MATHAYO 14

1O hĩndĩ ĩo-rĩ, Herode ũrĩa mũthamaki nĩaaiguire ngumo ya Jesu, 2agĩkĩĩra ndungata ciake atĩrĩ, Ũcio nĩwe Johana Mũbatithania; nĩariũkĩte akoima kũrĩ arĩa akuũ, nĩkĩo mahinya macio marutaga wĩra thĩinĩ wake. 3#Luk 3.19,20.Tondũ Herode nĩaanyitĩte Johana, akamuoha, akamũikia korokoro-inĩ, nĩ ũndũ wa Herodia, nĩwe mũtumia wa Filipu, mũrũ wa ithe. 4#Alaw 18.16; 20.21.Tondũ Johana nĩerĩte Herode atĩrĩ, Ndũrĩ na rũtha kũmũtwara. 5Nake rĩrĩa endaga kũmũũraga, agĩĩtigĩra andũ, nĩ ũndũ nĩmoigaga atĩ nĩ mũnabii. 6Na mũthenya wa gũciarũo kwa Herode wakinya, mũirĩtu wa Herodia akĩina rũĩmbo e gatagatĩ-inĩ kao, agĩkenia Herode. 7Nĩ ũndũ ũcio Herode akĩĩhĩta, akiuga atĩ nĩekũmũhe o kĩrĩa angĩmũhoya. 8Nake mũirĩtu ũcio, aataarũo nĩ nyina, akĩmwĩra atĩrĩ, He mũtwe wa Johana Mũbatithania o haha, wĩ kiuga-inĩ. 9Nake mũthamaki akĩigua ũũru; no nĩ ũndũ wa mĩĩhĩtwa yake, na nĩ ũndũ wa acio maaikarĩte nake makĩrĩa, akiuga aheo; 10akĩrekania, agĩtinithia Johana mũtwe kũu korokoro-inĩ. 11Naguo mũtwe wake ũkĩrehwo na kiuga, ũkĩneo mũirĩtu ũcio: nake akĩũtwara kwĩ nyina. 12Na arutwo ake magĩthiĩ, makĩoya kĩimba magĩgĩthika; na magĩthiĩ makĩĩra Jesu.

13Nake Jesu rĩrĩa aaiguire ũguo, akiuma kũu ahaicĩte marikabu, agĩthiĩ handũ werũ-inĩ hataarĩ andũ angĩ. Nakĩo kĩrĩndĩ kĩaigua ũguo, gĩkiuma matũũra-inĩ gĩkĩmũkinyĩra na magũrũ. 14Nake akiuma marikabu-inĩ, akĩona kĩrĩndĩ kĩingĩ, agĩkĩiguĩra tha, akĩhonia arũaru ao. 15Na gwatua gũtuka, arutwo ake magĩũka kũrĩ we makĩmwĩra atĩrĩ, Gũkũ nĩ werũ-inĩ, na gũkirie gũtuka; ĩra kĩrĩndĩ; gĩthiĩ, gĩkinye mĩciĩ-inĩ, gĩkegũrĩre irio. 16Nowe Jesu akĩmera, Hatirĩ gĩtũmi gĩa gũtũma mathiĩ; mahei irio arĩ inyuĩ. 17Nao makĩmwĩra, Haha tũrĩ na mĩgate o ĩtano, na ciũngũyũ igĩrĩ. 18Nake akĩmera atĩrĩ, Ndeherei haha. 19Akĩĩra kĩrĩndĩ gĩikare thĩ nyeki-inĩ; nake akĩoya mĩgate ĩo ĩtano, o na ciũngũyũ icio igĩrĩ, akĩrora Igũrũ, akĩrathima, akĩenyũranga mĩgate, akĩmĩnengera arutwo ake, nao arutwo makĩmĩnengera kĩrĩndĩ. 20Nao andũ acio othe makĩrĩa, makĩhũna: makĩoya cienyũ iria ciatigarire ciondo ikũmi na igĩrĩ ciiyũire. 21Na arĩa maarĩire maarĩ arũme ta ngiri ithano, hatatarĩtwo andũ-a-nja na ciana.

22Na hĩndĩ o ĩo akĩhatĩrĩria arutwo ake mahaice marikabu, mathiage mũrĩmo mbere yake, mũira wa oigĩre kĩrĩndĩ ũhoro. 23Na aarĩkia kuugĩra kĩrĩndĩ ũhoro, akĩambata kĩrĩma-inĩ, agĩthiĩ handũ, e wiki, akahoe; na gũgĩtuka-rĩ, aarĩ ho e wiki. 24Nayo marikabu hĩndĩ ĩo yarĩ gatagatĩ ka iria, ĩkĩnyarirĩka nĩ makũmbĩ ma maĩ; tondũ rũhuho nĩrũagiragia gũthiĩke. 25Na ta thaa kenda cia ũtukũ agĩthiĩ kũrĩ o, agĩkinyaga maĩ igũrũ. 26Nao arutwo ake maamuona agĩthiĩ agĩkinyaga maĩ igũrũ, makĩmaka, makiuga atĩrĩ, Nĩ ngoma; magĩkaya nĩ ũndũ wa guoya. 27Nake Jesu hĩndĩ o ĩo akĩmaarĩria, akĩmera atĩrĩ, Ũmĩrĩriai; nĩ niĩ tigai gwĩtigĩra. 28Nake Petero akĩmũcokeria akĩmwĩra, Mwathani, ongorũo nĩwe, njĩra njũke harĩ wee ngĩkinyaga maĩ igũrũ. 29Nake akĩmwĩra, Ũka. Na Petero akiuma marikabu, agĩikũrũka iria-inĩ, agĩthiĩ agĩkinyaga maĩ igũrũ, akinye harĩ Jesu. 30Na ona rũhuho, agĩĩtigĩra; na aambĩrĩria kũhorokera maĩ-inĩ, agĩkaya akiuga, Mwathani; honokia. 31Na hĩndĩ o ĩo Jesu agĩtambũrũkia guoko akĩmũgwata, akĩmwĩra, Wee wĩtĩkĩtie o hanini, wathangania nĩkĩ? 32Nao maahaica marikabu rũhuho rũgĩtuĩka. 33Nao arĩa maarĩ marikabu thĩinĩ makĩmũturĩria ndu makiuga, Ti-itherũ, wee nĩwe Mũrũ wa Ngai.

34Nao maaringa iria, magĩkinya thĩ, o bũrũri wĩtagwo Genesareti. 35Na rĩrĩa andũ akuo maamũmenyire, makĩrekania ng’ongo ciothe iria ciarĩ gũkuhĩ, makĩmũrehere andũ othe arĩa maarĩ arũaru; 36nao makĩmũthaitha atĩ metĩkĩrio mahutie o ciohe cia ndigi cia nguo yake; na arĩa othe maacihutirie makĩhona.

Currently Selected:

MATHAYO 14: OGKBIBLE

Highlight

Copy