GŨCOKERITHIA MAATHANI 24

1 # Mat 5.31; 19.7; Mar 10.4. Hĩndĩ ĩrĩa mũndũ egũtwara mũndũ-wa-nja amũhikie-rĩ, nĩgwĩkagwo atĩrĩ, atĩ hihi angĩona ndekũmũkenia nĩ ũndũ nĩonete arĩ na ũndũ wa gũconorithania ũtaagĩrĩire, na tondũ ũcio amwandĩkĩre marũa ma gũtigana nake, amũnengere amanyite na guoko, acoke amũingate oime gwake mũciĩ-rĩ; 2aarĩkia kuuma gwake mũciĩ, angĩtuĩka mũka wa mũndũ ũngĩ-rĩ, 3mũthuriwe ũcio wa thutha o nake angĩmũthũũra, na amwandĩkĩre marũa ma gũtigana nake, amũnengere amanyite na guoko, na acoke amũingate oime gwake mũciĩ, kana hihi mũthuriwe ũcio wa thutha akue, o ũcio wacokire kũmũtwara agĩtuĩka mũka; 4mũthuriwe ũrĩa wa mbere, o ũcio wamũteire, ndangĩhota kũmũtwara rĩngĩ rĩa kerĩ, atĩ nĩguo acoke atuĩke mũka, arĩkĩtie gũthũkio; nĩ gũkorũo ũndũ ũcio wĩ thahu harĩ Jehova; ndũkanakĩreke bũrũri ũrĩa Jehova Ngai waku egũkũhe ũtuĩke igai rĩaku, ũgwatwo nĩ thahu nĩ ũndũ wa mehia marĩa mehĩtio kuo.

5Hĩndĩ ĩrĩa mũndũ aahĩkania, ndakanoimagare athiĩ mbũtũ-inĩ cia ita, kana atũmwo wĩra o na ũrĩkũ; no arĩikaraga o ro ũguo gwake mũciĩ mwaka mũgima, nĩguo akenagie mũhiki ũcio wake. 6Mũndũ o na ũrĩkũ ndakanathiĩ na gĩthĩi kĩa mũndũ, akĩgwatie nĩ getha gĩgakũũrũo; kana athiĩ na ihiga rĩakĩo rĩa igũrũ riiki; nĩ ũndũ gwĩka ũguo nĩ ta kũgwatia muoyo wa mũndũ.

7 # Thama 21.16. Mũndũ o na ũrĩkũ angĩonwo akĩiya mũndũ ũngĩ wa ciana cia Isiraeli, acio ariũ a ithe wanyu, na amwĩke maũndũ ta arĩ ngombo, kana amwendie; mũici ũcio nĩoragwo; ũguo nĩguo ũkeheria ũũru ũcio uume thĩinĩ waku.

8 # Alaw 13.1—14.54. Ha ũhoro wa mũrimũ wa mangũ-rĩ, wĩrĩithagie wega, wĩmenyagĩrĩre na kĩyo gwĩka maũndũ mothe marĩa athĩnjĩri-Ngai, arĩa Alawii, makamũruta; o ta ũrĩa ndamaathire-rĩ, ũguo noguo mũrĩmenyagĩrĩra gwĩka. 9#Ndar 12.10.Ta ririkana ũrĩa Jehova Ngai waku ekire Miriamu, mwĩ njĩra mũkiuma Misiri.

10 # Thama 22.26,27. Hĩndĩ ĩrĩa ũngĩohorera mũndũ ũrĩa ũngĩ kĩndũ o na kĩ, ndũkanatonye nyũmba yake ũgĩre gĩkũũri. 11Nĩũkarũgama nja, nake mũndũ ũcio wohorete harĩ wee akũrehere gĩkũũri hau nja. 12Na rĩrĩ, mũndũ ũcio angĩkorũo nĩ mũthĩni-rĩ, ndũkanaraarie gĩkũũri kĩu; 13ndũrĩ hingo ũtakamũcokeria gĩkũũri kĩu riũa rĩgĩthiĩ gũthũa, nĩ getha akomage ehumbĩte nguo ĩo yake, nake akũrathime; naguo ũndũ ũcio nĩũgatũma wonagwo nĩ Jehova Ngai waku ta ũrĩ mũthingu.

14 # Alaw 19.13. Ndũkanahinyĩrĩrie ndungata ya mũcara ĩrĩa thĩni na ĩgakĩara, o na ĩngĩkorũo nĩ ĩmwe ya ariũ a ithe wanyu, kana ya andũ a kũngĩ arĩa matũũraga thĩinĩ wa ihingo cia itũũra rĩanyu, o kũu bũrũri waku; 15no rĩrĩ, nĩũkamĩhe mũcara wayo o mũthenya ũrĩa ĩkũruta wĩra wayo, na ndũkanathũithie riũa ũikarĩte naguo; nĩ gũkorũo nĩ thĩinĩ, na ngoro yayo ĩikaraga ĩũcũthĩrĩirie; nĩ getha ndĩkae gũkaĩra Jehova, naguo ũndũ ũcio wonwo ũrĩ wĩhia harĩ wee.

16 # 2 Ath 14.6; 2 Maũ 25.4; Ezek 18.20. Maithe ma ciana matikanoragwo nĩ ũndũ wa ciana ciao, kana ciana ciũragwo nĩ ũndũ wa maithe; mũndũ o wothe arĩũragagwo nĩ ũndũ wa wĩhia wake we mwene.

17 # Thama 23.9; Alaw 19.33,34; Gũcok 27.19. Ndũkanahotomie cira wa mũndũ wa kũngĩ, kana wa mwana wa ngoriai; kana woe nguo ya mũtumia wa ndigwa nĩ ũndũ wa thirĩ wake, nĩguo ĩgakũũrũo; 18no rĩrĩ, ririkanaga atĩ warĩ ngombo Misiri, na atĩ Jehova Ngai waku nĩaagũkũũrire uume kuo; tondũ ũcio nĩndagwatha wĩkage ũguo.

19 # Alaw 19.9,10; 23.22. Hĩndĩ ĩrĩa ũkũgetha magetha ma mũgũnda waku, na hihi ũriganĩrũo nĩ gĩtĩa kĩmwe mũgũnda-rĩ, ndũkanacoke gũkĩgĩra; kĩu gĩgatuĩka kĩa mũndũ wa kũngĩ, na kĩa mwana wa ngoriai, o na kĩa mũtumia wa ndigwa; nĩ getha Jehova Ngai waku akũrathimage mawĩra-inĩ maku mothe marĩa ũkũruta na moko maku.

20Hĩndĩ ĩrĩa ũkũhũrahũra mũtamaiyũ waku ũkĩgũithia ndamaiyũ ciaguo rĩ, tigaga gũcokera honge ciaguo hingo ya kerĩ; icio igatuĩka cia mũndũ wa kũngĩ, na mwana wa ngoriai, o na mũtumia wa ndigwa. 21Hĩndĩ ĩrĩa ũgũtua thabibu cia mũgũnda waku wa mĩthabibu, ndũkanacoke kũhaara iria itigĩtwo; icio igatuĩka cia mũndũ wa kũngĩ, na mwana wa ngoriai, o na mũtumia; wa ndigwa. 22Na rĩrĩ, ririkanaga atĩ warĩ ngombo bũrũri wa Misiri tondũ ũcio nĩndagwatha wĩkage ũguo.

Currently Selected:

GŨCOKERITHIA MAATHANI 24: OGKBIBLE

Highlight

Copy

Compare