EZEKIELI 8

1Na gũgĩkinya atĩrĩ, atĩ mwaka wa ĩtandatũ, o mweri wa ĩtandatũ, na mũthenya wa ĩtano wa mweri ũcio, rĩrĩa ndakorirũo njikarĩte gwakwa mũciĩ, nao athuri a Juda magaikara o mbere yakwa-rĩ, ngĩkĩigua njigĩrĩirũo guoko nĩ Mwathani Jehova o hau ndarĩ. 2#Ezek 1.27.Hĩndĩ ĩo ngĩkĩrora, ngĩona mũhianĩre wa mũndũ ũtariĩ ta mwaki, naguo mwaki ũcio ũkonwo ũgĩakana mwena wothe wa mũhuro kuuma o njohero-inĩ yake; ningĩ gũgathererũka mwena wothe wa na igũrũ kuuma o njohero-inĩ yake, gũtunĩhĩte ta ũũkĩ-wa-ngoma. 3Ngĩgĩcoka ngĩigua ta atambararĩtie guoko, aka’nyita kĩohe kĩa njuĩrĩ ya mũtwe wakwa; nake Roho akĩnjoya na igũrũ rĩera-inĩ; nacio cioneki-inĩ icio cia Ngai ngĩona ta andwarĩte Jerusalemu akandũgamia mũrango-inĩ wa kĩhingo kĩa na thĩinĩ kĩrĩa kĩrorete gathigathini, o kũu kwarĩ gĩikaro kĩa mũhianano wa ũiru, ũrĩa ũthethũraga maũndũ ma ũiru. 4#Ezek 1.28.Na atĩrĩrĩ, ngĩkĩona riri wa Ngai wa Isiraeli ho, o ta ũrĩa ndawonete werũ-inĩ ũrĩa mwaraganu. 5Hĩndĩ ĩo akĩnjĩra atĩrĩ, Mũrũ wa mũndũ, ta inamũra maitho maku rĩu, ũmarorie njĩra ĩrĩa ĩrorete gathigathini. Na niĩ ngĩkĩinamũra maitho ngĩmaroria njĩra ya gathigathini, na atĩrĩrĩ, mwena ũrĩa ũrorete gathigathini wa Kĩhingo gĩa Kĩgongona-inĩ-rĩ, nĩkuo mũhianano ũcio wa ũiru warĩ, o itonyero-inĩ rĩakĩo. 6Nake akĩnjĩra atĩrĩ, Mũrũ wa mũndũ, nĩũrona ũrĩa mareka? Naguo ũguo nĩ ta gũkũũria kana nĩũrona maũndũ manene ma thahu marĩa andũ a nyũmba ya Isiraeli mareka ho, magatũma nyume handũ hakwa harĩa haamũre, ndĩĩyũrĩre, ’thiĩ kũndũ kũraya mũno? No rĩrĩ, nĩũgũcoka wĩonere maũndũ mangĩ ma thahu manene makĩria. 7Nake akĩndwara mũrango-inĩ wa nja ĩo; na rĩrĩa ndacũthĩrĩirie, ngĩona karima rũthingo-inĩ. 8Hĩndĩ ĩo nake akĩnjĩra atĩrĩ, Mũrũ wa mũndũ, rĩu ta aramia karima kau ke rũthingo-inĩ; na rĩrĩa ndatharirie rũthingo o hau karima-inĩ kau, ngĩcoka ngĩona mũrango. 9Nake akĩnjĩra atĩrĩ, Ta tonya, wone waganu wa maũndũ ma thahu marĩa mareka ho. 10Ngĩgĩtonya; na atĩrĩrĩ, ngĩona ndwere-inĩ ciothe cia rũthingo gũkururĩtwo mĩhianĩre ya mĩthemba yothe ya nyamũ iria ikurumaga, o na nyamũ irĩ mũgiro, o na ngai ciothe cia nyũmba ya Isiraeli cia mĩhianano ya kũhoyũo. 11Naho hau mbere yayo hakarũgama andũ mĩrongo mũgwanja a athuri a nyũmba ya Isiraeli, na gatagatĩ-inĩ kao hakarũgama Jaazania wa Shafani; na mũndũ o mũndũ wao aanyitĩte na guoko rũgĩo rũake rũa gũcinĩra ũbumba; naguo mũcingũ wa ndogo ya ũbumba ũgatogaga na igũrũ. 12Hĩndĩ ĩo agĩkĩnjĩra atĩrĩ, Mũrũ wa mũndũ, nĩwona maũndũ marĩa athuri a nyũmba ya Isiraeli mekaga na hitho me nduma-inĩ, mũndũ o mũndũ wao arũgamĩte nyũmba yake thĩinĩ ya mĩhianano? Amu moigaga atĩrĩ, Jehova ndegũtuona; Jehova nĩatigĩte kũrũmbũiya ũhoro wa bũrũri ũyũ. 13Ningĩ akĩnjĩra atĩrĩ, O na rĩu nĩũgũcoka kuona maũndũ mangĩ ma thahu makĩria marĩa mekaga. 14Hĩndĩ ĩo akĩndwara mũrango-inĩ wa kĩhingo kĩa nyũmba ya Jehova ũrĩa warorete gathigathini; na atĩrĩ, hagĩkorũo haikarĩte andũ-a-nja makĩrĩra nĩ ũndũ wa Tamuzu. 15Nake agĩkĩnjĩra atĩrĩ, Nĩwona ũndũ ũcio, wee mũrũ wa mũndũ? Ningĩ nĩũkuona maũndũ mangĩ manene me thahu moru makĩria gũkĩra macio.

16Nake akĩndwara o nja ĩrĩa ya thĩinĩ mũno ya nyũmba ya Jehova, na atĩrĩrĩ, o hau mũrango-inĩ wa hekarũ ya Jehova-rĩ, gatagatĩ-inĩ ga gĩthaku o na kĩgongona, hagĩkorũo harĩ ta andũ mĩrongo ĩĩrĩ na atano, mahutatĩire hekarũ ya Jehova, na makaroria mothiũ mao irathĩro-inĩ rĩa riũa; nao makĩinamĩrĩra riũa marĩhoe marorete na kũu irathĩro-inĩ. 17Hĩndĩ ĩo akĩnjũria atĩrĩ, Nĩwona ũndũ ũcio, wee mũrũ wa mũndũ? Anga ũcio nĩ ũndũ mũhũthũ mekaga, andũ acio a nyũmba ya Juda, meka maũndũ me thahu ta macio mareka haha? Nĩ ũndũ-rĩ, nĩmatũmĩte bũrũri ũiyũre maũndũ ma ũhinya, ningĩ magacoka gũ’thirĩkagia, nĩguo mandakarie; na rĩrĩ, ta one ũrĩa mehumbĩte maniũrũ mao na matathi! 18Tondũ ũcio niĩ o na niĩ-rĩ, ngameka maũndũ na mathũgũta, narĩo riitho rĩakwa rĩtigacayanĩra, o na kana njiguanĩre tha; na rĩrĩ, o na mangĩanĩrĩra matũ-inĩ makwa na mũgambo mũnene-rĩ, ndikamaigua.

Currently Selected:

EZEKIELI 8: OGKBIBLE

Highlight

Copy

Compare