EZEKIELI 6

1Ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ, 2Mũrũ wa mũndũ, roria ũthiũ waku irĩma-inĩ cia Isiraeli, ũcirathĩre ũhoro, 3uuge atĩrĩ, Inyuĩ irĩma ici cia Isiraeli, iguai ũhoro wa Mwathani Jehova; Mwathani Jehova nĩaarĩirie irĩma, na ithũngũri, o na cianda iria harũrũku, na ituamba, agaciĩra ũũ: Atĩrĩrĩ, niĩ, o niĩ mwene-rĩ, nĩngamũcomorithĩria rũhiũ rũa njora rũmũkore, namo matĩri manyu ma kũndũ gũtũũgĩru nĩngamatharia, 4nacio igongona cianyu nĩigatirikwo ikire ihooru, o nacio ngai cianyu cia mĩhianano ya kũhoya riũa ciunangwo; nao andũ anyu arĩa moragĩtwo ndĩmaikie o hau mbere ya mĩhianano yanyu ya kũhoyũo. 5Nĩngaikia ciimba cia ciana cia Isiraeli o hau mbere ya mĩhianano yacio ya kũhoyũo, o namo mahĩndĩ manyu ndĩmahurunje ndwere-inĩ ciothe cia igongona cianyu. 6Kũndũ kwanyu guothe kũrĩa mũtũũraga-rĩ, matũũra makuo nĩ kwanangwo makaanangwo biũ, namo matĩri makuo ma kũndũ gũtũũgĩru magatirikwo makire ihooru; nĩ getha igongona icio cianyu cianangwo, o na kũndũ kũrĩa irĩ gũkire ihooru, nayo mĩhianano yanyu ya kũhoyũo yunangwo yage gũcoka kuonwo, nacio ngai cianyu cia mĩhianano ya kũhoya riũa itemengwo, o namo mawĩra manyu more ta mahuurĩtwo makaninwo biũ. 7Nao andũ arĩa moragĩtwo makagũa o kũu thĩinĩ wanyu, na inyuĩ mũmenye atĩ niĩ nĩ niĩ Jehova. 8No rĩrĩ, nĩngamũtigĩria andũ amwe, tondũ nĩmũkagĩa na andũ amwe arĩa mahonokete kũũragwo na rũhiũ rũa njora kũu ndũrĩrĩ-inĩ, hĩndĩ ĩrĩa mũgakorũo mũhurunjĩirũo mabũrũri. 9Nao andũ anyu arĩa makahonoka nĩmakandirikana marĩ o kũu ndũrĩrĩ-inĩ, o kũndũ kũrĩa makarindũrĩrũo, maririkane ũrĩa ndĩmathuthĩte nĩ ũndũ wa ũrĩa ngoro ciao cianarũmĩrĩra ũmaraya, igatigana na niĩ, o na ngamaherithia nĩ ũndũ wa ũrĩa maitho mao maanagucĩrĩrio nĩ kwĩrirĩria mĩhianano ya kũhoyũo; nao nĩmagethũũra makĩĩona o ene, nĩ ũndũ wa maũndũ mothe moru marĩa mekaga ma thahu. 10Nao mamenye atĩ niĩ nĩ niĩ Jehova; tondũ ndiaaririe ndeto cia tũhũ rĩrĩa ndoigire atĩ nĩngameka ũũru ũcio.

11Ningĩ Mwathani Jehova oigĩte ũũ: Thukia guoko gwaku na ũgũthithie kũgũrũ thĩ, uuge atĩrĩ, Hĩ! Wũi-ĩiya nĩ ũndũ wa maũndũ mothe me thahu marĩa maanekwo nĩ andũ a nyũmba ya Isiraeli-ĩ! Nĩ ũndũ-rĩ, makagũa moragĩtwo na rũhiũ rũa njora, na mathirĩrĩkĩre nĩ ng’aragu, o na maninũkĩrĩrio nĩ mũthiro. 12Mũndũ ũrĩa wĩ kũraya-rĩ, akoragwo nĩ mũthiro, o nake mũndũ ũrĩa wĩ gũkuhĩ-rĩ, akagũa oragĩtwo na rũhiũ rũa njora; o nake ũrĩa ũkahonoka atigare aninwo nĩ ng’aragu; ũguo nĩguo ngamahingĩria mathũgũta makwa. 13Na inyuĩ nĩmũkamenya atĩ niĩ nĩ niĩ Jehova, hĩndĩ ĩrĩa andũ ao arĩa moragĩtwo magakorũo marĩ mĩhianano-inĩ yao ya kũhoyũo na marigicĩirie igongona ciao na ndwere ciothe, o gĩthũngũri-inĩ kĩrĩa gĩothe kĩraya, o na tũcũmbĩrĩ-inĩ tuothe twa irĩma, o na gĩtina-inĩ kĩa mũtĩ ũrĩa wothe mũruru, o na gĩtina-inĩ kĩa mũgandi ũrĩa wothe mũtungu, harĩa maacinagĩra mĩhianano yao yothe ya kũhoyũo mahuti marĩa manungaga wega. 14Na niĩ nĩngamatambũrũkĩria guoko gwakwa, na nĩngatũma bũrũri wanangĩke na ũkire ihooru kuuma o werũ-inĩ ũrĩa ũrorete Dibila, o kũndũ guothe kũrĩa matũũrĩte; nao makamenye atĩ niĩ nĩ niĩ Jehova.

Currently Selected:

EZEKIELI 6: OGKBIBLE

Highlight

Copy

Compare