩna kana kĩnyarirano nĩ ũndũ wa Ũhoro ũcio, o rĩmwe akahĩngithio. 22Nake ũrĩa wahurirũo mĩigua-inĩ, nĩ ũrĩa ũiguaga Ũhoro; nayo mĩhang’o ya gũkũ thĩ, na maheni ma ũtonga igathararia Ũhoro, nake agakĩaga gũciara maciaro. 23Na ũrĩa wahurirũo tĩri-inĩ ũrĩa mũnoru, nĩ ũrĩa ũiguaga Ũhoro akamenya gĩtũmi kĩaguo; ũcio nĩwe ũciaraga maciaro; ũyũ akaruta maita igana, na ũyũ akaruta mĩrongo ĩtandatũ, o na ũyũ mĩrongo ĩtatũ.
24Nake akĩmahe ũhoro na ngerekano ĩngĩ, akĩmera atĩrĩ, Ũthamaki wa Igũrũ nĩ wa kũhaananio na mũndũ ũrĩa wahandire mbeũ njega mũgũnda wake: 25na rĩrĩa andũ maarĩ toro, thũ yake ĩgĩũka ĩkĩhanda itindiĩ o narĩo hamwe na ngano, ĩgĩĩthiĩra. 26Na rĩrĩa nguha ciamerire igĩciara-rĩ, hĩndĩ ĩo itindiĩ narĩo rĩkĩoneka. 27Na ngombo cia mwene mũciĩ igĩũka ikĩmũũria atĩrĩ, Mũthuri ũyũ, githĩ ndwahandire mbeũ njega mũgũnda waku? Kaĩ itindiĩ rĩkiumĩte kũ? 28Nake akĩmera, Nĩ mũndũ ũrĩ ũthũ na niĩ wekire ũguo. Nacio ngombo ikĩmũũria atĩrĩ, Nĩũkwenda tũthiĩ tũkarĩmunye, tũrĩcokererie hamwe? 29Nowe akiuga, Aca; nĩ ũndũ hihi rĩrĩa mũkũmunya itindiĩ mwarĩmunyanĩria na ngano. 30Rekei ikũranĩre hamwe o cierĩ nginya hĩndĩ ya magetha: o na hĩndĩ ĩo ya magetha nĩngera agethi, Ambai mũmunye itindiĩ mũricokererie hamwe, mũrĩohe itĩa cia gũcinwo: no mũcokererie ngano ikũmbĩ rĩakwa.
31Akĩmahe ũhoro na ngerekano ĩngĩ, akĩmera atĩrĩ, Ũthamaki wa Igũrũ ũhaanaine na kahĩndĩ ga karatarĩ karĩa mũndũ oire, agĩkahanda mũgũnda wake. 32Nako nĩ kanini gũkĩra mbeũ ciothe; no gaakũra-rĩ, gakaneneha kũrĩ irio ciothe cia mũgũnda, gagatuĩka mũtĩ, nacio nyoni cia rĩera-inĩ igagĩũka kũraara honge-inĩ ciaguo.
33Nake akĩmera ngerekano ĩngĩ; Ũthamaki wa Igũrũ ũhaanaine na ndawa ya kũimbia mũgate, ĩrĩa mũtumia oire agĩĩkĩra thĩinĩ wa ibaba ithatũ cia mũtu, kinya mũtu ũcio wothe ũkĩimbio nĩyo.
34Jesu nĩerire kĩrĩndĩ maũndũ macio mothe na ngerekano; na ndaigana kũmera ũndũ o na ũmwe hatarĩ ngerekano: 35#Thab 78.2.nĩguo ciugo iria cia mũnabii ihingio, rĩrĩa oigire atĩrĩ,
Ngũtumũra kanua gakwa njarie na ngerekano;
Njitũrũre maũndũ marĩa matũire marĩ mahithe gwata rĩrĩa thĩ yombirũo.
36Hĩndĩ ĩo agĩtigana na kĩrĩndĩ, agĩthiĩ, agĩtonya nyũmba: nao arutwo ake magĩũka kũrĩ we, makĩmwĩra atĩrĩ, Tũtaũrĩre ngerekano ĩo ya itindiĩ rĩa mũgũnda. 37Nake akĩmacokeria akĩmera atĩrĩ, Ũrĩa ũhandaga mbeũ iria njega nĩwe Mũrũ wa Mũndũ: 38naguo mũgũnda nĩ gũkũ thĩ; nacio mbeũ icio njega, nĩcio ciana iria cia ũthamaki; narĩo itindiĩ nĩrĩo ciana cia ũrĩa mũũru; 39nayo thũ ĩrĩa yarĩhandire, nĩyo mũcukani; nayo hĩndĩ ya magetha, nĩyo ithirĩro rĩa mahinda maya; nao agethi, nĩo araika. 40Nĩ ũndũ ũcio-rĩ, o ta ũrĩa itindiĩ rĩgũcokererio rĩgacinwo na mwaki, ũguo no taguo gũgekwo ithirĩro-inĩ rĩa mahinda maya. 41Mũrũ wa Mũndũ nĩakarekia araika ake, nao nĩmagacokereria maũndũ mothe marĩa mahĩngithagia andũ, o na andũ arĩa mekaga ũũru, moimio kũrĩa aathanaga, 42mamaikie icua-inĩ rĩrĩa inene rĩa mwaki: kũu nĩkuo gũkagĩa kĩrĩro, na kũhagarania magego. 43Hĩndĩ ĩo nĩyo arĩa athingu makaara o ta riũa kũrĩa Ithe wao aathanaga. Ũrĩa wĩ na matũ ma kũigua nĩakĩigue.
44Ũthamaki wa Igũrũ ũhaanaine na mũthithũ wa indo wahithĩtwo mũgũnda; na rĩrĩa wonirũo nĩ mũndũ, agĩcoka akĩũhitha, na tondũ wa ũrĩa aaũkeneire agĩthiĩ akĩendia indo ciake ciothe, akĩgũra mũgũnda ũcio.
45Ningĩ, ũthamaki wa Igũrũ ũhaanaine na mũndũ muonjorithania wacaragia ruru njega; 46na ona ruru ĩmwe yarĩ goro mũno, agĩthiĩ akĩendia indo ciake ciothe, akĩmĩgũra.
47Ningĩ, ũthamaki wa Igũrũ ũhaanaine na rũgara rũnene rũa ndigi rũrĩa rũaikirio iria thĩinĩ, rũkĩũngania ciũngũyũ mĩthemba yothe: 48naruo rũaiyũra, andũ makĩrũgucia rũgiki-inĩ, magĩikara thĩ, magĩthurania iria njega magĩciĩkĩra ikabu-inĩ, nacio iria njũru magĩcite. 49Ũguo no taguo gũgekwo ithirĩro-inĩ rĩa mahinda maya: araika nĩmagoka mamũranie arĩa oru na arĩa athingu, 50na maikie arĩa oru icua-inĩ rĩrĩa inene rĩa mwaki: kũu nĩkuo gũkagĩa kĩrĩro, na kũhagarania magego.
51Rĩu-rĩ, nĩmwaigua maũndũ macio mothe? Nao makĩmwĩra, Ĩĩ-ni. 52Nake akĩmera, Nĩ ũndũ ũcio-rĩ, o mwandĩki-marũa ũrĩa ũtuĩkĩte mũrutwo wa ũthamaki wa Igũrũ ahaanaine na mũndũ mwene nyũmba ũrĩa ũrutaga mũthithũ-inĩ wake indo njerũ na ngũrũ.
53Na gũgĩkinya atĩrĩ, Jesu aarĩkia ngerekano icio, agĩĩthiĩra. 54Nake aakinya bũrũri wao, akĩruta andũ ũhoro thunagogi-inĩ yao, o nginya makĩgega, makiuga, Mũndũ ũyũ akĩrutĩte kũ ũũgĩ ũyũ, o na ciĩko ici cia hinya? 55Githĩ ũyũ tiwe mũrũ wa mũndũ ũrĩa mũtharamara? Nake nyina ndetagwo Mariamu? Nao ariũ a nyina ti aa Jakubu, na Jusufu, na Simoni, na Juda? 56Nao airĩtu a nyina, anga matitũire gwitũ othe? Kaĩ mũndũ ũyũ akĩrutĩte kũ maũndũ macio mothe? 57#Joh 4.44.Nao makĩhĩngithio nĩ ũndũ wake. Nake Jesu akĩmera, Mũnabii-rĩ, kũndũ aagaga gũkumio no bũrũri wao na kwao mũciĩ. 58Nake ndaigana gwĩka ciĩko nyingĩ cia hinya kũu nĩ ũndũ wa ũrĩa maagĩte kũmwĩtĩkia.
Currently Selected:
MATHAYO 13: OGKBIBLE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 2019
