MACAKAYA 5
5
1Ĩ JEHOVA-Ĩ, ririkana maũndũ maya magĩtũkorete!
ta rora, ũkĩone ũmeneku witũ.
2Igai riitũ rĩrĩa twagaĩirũo nĩ igarũre rĩkarorio na kũrĩ andũ ageni,
mĩciĩ iitũ ĩgagĩtuĩka ya andũ a rũrĩrĩ.
3Tũtuĩkĩte ciana cia ngoriai ciũrĩtwo nĩ maithe,
manyina maitũ nao makahaana ta a ndigwa.
4Maĩ maitũ tũkĩnyua, no mbia;
ngũ iria ciitũ nĩ kwenderio twendagĩrio.
5Arĩa matũthingataga marĩ o makano-inĩ maitũ:
tũnogete, na tũkaaga hĩndĩ tũngĩhurũka.
6Nĩtũng’athanĩte na andũ a Misiri,
ona Aashuri o nao nĩguo tũhote kũiganwo nĩ irio.
7Maithe maitũ nĩmaahĩtirie, na rĩu matirĩ ho,
na ithuĩ nĩ ithuĩ tũkuuĩte mũrigo wa mawaganu mao.
8Twathagwo nĩ ndungata,
na gũtirĩ wa gũtũteithũra tuume moko-inĩ ma cio.
9Tuonaga irio nĩ gũtonyia mĩoyo iitũ ũgwati-inĩ
nĩ ũndũ wa njomo ĩrĩa ĩrĩ werũ-inĩ.
10Njũa cia mĩĩrĩ iitũ ii na mwaki o ta icua
nĩ ũndũ wa ũrugarĩ ũrĩa mũnene wa mũndũ mũrĩe nĩ ng’aragu.
11Atumia nĩ kũgwatwo maagwatagwo na hinya gũkũ Zayuni,
nginya airĩtu-rĩ, makagwatagĩrũo matũũra-inĩ ma Juda.
12Anene akuo, kũrĩ maacuuririo na moko mao,
ningĩ athuri, mothiũ mao makaagithio gĩtĩo.
13Aanake magĩtuĩka a gũkuuithagio mahiga ma gĩthĩi,
nacio ciana itũgũgage nĩ gũkuuithio ngũ.
14Athuri-rĩ, nĩmatigĩte gũikaraga boi-inĩ,
aanake nao magatiga gũthiaga rũĩmbo.
15Ngoro ciitũ rĩu nĩithirĩte gĩkeno;
ndũrũhĩ ciitũ ikagarũrũka igatuĩka mũcakayo.
16Thũmbĩ ya ũnene nĩ ngũu ĩgatuuma mũtwe:
kaĩ ithuĩ twĩ na haaro-ĩ! amu kũhĩtia nĩ ithuĩ twanahĩtia.
17Tondũ ũcio ngoro ciitũ nĩciũrĩtwo nĩ hinya;
tondũ wa maũndũ macio-rĩ, maitho maitũ magakĩira.
18Tondũ atĩrĩ, kĩrĩma gĩa Zayuni-rĩ, kĩo nĩgĩkirĩte ihooru;
ngũcũ rĩu nĩcio icũgacũgaga kuo.
19Wee, Jehova-rĩ, ũikaraga o ho mĩndĩ na mĩndĩ;
gĩtĩ gĩaku kĩa ũnene gĩkinyagĩrĩra njiaro na njiaro.
20Nĩ ũndũ kĩ ũkũriganĩrũo nĩ ithuĩ gwata tene,
ũgagĩtũtiganĩria hingo ndaya ũũ?
21Jehova, tũgarũre ũtwerekerie na kũrĩ wee, na nĩtũgũkũgarũrũkĩra;
erũhia matukũ maitũ macoke o ta ũrĩa maatariĩ tene;
22Tiga ũgĩkorirũo ũtũregete o gũtũrega,
ũgagĩtũrakarĩra o mũno makĩria.
Currently Selected:
MACAKAYA 5: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
