EZEKIELI 20

1Na gũgĩkinya atĩrĩ, atĩ mwaka wa mũgwanja, mweri wa ĩtano, o mũthenya wa ikũmi wa mweri ũcio-rĩ, athuri amwe a Isiraeli magĩũka gũtuĩria ũhoro he Jehova, nao magĩikara thĩ o mbere yakwa. 2Nayo ndũmĩrĩri ya Jehova ĩkĩnginyĩrĩra ngĩĩrũo atĩrĩ, 3Mũrũ wa mũndũ, aria na athuri aya a Isiraeli, ũmere ũũ: Mwathani Jehova orĩtie atĩrĩ, Anga mũũkĩte gũtuĩria ũhoro harĩ niĩ? Mwathani Jehova oigĩte ũũ: O ta ũrĩa niĩ ndũũraga muoyo-rĩ, hatirĩ ũhoro ũngĩtuĩrio harĩ niĩ nĩ inyuĩ. 4Atĩrĩrĩ, wee mũrũ wa mũndũ, marũithie. Rũithia andũ acio, ũmamenyithie ũhoro wa maũndũ me thahu marĩa mekagwo nĩ maithe mao; 5#Thama 6.2-8.na ũmere atĩrĩ, Mwathani Jehova oigĩte ũũ: Mũthenya ũrĩa ndathurire Isiraeli, ndaambararĩirie rũciaro rũa nyũmba ya Jakubu guoko, ngĩmamenyithia maũndũ makwa me bũrũri wa Misiri, o hĩndĩ ĩo ndamaambararĩirie guoko, ngĩmera atĩrĩ, Niĩ nĩ niĩ Jehova Ngai wanyu. 6O mũthenya ũcio nĩguo ndamaambararĩirie guoko, ngiuga atĩ nĩngamaruta kũu bũrũri wa Misiri, ndĩmahire bũrũri ũrĩa ndamathiganĩire, o bũrũri wĩ bũthi wa iria o na ũũkĩ, naguo nĩguo mwagĩru gũkĩra mabũrũri marĩa mangĩ mothe. 7Ningĩ ngĩcoka ngĩmera atĩrĩ, Inyuothe, mũndũ o mũndũ, nĩatigane na maũndũ me thahu marĩa endithagia maitho, na atige gwĩthũkia na mĩhianano ya kũhoyũo ya Misiri; niĩ nĩ niĩ Jehova Ngai wanyu. 8No rĩrĩ, nĩmaanemire makĩnjũkĩrĩra, na matiigana kũnjigua; nao othe, mũndũ o mũndũ wao, matiigana gũtigana na maũndũ me thahu marĩa mendithagia maitho mao, o na kana matirike mĩhianano ya kũhoyũo ya Misiri. Hĩndĩ ĩo niĩ na niĩ ngiuga atĩ nĩngũmaguthũkĩra na mathũgũta makwa, na ndĩmahingĩrie marakara makwa me kũu bũrũri wa Misiri. 9No rĩrĩ, niĩ mwene nĩndekire ũndũ ũngĩ nĩ ũndũ wa rĩĩtwa rĩakwa kĩũmbe, nĩ getha rĩtigathahio ndũrĩrĩ-inĩ iria maatũũranagia nacio, o icio cionaga ngĩĩmenyithia harĩ cio na ũndũ wa gũciruta bũrũri wa Misiri. 10Ũguo nĩguo ndatũmire mathiĩ moime bũrũri wa Misiri, ngĩkĩmatwara werũ-inĩ. 11#Alaw 18.5.Ngĩcoka ngĩmahe mawatho ma irĩra ciakwa cia kũrũmĩrĩrũo, na ngĩmonia matuĩro makwa ma cira, namo mũndũ angĩmeka, aatũũrio nĩmo 12#Thama 31.13-17.O na ningĩ makĩria ngĩmahe kĩrĩra gĩakwa kĩa mĩthenya ya thabatũ, nĩguo thabatũ icio ituĩke kĩmenyithia kĩa ũiguano witũ nao, nĩ getha mamenye atĩ niĩ nĩ niĩ Jehova ũrĩa ũmaamũraga ngamatheria. 13No rĩrĩ, nyũmba ya Isiraeli nĩyaaganĩre ĩkĩnema ĩrĩ o kũu werũ-inĩ; nao andũ ayo matiigana gũthiĩ na mĩthiĩre ya kũrũmĩrĩra irĩra ciakwa cia watho wa kũrũmĩrĩrũo, no nĩmaaregire matuĩro makwa ma cira, o macio mũndũ angĩmeka, aatũũrio nĩmo nacio thabatũ ciakwa magicithahia mũno.

Hĩndĩ ĩo ngĩkiuga nĩngũmaguthũkĩra na mathũgũta makwa o kũu werũ-inĩ, nĩ getha ndĩmanine biũ. 14No rĩrĩ, niĩ mwene ndekire ũndũ ũngĩ nĩ ũndũ wa rĩĩtwa rĩakwa kĩũmbe, nĩ getha rĩtikae gũthahio ndũrĩrĩ-inĩ, o icio cieyonagĩra ngĩmaruta kuo. 15#Ndar 14.26-35.O na ningĩ atĩrĩ, nĩndamaambararĩirie guoko gwakwa o kũu werũ-inĩ, ngiuga atĩ ndikũmatwara bũrũri ũrĩa ndamaheete, o ũcio wĩ bũthi wa iria na ũũkĩ, na nĩguo mwega gũkĩra mabũrũri marĩa mangĩ mothe; 16nĩ ũndũ nĩmaaregire matuĩro makwa ma cira, na makĩrega irĩra cia watho wakwa wa kũrũmĩrĩrũo, na magĩthahia thabatũ ciakwa; nĩ gũkorũo ngoro ciao nĩcierirĩirie mĩhianano yao ya kũhoyũo. 17No rĩrĩ, maitho makwa nĩmaamacaĩire ngĩtiga kũmanina, o na kũmahukĩria biũ kũu werũ-inĩ. 18Ngĩkĩĩrĩra ciana ciao irĩ o kũu werũ-inĩ atĩrĩ, Tigai kũrũmĩrĩra irĩra cia watho wa maithe manyu, o na kana mũrũmbũiye matuĩro mao ma cira, o na kana mwĩthũkie na mĩhianano yao ya kũhoyũo. 19Niĩ nĩ niĩ Jehova Ngai wanyu; rũmagĩrĩrai irĩra cia watho wakwa wa kũrũmĩrĩrũo, na mũmenyagĩrĩre matuĩro makwa ma cira, na mũmekage; 20na mwamũrage thabatũ ciakwa nĩguo ituĩke kĩmenyithia kĩa ũiguano witũ na inyuĩ, nĩ getha mũmenye atĩ niĩ nĩ niĩ Jehova Ngai wanyu. 21No rĩrĩ, ciana icio nĩciaaganire ikĩnema; na itiigana kũrũmĩrĩra ĩrĩra cia watho wakwa wa kũrũmĩrĩrũo, o na kana ikĩmenyerera matuĩro makwa ma cira marĩa ndacituĩrĩire, namo nĩmo marĩa mũndũ angĩmeka aatũũrio nĩmo; no nĩ gũthahia maathahirie gĩathĩ gĩa thabatũ ciakwa. Hĩndĩ ĩo niĩ ngĩkiuga atĩ nĩngũmaitĩra mathũgũta makwa, nĩ getha ’hingĩrie marakara makwa harĩ o kũu werũ-inĩ. 22No rĩrĩ, nĩ gũthuna ndathunire guoko gwakwa nĩ ũndũ wa rĩĩtwa rĩakwa kĩũmbe, nĩ getha rĩtikae gũthahio ndũrĩrĩ-inĩ iria cieyoneire ngĩmaruta kuo. 23#Alaw 26.33.O na ningĩ atĩrĩ, nĩndamaambararĩirie guoko gwakwa o kũu werũ-inĩ, ngiuga atĩ ndĩmaharaganĩrie ndũrĩrĩ-inĩ, na ndĩmahurunjĩre mabũrũri-inĩ; 24nĩ ũndũ matiahingirie matuĩro makwa ma cira, no nĩ kũrega maaregire irĩra cia watho wakwa wa kũrũmĩrĩrũo, na magĩthahia gĩathĩ gĩa thabatũ ciakwa, na makĩendithia maitho mao mĩhianano ya kũhoyũo ya maithe mao. 25O na ningĩ atĩrĩ, ngĩmarehithĩria irĩra cia watho wa kũrũmĩrĩrũo iria itaarĩ njega, o na ngĩmatuĩra matuĩro ma cira marĩa matangĩmatũũria. 26Na rĩrĩ, tondũ wa ũrĩa maahĩtũkithagĩria marigithathi mao mothe mwaki-inĩ, niĩ na niĩ ngĩmagwatia thahu na ũndũ wa mahaki macio maarutaga o ene, nĩ getha ndĩmaanangithie; na mamenye ũguo atĩ niĩ nĩ niĩ Jehova.

27Tondũ ũcio, wee mũrũ wa mũndũ, aria na andũ a nyũmba ya Isiraeli, ũmere atĩrĩ, Mwathani Jehova oigĩte ũũ: O na ningĩ atĩrĩ, makĩria ma maũndũ macio-rĩ, maithe manyu nĩmanumĩte, makanjĩhia nĩ kwagarara watho. 28Nĩ ũndũ hĩndĩ ĩrĩa ndakorirũo ndĩmarehete bũrũri ũyũ, naguo nĩguo ndaambararĩirie guoko gwakwa na igũrũ ngiuga atĩ nĩngamahe-rĩ, hĩndĩ ĩrĩa yothe maacokire kuona ithũngũri ndaya na igũrũ, o na kana mũtĩ mũtungu, magĩkĩrutĩra magongona mao kuo, nakuo kũu nĩkuo maa’thirĩkĩirie na mahaki macio maarutagĩra kuo, o na ningĩ nokuo maacinagĩra indo iria irĩ mũtararĩko ũrĩa ũnungaga wega, na nokuo maaitangaga magongona mao ma indo cia kũnyuwo. 29Hĩndĩ ĩo niĩ na niĩ ngĩmoria atĩrĩ, Gĩtũmi gĩa itĩri rĩu rĩĩ kũndũ gũtũũgĩru, o kũu mũthiaga-rĩ, nĩ kĩ? Na tondũ ũcio kũndũ kũu gwĩtagwo Bama o na ũmũthĩ. 30Na tondũ wa maũndũ macio, ĩra andũ a nyũmba ya Isiraeli atĩrĩ, Mwathani Jehova oigĩte ũũ: Anga mũgwĩthũkia o ta ũrĩa maithe manyu methũkagia, mũkerirĩria maũndũ mao me thahu, ta mwendete gũtharia namo o na inyuĩ? 31O na ningĩ-rĩ, hĩndĩ ĩrĩa mũkũruta iheo cianyu, na rĩrĩa mũkũhĩtũkithĩria ariũ anyu mwaki-inĩ-rĩ, to gwĩthũkia mwĩthũkagia na mĩhianano yanyu yothe ya kũhoyũo, o na ũmũthĩ? Na githĩ ũhoro wagĩtuĩrio harĩ niĩ nĩ inyuĩ, inyuĩ andũ aya a nyũmba ya Isiraeli? Mwathani Jehova akiugĩte atĩrĩ, O ta ũrĩa niĩ ndũũraga muoyo-rĩ, hatirĩ ũhoro ũngĩtuĩrio harĩ niĩ nĩ inyuĩ. 32O namo maũndũ marĩa mũcũranagia na meciria manyu matikoneka o na atĩa; nĩ ũndũ muugaga atĩrĩ, Nĩtũgũtuĩka o ta ndũrĩrĩ iria ingĩ, na tũtuĩke ta mĩhĩrĩga ĩrĩa ya mabũrũri marĩa mangĩ, nĩguo tũhoyage mĩtĩ na mahiga.

33Mwathani Jehova oigĩte atĩrĩ, O ta ũrĩa niĩ ndũũraga muoyo-rĩ, ti-itherũ ngamũthamakĩra na hinya, ndĩmũtambũrũkĩirie guoko gwakwa, na ndĩmũitĩire mathũgũta makwa; 34na nĩngamũruta ndũrĩrĩ-inĩ, na ndĩmũcokererie ndĩmũrute mabũrũri-inĩ kũndũ kũrĩa mũharaganĩirio na guoko kwĩ hinya, o na guoko gũtambũrũkĩtio, na gũitĩtwo mathũgũta. 35Na nĩngamũhira werũ-inĩ wa ndũrĩrĩ, nakuo kũu nĩkuo tũgacirĩra na inyuĩ tũkĩonanaga ũthiũ na ũthiũ. 36O ta ũrĩa twacirĩire na maithe manyu werũ-inĩ wa bũrũri wa Misiri-rĩ, ũguo noguo tũgacira na inyuĩ; ũguo nĩguo Mwathani Jehova oigĩte. 37Ngamũhĩtũkithĩria ruungu rũa rũthanju rũa ũrĩithi nĩguo ndĩmuohanie na kĩrĩkanĩro gĩakwa. 38Na nĩngamũtheria na ũndũ wa kũmwehereria aremi arĩa me thĩinĩ wanyu, o na arĩa maagararaga watho wakwa; na ngamaruta bũrũri ũrĩa matũire marĩ ageni, no matigatonya bũrũri wa Isiraeli; na nĩmũkamenya atĩ niĩ nĩ niĩ Jehova. 39Naho ha ũhoro wanyu, inyuĩ andũ a nyũmba ya Isiraeli, Mwathani Jehova oigĩte ũũ: Thiĩi, mũndũ o mũndũ wanyu akahoe mĩhianano yake ya kũhoyũo, no rĩrĩ, gũtirĩ hingo mũtagacoka kũnjigua, narĩo rĩĩtwa rĩakwa mũtigacoka kũrĩthahia na mahaki manyu, o na kana mĩhianano yanyu.

40Tondũ Mwathani Jehova ekuuga ũũ: Kũu kĩrĩma-inĩ gĩakwa gĩtheru, o kũu kĩrĩma-inĩ kĩrĩa gĩtũũgĩru gĩa Isiraeli-rĩ, nĩkuo nyũmba yothe ya Isiraeli, o yothe biũ, ĩkandungatagĩra bũrũri ũcio wothe; kũu nĩkuo ngametĩkĩrĩra, na nĩkuo ngabatarĩrio nĩ magongona manyu, o na irio cianyu cia mũro wa mbere thĩinĩ wa indo iria mũrutaga, hamwe na indo cianyu ciothe iria nyamũre. 41Ngamwĩtĩkĩra o ta mũrĩ mũtararĩko ũrĩa ũnungaga wega ũkĩiguwo nĩ niĩ, o hĩndĩ ĩrĩa ngamũruta ndũrĩrĩ-inĩ, na ndĩmũcokererie muume mabũrũri-inĩ marĩa mũhurunjũkĩire, nacio ndũrĩrĩ ĩrĩa ingĩ nĩikeyonera ũrĩa nduĩtwo mũtheru thĩinĩ wanyu. 42Na inyuĩ nĩmũkamenya atĩ niĩ nĩ niĩ Jehova, hĩndĩ ĩrĩa ngamũcokia bũrũri wa Isiraeli, o bũrũri ũcio ndaambararĩirie guoko gwakwa na igũrũ ngiuga atĩ bũrũri ũcio nĩguo ngaũhe maithe manyu. 43Nakuo kũu nĩkuo mũkaririkanĩra mĩthiĩre yanyu, o na ciĩko cianyu ciothe, iria mwĩthahĩtie nacio; na inyuĩ nĩmũkemena inyuene mwĩone ta mwĩ magigi, nĩ ũndũ wa ũũru wanyu wothe ũrĩa mwaneka. 44Na nĩmũkamenya atĩ niĩ nĩ niĩ Jehova, hĩndĩ ĩrĩa ngakorũo ndĩmwĩkĩte ũndũ ũcio nĩ ũndũ wa rĩĩtwa rĩakwa niĩ mwene, na ndimwĩke ũndũ ũrĩa ũringaine na ũrĩa mĩthiĩre yanyu mĩũru ĩtariĩ, o na kana ta ũrĩa ciĩko iria thũku mũno cianyu itariĩ, inyuĩ andũ a nyũmba ya Isiraeli; ũguo nĩguo Mwathani Jehova oigĩte.

45Ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ, 46Mũrũ wa mũndũ, ikara ũroretie ũthiũ waku mwena wa gũthini, o naguo ũhoro waku ũũhunjanĩrie ũũroretie na kũu gũthini, ũcoke ũrathe mohoro makoniĩ kĩrĩti kĩrĩa kĩrĩ werũ wa Gũthini; 47wĩre kĩrĩti kĩu gĩa Gũthini atĩrĩ, Ta igua ũhoro wa Jehova; Mwathani Jehova oigĩte ũũ: Atĩrĩrĩ, ngaakia mwaki o kũu thĩinĩ waku, naguo nĩũkarĩa tũmĩtĩ tuothe tũrĩa tũruru thĩinĩ waku ũtũnine, o na ũnine mũtĩ o wothe ũrĩa mũũmũ; naruo rũrĩrĩmbĩ rũrĩa rũkarĩrĩmbũka rũtikahoreka, nao andũ othe kuuma o gũthini nginya o gathigathini nĩmakahĩa mothiũ nĩruo. 48Nao andũ othe arĩa magakorũo marĩ o ho nĩmakona atĩ niĩ nĩ niĩ ndĩwakĩtie; na ndũkahoreka. 49Hĩndĩ ĩo niĩ na niĩ ngĩkiuga atĩrĩ, Hĩ! Mwathani Jehova, ha ũhoro wakwa mekuuga atĩrĩ, Githĩ ũyũ tiwe waragia maũndũ na ngerekano?

Currently Selected:

EZEKIELI 20: OGKBIBLE

Highlight

Copy

Compare