EZEKIELI 7

1Ona ningĩ atĩrĩ, ũhoro wa Jehova ũkĩnginyĩrĩra, ngĩĩrũo ũũ: 2Atĩrĩrĩ, wee mũrũ wa mũndũ, Mwathani Ngai ekwĩra bũrũri wa Isiraeli atĩrĩ, Ha ũhoro wa ithirĩro-rĩ, ithirĩro nĩ ikinyĩrĩru bũrũri ũyũ, o nginya mĩthia ĩrĩa ĩna yaguo. 3Rĩu nĩguo ithirĩro rĩgũkinyĩrĩire, na nĩngakũrehithĩrie marakara makwa, na ngũtuĩre cira ũringaine na mĩthiĩre yaku; na nĩngatũma ũcokererũo nĩ maũndũ maku mothe ma thahu marĩa waneka. 4Narĩo riitho rĩakwa rĩtigagũcaĩra, o na kana ngũiguĩre tha; no nĩngatũma ũcokererũo nĩ ũũru wa mĩthiĩre yaku, o namo maũndũ maku ma thahu marĩa waneka magatũũra o thĩinĩ waku; na nĩmũkamenya atĩ niĩ nĩ niĩ Jehova.

5Mwathani Jehova oigĩte ũũ: Atĩrĩrĩ, harĩ ũũru ũroka na ndũtigithĩrie. 6Na ithirĩro narĩo nĩ ikinyu o gũkinya; nĩrĩkwarahũkĩire, na atĩrĩ, rĩu nĩrĩroka. 7Wĩ mũkore nĩ mũtino, wee ũtũire bũrũri ũyũ; ihinda nĩ ikinyu, naguo mũthenya ũcio ũgakuhĩhĩria; naguo nĩ mũthenya wa ngũĩ, na ti wa mbugĩrĩrio ya gĩkeno ya andũ me irĩma-inĩ. 8Na rĩu ngiriĩ gũkũguthũkĩra na mathũgũta makwa, ngũũkĩrĩre na marakara makwa, na ngũtuĩre cira ũringaine na mĩthiĩre yaku; na nĩngatũma ũcokererũo nĩ maũndũ maku mothe ma thahu. 9Narĩo riitho rĩakwa rĩtigagũcaĩra, o na kana ngũiguĩre tha; no nĩngatũma ũcokererũo nĩ ũũru wa mĩthiĩre yaku, o na maũndũ maku ma thahu marĩa waneka magatũũra o thĩinĩ waku; na nĩmũkamenya atĩ niĩ Jehova nĩ’hũranaga. 10Atĩrĩrĩ, mũthenya ũcio nĩ gũũka ũroka, nawe wĩ mũrokere nĩ mũtino; rũhonge nĩrũrutĩte kĩro, naguo mwĩtĩo nĩ muumĩru o kuumĩra. 11Maũndũ ma ũhinya nĩmaarahũrĩtwo magatuĩka ta rũthanju rũa kũhũra waganu, na gũtirĩ mũndũ o na ũmwe wao ũgatigara, o na kana wa kĩrĩndĩ kĩao, o na kana ũtonga wao; o na kana gũtigare mũndũ o na ũmwe wa kũmarĩrĩra. 12Ihinda nĩ ikinyu; mũthenya nĩũkuhĩhĩirie; mũgũri wa indo nĩatige gũkena, o na kana mwendia aigue kĩeha, nĩ ũndũ mang’ũrĩka megũkora kĩrĩndĩ kĩao gĩothe. 13Nĩ gũkorũo mwendia ndagacokera kĩrĩa endetie, ihinda rĩu me muoyo; nĩ ũndũ kĩoneki kĩu gĩkoniĩ kĩrĩndĩ kĩao gĩothe, na gũtirĩ ũndũ wakĩo o na ũmwe ũtakahingio, ningĩ gũtirĩ mũndũ o na ũrĩkũ ũrĩa ũtũire arũmĩtie waganu mĩthiĩre-inĩ yake ũkeyũmia. 14Nĩmahuhĩte coro, nao othe makehaarĩria; no rĩrĩ, gũtirĩ mũndũ o na ũmwe wao ũgũthiĩ ita-inĩ; nĩ ũndũ mang’ũrĩka makwa nĩmakinyĩrĩire kĩrĩndĩ kĩao gĩothe. 15Hiũ cia njora nĩimũrigicĩirie na kũu nja, naguo mũthiro na ng’aragu irĩ itũũra-inĩ thĩinĩ. Mũndũ ũrĩa wĩ mũgũnda nĩagakua oragĩtwo na rũhiũ rũa njora, nake ũrĩa wĩ itũũra-inĩ aninwo nĩ ng’aragu na mũthiro. 16No rĩrĩ, arĩa magethara nĩmakahonoka, nao maikarage magĩcaya irĩma-inĩ o ta ndutura iria itũũraga ituamba-inĩ, mũndũ o mũndũ akĩgwetaga waganu wake. 17Moko mothe nĩmakaaga hinya, o namo maru mothe maregere o ta maĩ. 18Ningĩ andũ acio nĩ kuoha makeyoha matama ma makũnia, ningĩ maikare mahobanĩirio nĩ kĩmako kĩnene; mothiũ mothe nĩmakagwatwo nĩ thoni, o nao othe maikare menjetwo kang’aũ. 19Betha ciao magaciikia njĩra-inĩ, o nacio thahabu ciao ituĩke ta kĩndũ kĩĩ magigi; tondũ-rĩ, betha ciao o na thahabu ciao itikahota kũmahonokia mũthenya ũrĩa mang’ũrĩka ma Jehova makamakora; nacio itikahota kũhoreria ngoro ciao, o na kana irehe kĩndũ gĩa kũhũnia nda ciao, nĩ gũkorũo nĩcio ituĩkĩte waganu wao wa kũmahĩngithia. 20O naho ha ũhoro wa ũthaka wa mathaga mao ma kwĩgemia-rĩ, nĩmaacokire gwĩtĩa nĩ ũndũ waguo, makĩmatua ma gũthondeka mĩhianano ya kũhoyũo, nayo nĩ ĩrĩa ĩĩ thahu, na ĩgathũũrũo mũno. Nĩ ũndũ ũcio nĩndũmĩte ũthaka ũcio wao ũtuĩke ta kĩndũ gĩĩ thahu harĩ o, o ene. 21Niĩ na niĩ nĩngaũneana harĩ andũ a ndũrĩrĩ ũtuĩke itaha rĩao, o na ndĩũneane harĩ andũ arĩa aaganu a gũkũ thĩ ũtuĩke kĩndũ kĩrĩa matunyanĩte na hinya; nao macoke kũũthahia arĩ o. 22O na ningĩ ndĩmahutatĩre, matige kũnyona ũthiũ, nao macoke gũthahia handũ hakwa harĩa ha hitho, naho hacoke gũtonyũo nĩ atunyani, mahathahie. 23Tura mũnyororo, nĩ gũkorũo bũrũri nĩũiyũrĩtwo nĩ macira maingĩ ma ũũragani, narĩo itũũra rĩkaiyũra ũhinya. 24Tondũ ũcio ngarehithie imaramari cia ndũrĩrĩ iria itetĩkĩtie, nacio ciĩgwatĩre nyũmba ciao ituĩke ciacio; o na ningĩ nĩngatũma mwĩtĩo wa arĩa marĩ hinya ũthire, o nakuo kũndũ kwao kũrĩa gũtheru gũthahio. 25Ũhoro wa kũninana nĩũroka, nao andũ nĩmagacaria ũrĩa mangĩona thayũ, no ndũkoneka o na hanini. 26Maũndũ moru ma mbũkĩrĩra marĩũkaga mategũtigithĩria, ningĩ ndeto cia mũhuhu o nacio ciũkage o ro ũguo, nao andũ mathiage kũragũria harĩ anabii; no rĩrĩ, athĩnjĩri-Ngai nĩmagakorũo mariganĩirũo nĩ kĩrĩra, nao athuri makorũo maremetwo nĩ cira. 27Mũthamaki nĩagakorũo ethikĩire nĩ kĩeha, o nake mũndũ mũnene aikare ta ahubanĩirio nĩ ihooru rĩa mwanangĩko, namo moko ma andũ a bũrũri no gũtetema magatetema; niĩ na niĩ ngameka maũndũ maringaine na mĩthiĩre yao, na rĩrĩ, o ta ũrĩa cira wao wagĩrĩire gũtuwo-rĩ, ũguo noguo ngamatuĩra cira; nao nĩmakamenya atĩ niĩ nĩ niĩ Jehova.

Currently Selected:

EZEKIELI 7: OGKBIBLE

Highlight

Copy

Compare