GŨCOKERITHIA MAATHANI 22

1 # Thama 23.4,5. Ũngĩkona ndegwa ya mũrũ wa ithe wanyu yũrĩte, kana ng’ondu yake, ndũkanehithe, ũikare ta ũtamĩonete no nĩũkamĩcokeria mũriũ ũcio wa ithe wanyu. 2Nake mũriũ ũcio wa ithe wanyu hihi angĩkorũo ndarĩ hakuhĩ nawe, kana ũkorũo ndũmũũĩ, nĩũkamĩtwara gwaku mũciĩ, ĩikare nawe nginya o hĩndĩ ĩrĩa mũriũ ũcio wa ithe wanyu akamĩcaria; na hĩndĩ ĩo ũkamũcokeria. 3Na ningĩ ũguo noguo ũgeka ndigiri yake; o na wĩke nguo yake; ningĩ ũguo noguo ũgeka kĩndũ o gĩothe kĩa mũrũ wa ithe wanyu kĩrĩa kĩũrĩte, o kĩrĩa agakorũo ateete nawe ũkĩone; ndũkanehithe ta ũtacionete.

4Ũngĩona ndigiri ya mũrũ wa ithe wanyu ĩgũĩte thĩ ĩgĩthiĩ na njĩra, kana ndegwa yake, ndũkanehithe ũikare ta ũtacionete; no nĩũkamũteithia gũcioya na igũrũ.

5Mũndũ-wa-nja ndakanehumbe nguo iria ĩkoniĩ mũndũ mũrũme; kana mũndũ mũrũme ehumbe nguo iria ikoniĩ mũndũ-wa-nja, nĩ gũkorũo mũndũ ũrĩa wothe wĩkaga ũndũ ũcio onagwo ta arĩ na thahu nĩ Jehova Ngai waku.

6Ũngĩkorerera nyamũ ĩrĩa yũmbũkaga na mathagu, ũmĩone ĩrĩ mbere yaku handũ njĩra-inĩ ĩrĩ mũtĩ o na ũrĩkũ igũrũ, kana ĩrĩ thĩ, nayo ĩkorũo ĩrĩ na tũcui, kana matumbĩ, nayo nyina wa tũcui tũu ĩkorũo nĩĩkomereirie, kana ĩgakomereria matumbĩ macio, ndũkanoyanĩrie nyina hamwe na tũcui tũu twayo; 7no mũhaka ũkareka nyina ĩĩthiĩre; no rĩrĩ, tũcui wahota gũtwĩyoera ũthiĩ natuo ũguo noguo ũgeka nĩ getha wonage wega, na nĩ getha matukũ maku maingĩhe.

8Hĩndĩ ĩrĩa ũngĩaka nyũmba njerũ, nĩũkamĩĩkĩra rũirigo mĩena-inĩ guothe igũrũ rĩayo, nĩ getha mũndũ o na ũrĩkũ angĩgũa, oimĩte kuo hihi, ndũgatũme andũ a nyũmba yaku macokererũo nĩ thakame nĩ ũndũ wa ũhoro ũcio. 9#Alaw 19.19.Mũgũnda waku wa mĩthabibu ndũkanaũhande mbeũ cia mĩthemba ĩĩrĩ; nĩ getha uumithio wothe wa maciaro maguo, naguo ũguo nĩ ta kuuga ngurukuhĩ iria ũhandĩte cia kũringũra, o na thabibu iria ciongererekaga mĩthabibu-inĩ, itikanaamũrĩrũo Ngai na iticoke gũkũũrĩka.

10Ndũkanarĩme wohanĩtie ndegwa na ndigiri igucanĩrie mũraũ. 11Ndũkanehumbe nguo yogothithanĩtio na ndigi cia mĩthemba ĩĩrĩ ĩtukanĩte, nacio nĩ ndigi cia guoya wa ng’ondu na cia ũguta hamwe.

12 # Ndar 15.37-41. Nguo yaku ya kwĩhumba nĩũkamĩĩkagĩra ciohe cia ndigi mĩthia-inĩ yayo yothe.

13Mũndũ o na ũrĩkũ angĩhikia mũka, atonye gwake nyũmba onane nake, na thutha wa ũguo amũthũũre, 14nake amũthitake atĩ nĩekĩte maũndũ ma gũconorithia andũ, na akĩmũreherere igweta rĩũru, oige atĩrĩ, Nĩndahikirie mũndũ-wa-nja ũyũ, na rĩrĩa ndamũthengereire, ndiigana kuona imenyithia cia atĩ nĩ mũirĩtu gathirange; 15hĩndĩ ĩo ithe wa mũirĩtu ũcio, o na nyina, magĩtware maũndũ ma kuonania atĩ nĩ mũirĩtu gathirange harĩ athuri o kĩhingo-inĩ gĩa itũũra rĩao; 16nake ithe wa mũirĩtu ũcio ere athuri acio atĩrĩ, Mũndũ ũyũ nĩndamũnengerire mũirĩtu wakwa amũhikie atuĩke mũka, na rĩu nĩamũthũũrĩte, 17na akamũthitaka atĩ nĩekĩte maũndũ ma gũconorithia andũ, akoiga ũũ: Ndionete imenyithia cia atĩ mwarĩguo nĩ mũirĩtu gathirange; no rĩrĩ, imenyithia cia kuonania atĩ mũirĩtu wakwa nĩ mũirĩtu gathirange nĩcio ici. Nao magĩcoke matambũrũkie nguo ĩo mamĩare mbere ya athuri acio a itũũra rĩu. 18Nao athuri acio a itũũra rĩu makĩnyite mũndũ ũcio mamũhũre, 19na mamwĩtie thĩnjo ya cekeri igana rĩmwe cia betha, macinengere ithe wa mũirĩtu, nĩ ũndũ nĩaarehereire mũirĩtu ũcio wa Isiraeli igweta rĩũru; nake agĩtũũre arĩ o mũka wa mũndũ ũcio, na ndakanamũte matukũ mothe marĩa egũtũũra muoyo. 20No rĩrĩ, ũndũ ũcio ũngĩtuĩka wa ma atĩ imenyithia cia kuonania atĩ mũirĩtu ũcio nĩ mũirĩtu gathirange nĩ njagu-rĩ, 21nĩmatware mũirĩtu ũcio o mũromo-inĩ wa nyũmba ya ithe, nao andũ a itũũra rĩao mamũhũre na mahiga nyuguto o nginya akue, nĩ gũkorũo nĩekĩte ũndũ wa ũrimũ thĩinĩ wa Isiraeli, akahũra maraya arĩ gwa ithe mũciĩ ũguo noguo ũkeheria ũũru ũcio uume thĩinĩ waku.

22Mũndũ mũrũme angĩonwo agĩkoma na mũka ũhikĩtio nĩ mũrũme-rĩ, nĩmakue o erĩ, mũndũ mũrũme ũcio ũkomete na mũndũ-wa-nja, o na mũndũ-wa-nja ũcio; ũguo noguo ũkeheria ũũru ũcio uume o kũu Isiraeli.

23Mũirĩtu gathirange angĩkorũo agũrĩtwo nĩ mũndũ, nake mũndũ ũngĩ acoke amũkore arĩ o kũu itũũra-inĩ, akome nake; 24nĩmũkamaruta o erĩ mũmatware kĩhingo-inĩ gĩa itũũra rĩu, mũmahũre na mahiga nyuguto o nginya makue; nĩ ũndũ mũirĩtu ũcio ndaigana kuuga mbu, na aakĩrĩ o kũu itũũra-inĩ rĩu thĩinĩ, nake mũndũ mũrũme ũcio nĩaagithirie mũndũ-wa-nja wa mũndũ wa itũũra rĩao gĩtĩo; ũguo nĩguo ũkeheragia ũũru ũcio uume thĩinĩ waku.

25No rĩrĩ, kũngĩkorũo mũndũ mũrũme nĩ gũkora akorete mũirĩtu ũgũrĩtwo nĩ mũndũ na kũu nja ya itũũra gĩthaka-inĩ, nake mũndũ mũrũme ũcio amũgwate na hinya, akome nake, hĩndĩ ĩo no mũndũ ũcio ũkomete nake ũkoragwo wiki; 26no rĩrĩ, mũirĩtu ũcio ndũrĩ ũndũ ũkamwĩka; mũirĩtu ũcio ndarĩ na ũndũ ũngĩtũma oragwo, nĩ gũkorũo ũhoro ũcio ũtariĩ o ta hĩndĩ ĩrĩa mũndũ angĩũkĩrĩra mũndũ ũrĩa ũngĩ, amũũrage; 27tondũ aakorire mũirĩtu ũcio mũgũre nĩ mũndũ ũngĩ gĩthaka-inĩ; nake akiuga mbu, na gũkĩaga mũndũ wa kũmũteithũkia.

28 # Thama 22.16,17. No rĩrĩ, mũndũ mũrũme angĩkora mũirĩtu, o mũirĩtu gathirange ũtarĩ mũgũre nĩ mũndũ, nake amũnyite, akome nake, nao monwo, 29mũndũ mũrũme ũcio ũkomete nake nĩakahe ithe wa mũirĩtu ũcio cekeri mĩrongo ĩtano cia betha, nake mũirĩtu ũcio atuĩke mũka, nĩ ũndũ nĩaamwagithirie gĩtĩo; na ndakanamũte matukũ make mothe.

30 # Alaw 18.8; 20.11; Gũcok 27.20. Mũndũ mũrũme ndakanatware mũka wa ithe, na ndakanaguũrie ithe nguo.

Currently Selected:

GŨCOKERITHIA MAATHANI 22: OGKBIBLE

Highlight

Copy

Compare