EZEKIELI 21

1Ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ, 2Mũrũ wa mũndũ, ikara ũroretie ũthiũ waku Jerusalemu, naguo ũhoro waku ũũhunjanĩrie ũũroretie handũ harĩa haamũre, ũcoke ũrathe mohoro makoniĩ bũrũri wa Isiraeli; 3wĩre bũrũri ũcio wa Isiraeli atĩrĩ, Jehova oigĩte ũũ: Atĩrĩrĩ, ndĩ wa kũhũrana nawe, naruo rũhiũ rũakwa rũa njora nĩngũrũcomora ndĩrũrute njora, na ngwehererie andũ arĩa athingu o na arĩa aaganu ndĩmaninũkie. 4Na rĩrĩ, kuona atĩ ngakwehereria andũ arĩa athingu o na arĩa aaganu maninũke-rĩ, tondũ ũcio, rũhiũ rũakwa rũa njora rũgacomoka njora rũnine andũ othe kuuma o gĩturi gĩa gũthini nginya o gathigathini; 5nao andũ othe nĩmakamenya atĩ niĩ Jehova nĩ niĩ njomorete rũhiũ rũakwa rũa njora; na rũtigacokio njora rĩngĩ o na atĩa. 6Tondũ ũcio, wee mũrũ wa mũndũ, caya, ũcaĩre mbere yao magĩkuonaga, o ta ũthenyũkĩtwo nĩ mahĩndĩ, na wĩ na kĩeha kĩnene. 7Na nĩgũgakinya atĩrĩ, atĩ rĩrĩa magakũũria atĩrĩ, Ũracaiyo nĩ kĩ? Nawe ũkiuge ũũ: Nĩ njukũ cia ũhoro ũrĩa njiguĩte iranjaiya, naguo ũhoro ũcio nĩ gũũka ũroka. Na rĩrĩ, ngoro ciothe nĩikaringĩka, namo moko mothe maage hinya, o namo maroho mothe maringwo nĩ iringi, o namo maru mothe manyegenye o ta ũrĩa maĩ mereraga. Atĩrĩrĩ, ũhoro ũcio no gũũka ũroka, na ndũrĩ hingo ũtakahingio; ũguo nĩguo Mwathani Jehova oigĩte.

8Nayo ndũmĩrĩri ya Jehova ĩkĩnginyĩrĩra, ngĩĩrũo atĩrĩ, 9Mũrũ wa mũndũ, ratha ũhoro, uuge atĩrĩ, Jehova oigĩte ũũ: Uga atĩrĩ, He rũhiũ rũa njora, he rũhiũ rũa njora, na nĩ rũnoore rũkohĩga, o na ningĩ nĩrũthũĩtwo rũkahenia; 10rũnooretwo rũkohĩga nĩ getha rũũragane, ningĩ rũthũĩtwo nĩ getha rũhenie o ta rũheni. Anga nĩtũgĩkene, kuona atĩ mũthĩgi wa kũhũra mũrũ wakwa ndũrĩ mũtĩ o na ũrĩkũ ũngĩũkĩria hinya? 11Naruo rũhiũ rũu rũneanĩtwo nĩguo rũthũo wega, nĩ getha rũnyitwo na guoko; rũhiũ rũu rũa njora nĩrũnooretwo rũkohĩga; ĩĩ, ti-itherũ rũgathũo, nĩ getha rũneanwo moko-inĩ ma mũũragani. 12Ta rĩra ũkĩanũkaga, wee mũrũ wa mũndũ, nĩ ũndũ rũcomoreirũo andũ akwa, na rũgacomorerũo atongoria othe a Isiraeli; nĩmarekereirio makaneanwo rũhiũ-inĩ rũa njora me hamwe na andũ akwa; tondũ ũcio wĩgũthe kĩero. 13Nĩ ũndũ-rĩ, ũhoro wa gũcirithanio wĩ kuo; na rĩrĩ, gũgagĩkinya atĩa, kũngĩkorũo mũthĩgi ũcio nĩwagithĩtio kĩene nĩ rũhiũ rũu? Ũguo nĩguo Mwathani Jehova orĩtie.

14Tondũ ũcio, mũrũ wa mũndũ, ta ratha ũhoro, na ũhũre hĩ; naruo rũhiũ rũu rũa njora rũcokererio kerĩ o na gatatũ, naruo nĩ rũhiũ rũa kũgurarania nguraro cia gĩkuũ, na nĩruo rũa kũguraria ũrĩa mũnene nguraro ya gĩkuũ; ningĩ nĩruo rũmoimĩte na ndwere ciothe. 15Nĩnjigĩte rũhiũ rũu rũa njora rũĩ itua-nda rũmang’ethere ihingo-inĩ ciao ciothe, nĩ getha ngoro ciao iringĩke, naguo ũhoro wao wa kũhĩngithio ũingĩhio mũno ma. Rũthũĩtwo nĩguo rũhenie o ta rũheni, na rũkanoorũo rũtuĩke rũa kũũragana. 16Nĩrũnyitwo wega, rũikio na mwena wa ũrĩo, ningĩ rũambarario na rũikio na mwena wa ũmotho; ningĩ rũikio na harĩa ũrorete na ũthiũ waku. 17Niĩ o na niĩ ngahũra hĩ, njoke ndĩĩnine mathũgũta makwa nao. Niĩ Jehova, nĩ niĩ njarĩtie ũhoro ũcio.

18Nayo ndũmĩrĩri ya Jehova ĩkĩnginyĩrĩra rĩngĩ, ngĩĩrũo atĩrĩ, 19O na ningĩ atĩrĩ, mũrũ wa mũndũ, wĩkururĩre njĩra igĩrĩ, nĩ getha rũhiũ rũa njora rũa mũthamaki wa Babuloni rũgacigera; nacio cierĩ ikoima bũrũri ũmwe. Naho hau maahũkanĩro-inĩ wĩkĩre rũũri rũa kuonania harĩa njĩra ikũgera irorete itũũra-inĩ. 20Ningĩ wĩtemere njĩra ya kũgerũo nĩ rũhiũ rũrĩa rũgathiĩ rũrorete Raba, itũũra rĩa ciana cia Amoni, o na ĩngĩ ya kũgerũo nĩruo rũgĩthiĩ bũrũri wa Juda rũrorete Jerusalemu, itũũra rĩrĩa rĩirigĩtwo. 21Nĩ gũkorũo mũthamaki wa Babuloni arũgamĩte maahũkanĩro-inĩ ma njĩra, o kũu mĩthia-inĩ ya njĩra icio cierĩ nĩguo atuĩrie nyoni yake; na agathukia mĩguĩ ĩrĩ thiaka-inĩ ta mwano, na akaragũria mĩhianano ya kũhoya ngai nayo o na akarora maũthĩ ma ini. 22Nayo nyoni yake ĩrĩa ĩmũgũĩrĩire guoko gwake kwa ũrĩo nĩ ĩrĩa ĩrorete Jerusalemu, nĩ getha aigithie mĩgogo mĩtungu ya kũmomora rũirigo rũarĩo, na agirĩkĩre rĩũragana, na oigĩrĩrie o kuugĩrĩria. Ĩĩ, ti-itherũ nĩakaigithia mĩgogo mĩtungu ya kũmomora ihingo ciarĩo, na aithithie ihumbu nene cia tĩri rũirigo-inĩ rũarĩo na aakithie inyamũ ndaya na igũrũ cia mũtharĩko irigicĩrie itũũra rĩu. 23Nao acio maamwĩhĩtĩire mwĩhĩtwa nĩmakona nyoni ĩo yake ta ĩrĩ ũndũ wa tũhũ; no rĩrĩ, we mwene nĩagatũma ũũru wao ũririkanwo, nĩ getha monwo ngwatĩro.

24Tondũ ũcio Mwathani Jehova oigĩte ũũ: Nĩ kũnyitwo mũkanyitwo na guoko gwake, tondũ nĩmũtũmĩte ũũru wanyu ũririkanwo, nĩ ũndũ wa ũrĩa maũndũ manyu ma kwagarara watho maguũkĩte, o nginya ciĩko cianyu ciothe ikonwo atĩ no cia mehia, na maũndũ manyu mothe makaririkanwo. 25Nawe, wee mũtongoria wa Isiraeli, o wee mwaganu ũyũ ũgurarĩtio nguraro ya gĩkuũ, mũthenya waku nĩũgũkinyĩrĩire, o ihinda rĩrĩa rĩa iherithania rĩa kũrigĩrĩria; 26Mwathani Jehova oigĩte ũũ: Nĩngũkwehereria kĩremba gĩaku kĩa mũtwe, na ngũrute tanji; maũndũ mothe nĩmakagarũrũka na maticoke gũikara ta ũrĩa megũtũire. Tũũgĩria ũrĩa mũnyinyi, o nake ũrĩa mũnene nĩahomio o kũhomio. 27Ngainamania itũũra rĩu, ndĩrĩinamanie o kũrĩinamania, na rĩticoke gwakwo rĩngĩ o na atĩa, o nginya rĩrĩa hagoka ũrĩa wĩ na kĩhooto gĩa kũrigia narĩo; na nĩwe ngarĩhe.

28 # Jer 49.1-6; Ezek 25.1-7; Amos 1.3-15; Zef 2.8-11. Wee nawe, mũrũ wa mũndũ, ratha ũhoro, uuge atĩrĩ, Ha ũhoro ũkoniĩ ciana cia Amoni, na rũmena rũrĩa imũmenagĩrĩria naruo, Mwathani Jehova oigĩte ũũ: Wee uga atĩrĩ, He rũhiũ rũa njora, he rũhiũ rũa njora, na nĩ rũcomore, nĩguo rũũragane; nĩrũthũĩtwo mũno nĩ getha rũhenie o ta rũheni, 29o rĩrĩa muonagĩrũo cioneki cia tũhũ o na mũkaragũrĩrũo ũragũri wa maheni; nĩguo rũmũhũre ngingo, mũgũithio, inyuĩ andũ acio aaganu mũgurarĩtio nguraro cia gĩkuũ. Mũrĩ akinyĩrĩre nĩ mũthenya wanyu, o ihinda rĩa iherithania rĩa kũrigĩrĩria. 30Reka rũcoke njora-inĩ yaruo. O kũndũ kũrĩa wombĩirũo, kũu bũrũri ũrĩa waciarĩirũo-rĩ, nĩkuo ngagũcirithĩria. 31Na nĩngagũitĩra mang’ũrĩka makwa, na ngũhũmũkĩre mĩhũmũ ya marakara makwa mahaana mwaki, na ngũrekererie ngũneane moko-inĩ ma andũ mahaana ta nyamũ, ohĩgĩrĩru ũninani. 32Wee nĩwe ũgatuĩka ngũ cia gwakĩrĩria mwaki ũcio, nayo thakame yaku ĩgaitĩka o kũu thĩinĩ wa bũrũri ũcio; nawe ndũgacoka kũririkanwo rĩngĩ o na rĩ; nĩ gũkorũo niĩ Jehova nĩ niĩ njarĩtie ũhoro ũcio.

Currently Selected:

EZEKIELI 21: OGKBIBLE

Highlight

Copy

Compare