GŨCOKERITHIA MAATHANI 23

1Atĩrĩrĩ, mũndũ mũmendereku nyee, kana mũhakũre, ndakanatonye ũũngano-inĩ wa Jehova.

2Mwana wa mũhingũria ndakanatonye ũũngano-inĩ wa Jehova; o na nginya rũciaro rũake rũa ikũmi-rĩ, gũtirĩ mũndũ o na ũmwe wake ũgatonya ũũngano-inĩ wa Jehova.

3 # Neh 13.1,2. Mũamoni, kana Mũmoabi, matikanatonye ũũngano-inĩ wa Jehova; o na nginya rũciaro rũao rũa ikũmi-rĩ, gũtirĩ mũndũ o na ũrĩkũ wa andũ acio ũgatonya ũũngano-inĩ wa Jehova o na atĩa; 4#Ndar 22.1-6.nĩ ũndũ rĩrĩa mwoimire Misiri matiamũthaganirie makuuĩte irio, o na maĩ; o na ningĩ nĩ gũkorũo nĩmaarĩkanĩire na Balaamu wa Beori mamũhe mbia, nĩguo oime Bethoru, itũũra rĩa Mesopotamia, akũrume. 5#Ndar 23.7—24.9.No rĩrĩ, Jehova Ngai waku ndaigana kũigua Balaamu; no nĩagarũrire kĩrumi gĩake, agĩgĩtua ũndũ wa gũkũrathima, nĩ gũkorũo Jehova Ngai waku nĩakwendete. 6Ndũkanatindĩrĩre ũhoro wa atĩ andũ acio magĩe na thayũ, kana wa atĩ monage wega, matukũ maku mothe, tene na rene.

7Ndũkanathũũre Mũedomu, nĩ ũndũ nĩ mũrũ wa thoguo o na ndũkanathũũre Mũmisiri, nĩ ũndũ nĩwatũire wĩ mũgeni bũrũri wake. 8Ciana iria igaciarũo nĩ andũ acio cia rũciaro rũa gatatũ nĩigatonya ũũngano-inĩ wa Jehova.

9Hĩndĩ ĩrĩa wĩ kĩraaro-inĩ uumagarĩte ũkahũrane na thũ ciaku-rĩ, nĩũgathemaga ũhoro wa kũhutia kĩndũ o gĩothe kĩrĩa gĩĩ thahu. 10Kũngĩkagĩa mũndũ o na ũrĩkũ thĩinĩ wanyu ũkũgwatwo nĩ thahu nĩ ũndũ wa ũndũ ũrĩa ũmũkorete ũtukũ, nĩakoima athiĩ na kũu gĩthaka-inĩ mbarĩ ĩrĩa ĩngĩ ya kĩraaro, na ndakanatonye kĩraaro-inĩ thĩinĩ; 11no nĩgũgatuĩka atĩrĩ, atĩ hwaĩ-inĩ wakinya, mũndũ ũcio ethambe na maĩ, na riũa rĩathũa, acoke atonye kĩraaro-inĩ. 12Ningĩ ũgĩe na handũ mbarĩ ĩrĩa ĩngĩ ya kĩraaro gĩaku ha gũthiagwo gĩthaka-inĩ; 13na ũgĩe na gacakũri ga kũhakũra tĩri indo-inĩ ciaku cia mbaara na nĩgũgatuĩka atĩrĩ, atĩ hĩndĩ ĩrĩa waikara thĩ na kũu nja wĩteithie, ũkenja karima nako, ũcoke ũhũgũke na thutha, ũthike kĩrĩa kĩoima thĩinĩ waku; 14nĩ gũkorũo Jehova Ngai waku nĩathiangaga hau kĩraaro-inĩ gĩaku thĩinĩ, akũhonokie, na arekererie thũ ciaku acineane harĩ wee na tondũ ũcio-rĩ, kĩraaro gĩaku nĩgĩikarage gĩtarĩ na thahu; nĩ getha ndakanone kĩndũ o na kĩmwe gĩtaagĩrĩire thĩinĩ waku, nĩguo ndakanahũndũke akweherere.

15Ngombo ĩrĩa ĩĩhonoketie ĩkoima harĩ mwathi wayo, ĩgoka gwaku-rĩ, ndũkanamĩrekererie ũmĩneane harĩ mwathi wayo; 16reka ĩikaranagie nawe o kũu thĩinĩ wanyu, o handũ harĩa ĩngĩthura ihingo-inĩ cia itũũra rĩmwe rĩanyu, o ta ũrĩa ĩkwenda; ndũkanamĩhinyĩrĩrie.

17 # Alaw 19.29. Gũtikanagĩe mũmaraya thĩinĩ wa airĩtu a Isiraeli; o na gũtĩkanagĩe ũmaraya wa arũme na arũme thĩinĩ wa ariũ a Isiraeli. 18Ningĩ ndũkanatware nyũmba ya Jehova Ngai waku kĩrĩa kĩonekete nĩ mũndũ-wa-nja akĩĩhũra maraya, kana kĩrĩa kĩonekete nĩ ũndũ wa ũmaraya wa arũme na arũme, gĩtuĩke kĩa mwĩhĩtwa o na ũrĩkũ ũrĩa wehĩtire; nĩ gũkorũo maũndũ macio me thahu he Jehova Ngai waku.

19 # Thama 22.25; Alaw 25.36,37; Gũcok 15.7-11. Ndũkanohorere mũrũ wa ithe wanyu kĩndũ ũkĩmwĩtagia uumithio wakĩo, o na arĩ uumithio wa mbia, kana wa irio, kana wa kĩndũ o na kĩ kĩrĩa kĩohoranagĩrũo nĩ ũndũ wa kuona uumithio; 20mũndũ mũrũrĩrĩ wahota kũmuohorera ũkĩmwĩtagia uumithio; no rĩrĩ, mũrũ wa ithe wanyu ndũkanamuohorere ũkĩmwĩtagia uumithio; nĩ getha Jehova Ngai waku akũrathimage thĩinĩ wa bũrũri ũrĩa ũgũthiĩ kwĩgwatĩra, ũtuĩke waku, mawĩra-inĩ mothe o marĩa ũgaikagia guoko ũmarute.

21 # Ndar 30.1-16; Mat 5.33. Hĩndĩ ĩrĩa ũkehĩta mwĩhĩtwa ũkoniĩ Jehova Ngai waku-rĩ, ndũkanacoke kũgĩa na thieya wa kũũhingia nĩ gũkorũo Jehova Ngai waku ndarĩ hingo atagakũũria ũndũ ũcio; naguo ũndũ ũcio hihi wahota gũtuĩka wĩhia harĩ wee. 22No rĩrĩ, ũngĩaga kwĩhĩta mwĩhĩtwa-rĩ, ũndũ ũcio ndũngĩtũma wonwo ta wĩhĩtie. 23Ũndũ ũrĩa warĩtie ũkoima kanua gaku nĩũkaũmenyerera, ũkĩrute kĩndũ gĩa kũrutwo na kwĩendera o ta ũrĩa werĩire Jehova Ngai waku na kanua gaku atĩ nĩũkaruta.

24Hĩndĩ ĩrĩa ũngĩtonya mũgũnda wa mĩthabibu wa mũndũ ũrĩa ũngĩ-rĩ, wahota kũrĩa thabibu o nginya rĩrĩa ũrĩhũna, o ta ũrĩa ũkwĩendera; no rĩrĩ, ndũkanaciĩkĩre kĩondo-inĩ ũcikuue atĩ nĩguo ũthiĩ nacio.

25Ũngĩgakinya ngano-inĩ ya mũndũ ũrĩa ũngĩ, ĩrĩa irũngi-ĩ ĩtarengetwo, wahota gũkahuta magira mayo na guoko; no rĩrĩ, ndũkanoere ngano ĩo ya mũndũ ũrĩa ũngĩ rũhiũ, ũmĩrenge naruo.

Currently Selected:

GŨCOKERITHIA MAATHANI 23: OGKBIBLE

Highlight

Copy

Compare