EZEKIELI 18

1Na rĩrĩ, ndũmĩrĩri ya Jehova ĩgĩcoka ĩkĩnginyĩrĩra, ngĩũrio atĩrĩ, 2#Jer 31.29.Nĩ kĩ gĩtũmaga mũgwete bũrũri wa Isiraeli na thimo ĩno, mũkiuga atĩrĩ, Maithe ma ciana marĩĩte thabibu irĩ rũagatha, namo magego ma ciana makaigua thithi? 3Na rĩrĩ, Mwathani Jehova ekuuga atĩrĩ, O ta ũrĩa niĩ ndũũraga muoyo-rĩ, mũtigacoka kũgweta thimo ĩo bũrũri wa Isiraeli. 4Atĩrĩrĩ, maroho mothe nĩ makwa; roho wa ithe nĩ wakwa, o na wa mũriũ no wakwa; na rĩrĩ, roho ũrĩa wĩhagia nĩguo ũgakua. 5No rĩrĩ, mũndũ angĩthinga, na eke maũndũ marĩa maagĩrĩire na ma ũthingu, 6na aage kũrĩa irio iria irutĩirũo kĩrĩma igũrũ cia magongona, o na kana ainamũrĩre mĩhianano ya kũhoyũo ya nyũmba ya Isiraeli maitho, o na kana athũkie mũka wa mũndũ ũrĩa ũngĩ, o na kana athengerere mũndũ-wa-nja rĩrĩa e na ihinda rĩa mweri; 7na akorũo atehĩtie mũndũ o na ũrĩkũ, na akorũo nĩacokeirie mũndũ ũrĩa wĩ na thirĩ nake kĩndũ kĩrĩa aaigĩte harĩ we gĩa gũgakũũrũo, na atatunyĩte mũndũ na hinya, na aheete ũrĩa mũhũtu irio ciake we mwene, o nake ũrĩa wĩ njaga akamũhumba nguo; 8na ũrĩa wohorithagia indo ategwĩtia uumithio wacio ũtarĩ wa kĩhooto, o na kana akoya uumithio wacio o na ũrĩkũ; ũrĩa ũtahutagia maũndũ mataagĩrĩire, na agatuithania cira na kĩhooto, 9#Alaw 18.5.na akahingia irĩra cia watho wakwa wa kũrũmĩrĩrũo, na akamenyerera matuĩro makwa ma cira, nĩguo ekage maũndũ ma kĩhooto; mũndũ ũcio-rĩ, nĩ mũthingu, na ti-itherũ nĩagatũũra muoyo; ũguo nĩguo Mwathani Jehova oigĩte. 10No rĩrĩ, angĩciara mwanake mũtunyani, mũitithia thakame, ũrĩa wĩkaga ũndũ o na ũmwe wa maũndũ macio moru, 11na akaaga gwĩka ũndũ o na ũmwe wa maũndũ marĩa aagĩrĩirũo nĩ gwĩka, no atuĩke nĩ mũndũ ũrĩaga irio iria irutĩirũo kĩrĩma igũrũ cia magongona, na agathũkia mũka wa mũndũ ũngĩ, 12na akehia mũthĩni na mũndũ mũkĩa, na agathara mũndũ indo ciake na ũmaramari, na akarega gũcokia indo iria aatigĩirũo nĩguo igakũũrũo, na akainamũrĩra mĩhianano ya kũhoyũo maitho, na ageka maũndũ marĩa me thahu, 13na akohoranĩra indo agĩĩtagia uumithio wacio ũtarĩ wa kĩhooto, na akoya uumithio o wothe; ũcio-rĩ, githĩ nĩagagĩtũũra muoyo? Ndagatũũra muoyo, tondũ nĩekĩte maũndũ macio mothe me thahu; ti-itherũ ndarĩ hingo atagakua; nĩwe mwene ũgacokererũo nĩ thakame yake. 14Na rĩrĩ, hihi angĩciara mwanake ũrĩa ũkuona mehia macio mothe ma ithe, o macio ekĩte, na etigĩre, na aage gwĩka maũndũ ta macio, 15akĩage kũrĩa irio iria irutĩirũo kĩrĩma igũrũ cia magongona o na kana ainamũrĩre mĩhianano ya nyũmba ya Isiraeli maitho, kana athũkie mũka wa mũndũ ũrĩa ũngĩ, 16na akorũo atehĩtie mũndũ o na ũrĩkũ, na ndoe kĩndũ o na kĩ atĩ nĩguo agakũũrĩrũo, o na kana agĩthare indo ciene na ũmaramari, no nĩ kũhe aheete irio ciake mũndũ ũrĩa mũhũtu, na akahumba mũndũ ũrĩa wĩ njaga nguo; 17ũrĩa ũtagũthaga mũthĩni, kana agwate uumithio wa indo iria ohoranĩire ũtarĩ wa kĩhooto, o na kana agwate uumithio wacio o na ũrĩkũ; ũrĩa ũhingagia matuĩro makwa mothe ma cira, na akahingia irĩra cia watho wakwa wa kũrũmĩrĩrũo; mũndũ ũcio-rĩ, ndagakua nĩ ũndũ wa mehia ma ithe, no gũtũũra nĩagatũũra muoyo. 18Naho ha ũhoro wa ithe-rĩ, tondũ nĩahinyanĩrĩirie ũũru, na agathara andũ a kwao indo ciao na ũmaramari, na ageka maũndũ marĩa mataagĩrĩire thĩinĩ wa andũ ao, atĩrĩrĩ, mũndũ ũcio nĩagakua nĩ ũndũ wa mehia macio make.

19No inyuĩ muugaga atĩrĩ, Nĩ kĩ gĩkũgiria mũriũ acokererũo nĩ ũũru wa ithe? Atĩrĩrĩ, mwanake ũcio angĩkorũo nĩekĩte ũndũ ũrĩa wagĩrĩire na wa ũthingu, na akamenyerera irĩra ciakwa ciothe cia kũrũmĩrĩrũo, na agacihingia-rĩ, nĩagatũũra muoyo. 20#Gũcok 24.16.Roho ũrĩa wĩhagia noguo ũgakua; no rĩrĩ, mũriũ ndagacokererũo nĩ ũũru wa ithe, o na kana mũthuri acokererũo nĩ ũũru wa mũriũ; ũthingu wa mũndũ ũrĩa mũthingu nowe mwene ũgacokererũo nĩguo, naguo waganu wa mũndũ ũrĩa mwaganu nowe ũgacokererũo nĩguo. 21No mũndũ ũrĩa mwaganu angĩgarũrũka atigane na mehia make mothe marĩa ehĩtie, na ahingie irĩra ciakwa ciothe cia watho wa kũrũmĩrĩrũo, na acoke gwĩka maũndũ marĩa maagĩrĩire na marĩa ma ũthingu, ndarĩ hingo atagatũũra muoyo; ũcio ndagakua. 22Hatirĩ ihĩtia o na rĩmwe rĩa mahĩtia marĩa ekĩte ma kwagarara watho rĩgacoka kũririkanwo ũhoro-inĩ wake; maũndũ make ma ũthingu marĩa ekĩte nĩmo magatũma atũũre muoyo. 23Anga kwĩ hĩndĩ ingĩkena nĩ ũndũ wa gĩkuũ kĩa mũndũ mwaganu? Ũguo nĩguo Mwathani Jehova ekuuga. Githĩ ti kwenda ingĩenda atĩ kaba agarũrũke atigane na mĩthiĩre ĩo yake, atũũre muoyo? 24No rĩrĩ, hĩndĩ ĩrĩa mũndũ mũthingu angĩgarũrũka atigane na ũthingu wake, eke maũndũ ma waganu, na eke maũndũ mothe ma waganu mũno ta maũndũ me thahu marĩa mekagwo nĩ mũndũ ũrĩa mwaganu-rĩ, anga nĩagatũũra muoyo? Hatirĩ ũndũ o na ũmwe wa ciĩko ciake iria ekaga cia ũthingu ũgacoka kũririkanwo; no gũkua agakua nĩ ũndũ wa mahĩtia make ma kwagarara watho, na nĩ ũndũ wa mehia make marĩa ehĩtie. 25No rĩrĩ, inyuĩ muugaga atĩrĩ, Matuĩro ma Mwathani matithiĩte ũndũ umwe. Rĩu ta gĩthikĩrĩriei, inyuĩ andũ a nyũmba ya Isiraeli. Anga matuĩro makwa timo mathiĩte ũndũ ũmwe? Githĩ matuĩro manyu timo matathiĩte ũndũ ũmwe? 26No rĩrĩ, hĩndĩ ĩrĩa mũndũ mũthingu angĩgarũrũka atigane na ũthingu wake, eke maũndũ ma waganu, nĩagakua nĩ ũndũ wamo; nĩ tondũ wa waganu wake agakua, ũcio ekĩte. 27Na ningĩ-rĩ, hĩndĩ ĩrĩa mũndũ mwaganu aatiga waganu wake ũrĩa ekĩte, agacoka ageka maũndũ marĩa maagĩrĩire na marĩa ma ũthingu, nĩakahonokia muoyo wake atũme ũtũũre. 28Nĩ ũndũ nĩecirĩtie wega, akagarũrũka agatigana na mahĩtia make mothe marĩa aaneka ma kwagarara watho, ti-itherũ nĩagatũũra muoyo; ũcio ndagakua. 29No rĩrĩ, andũ a nyũmba ya Isiraeli moigaga atĩrĩ o na rĩu, Matuĩro ma Mwathani matithiĩte ũndũ ũmwe. Atĩrĩrĩ, inyuĩ andũ a nyũmba ya Isiraeli, anga matuĩro makwa matithiĩte ũndũ ũmwe? Githĩ matuĩro manyu timo matathiĩte ũndũ ũmwe? 30Tondũ ũcio nĩngamũcirithia, inyuĩ nyũmba ya Isiraeli, njirithie mũndũ o mũndũ o ta ũrĩa mĩthiĩre yake ĩtariĩ; ũguo nĩguo Mwathani Jehova oigĩte. Wĩricũkwoi mũhutatĩre maũndũ manyu mothe ma kwagarara watho wakwa, wĩhia wanyu ndũgatuĩke wa kũmũhĩngithia. 31Tei maũndũ manyu mothe marĩa mwĩkaga ma kwagarara watho wakwa, mamweherere; wĩthondekei, mũgĩe na ngoro njerũ o na roho mwerũ thĩinĩ wanyu; nĩ ũndũ-rĩ, kaĩ mũngĩgĩkua nĩ ũndũ kĩ, inyuĩ andũ a nyũmba ya Isiraeli? 32Nĩ gũkorũo ndikenaga nĩ ũndũ wa gĩkuũ kĩa mũndũ rĩrĩa egũkua; ũguo nĩguo Mwathani Jehova oigĩte. Tondũ ũcio wĩgarũrei, na nĩmũgũtũũra muoyo.

Currently Selected:

EZEKIELI 18: OGKBIBLE

Highlight

Copy

Compare