EZEKIELI 19

1O na ningĩ atĩrĩ, itĩkana na macakaya ũcakaĩre anene a Isiraeli, 2na ũmorie ũũ: Nyũkwa aarĩ ũ? Aatariĩ ta mũrũthi wa mũgoma. Nĩ kũmaama wamaamire kĩmaamo-inĩ kĩa mĩrũthi ĩrĩa ĩngĩ, na ũkĩongithĩria ciana ciaguo o kũu kĩmaamo-inĩ kĩa njaũ iria ingĩ cia mĩrũthi. 3Naguo ũgĩkĩrera kĩana kĩmwe kĩaguo, gĩgĩtuĩka nyanake; nakĩo gĩkĩĩruta ũnyiti wa gĩa kũrĩa, ĩgĩgĩcoka kũrĩaga andũ. 4O nacio ndũrĩrĩ ikĩigua ngumo yakĩo, nakĩo gĩkĩgwatĩrio irima-inĩ rĩrĩa ciagĩtegete, nacio igĩgĩtwara bũrũri wa Misiri kĩgucĩtio na icũhĩ cia maniũrũ. 5Na rĩrĩ, hĩndĩ ĩrĩa mũrũthi ũrĩa warĩ nyina wakĩo wonire atĩ nĩwagĩetereire tũhũ, na atĩ kĩĩrĩgĩrĩro kĩaguo nĩkĩũrĩte-rĩ, hĩndĩ ĩo ũgĩcoka ũgĩthura kĩana kĩngĩ gĩa ciana ciaguo, ũgĩkĩrera, nakĩo gĩgĩtuĩka nyanake. 6Nayo ĩgĩcanga kũndũ guothe kũrĩa mĩrũthi yacangaga, ĩtuĩkĩte nyanake ya mũrũthi, ningĩ ĩkĩĩruta ũnyiti wa gĩa kũrĩa, ĩgĩgĩcoka kũrĩa andũ. 7O na ningĩ ĩkĩhũthĩra gũthiĩ nyũmba-inĩ ciao cia ũnene, na ĩkĩananga matũũra mao, o nginya bũrũri ũkĩanangĩka wothe, na ũgĩthira indo ciothe iria ciaiyũrĩte kuo, nĩ ũndũ wa mũrurumo wa mũraramo wayo, ĩtanyĩte ũnyiti wa gĩa kũrĩa. 8Hĩndĩ ĩo ndũrĩrĩ ikĩmĩtharĩkĩra imiumĩte na ndwere ciothe, o na ng’ongo ciothe, ikĩmĩambĩra mũtego; nayo ĩkĩgwatĩrio irima-inĩ rĩrĩa ciamĩtegete. 9Nacio ikĩmĩhingĩra gĩthandũkũ-inĩ gĩtumĩtwo ta rũgara, ĩĩkĩrĩtwo icũhĩ cia maniũrũ, ikĩmĩtwara kwĩ mũthamaki wa Babuloni; ĩgĩtwarũo ĩkĩhingĩrũo ihingo-inĩ iria nũmu, nĩ getha mũrurumo wa mũraramo wayo ndũkanacoke kũiguwo rĩngĩ o na rĩ kũu irĩma-inĩ cia Isiraeli.

10Ningĩ nyũkwa aatariĩ ta mũthabibu, nawe ũkamũtũkia; naguo tondũ wahandĩtwo hũgũrũrũ-inĩ cia maĩ, warĩ mũciaru mũno na ũkaiyũrũo nĩ honge nĩ ũndũ wa ũrĩa maĩ maingĩhĩte. 11Nacio hwang’a ciaguo ikĩgĩa hinya ta arĩ cio tũmĩthĩgi twa wathani twa arĩa maathanaga, nakĩo kĩũga kĩaguo gĩkĩraiha o nginya gacũmbĩrĩ kaguo gakĩhutia matu marĩa mathimbu, nacio honge icio ndaya igakũũragĩrũo maitho nĩ ũndũ wa ũrĩa hwang’a ciacio ciaingĩhĩte. 12No rĩrĩ, nĩ kũmunyũo wamunyanĩirio na mĩri yaguo nĩ ũndũ wa mathũgũta, ũgĩikio ũkĩgũithio o thĩ tĩri-inĩ, namo maciaro maguo makĩũmio nĩ rũhuho rũrĩa ruumaga na mwena wa irathĩro, nacio hwang’a ciaguo iria ciarĩ na hinya ikiunangwo ikĩũma, ikĩhĩa nĩ mwaki, ikĩninwo biũ. 13Na rĩrĩ, rĩu ũhandĩtwo werũ-inĩ, o bũrũri ũrĩa mũũmũ na wĩ nyota. 14Ningĩ nĩ ta mwaki wambatĩte mũtĩ-inĩ ũcio, na ũkoimĩra na kũu kwĩ honge ciaguo, ũgacina maciaro maguo, na tondũ ũcio thĩinĩ waguo hatirĩ rũhwang’a o na rũmwe rũĩ na hinya ta arĩ ruo kamũthĩgi ka wathani. Maya nĩmo macakaya, na nĩmo maũndũ marĩa marĩcakayanagĩrũo namo.

Currently Selected:

EZEKIELI 19: OGKBIBLE

Highlight

Copy

Compare