GŨCOKERITHIA MAATHANI 21

1Na rĩrĩ, kũu bũrũri ũcio Jehova, Ngai waku, akũheete ũwĩgwatĩre ũtuĩke waku, hihi kũngĩkoneka mũndũ mũũrage, nake akorũo akomete gĩthaka-inĩ na kwage kũmenyeka mũndũ ũrĩa ũmũgũthĩte-rĩ, 2athuri a kwanyu, o na aciri, nĩmagakiuma magathime ũrĩa matũũra marĩa mathiũrũrũkĩirie mũndũ ũcio mũũrage maraihĩte; 3na nĩgũgatuĩka atĩrĩ, atĩ itũũra rĩrĩa rĩkuhanĩrĩirie na mũndĩi ũcio mũũrage gũkĩra marĩa mangĩ, athuri a itũũra rĩu mathiĩ rũũru-inĩ rũa ng’ombe maayite mori ĩtarĩ wĩra o na ũmwe ĩrutĩte, na ĩtarĩ yekĩrũo mũtĩ wa ngingo ĩgucie kĩndũ o na kĩ, 4nao athuri acio a itũũra rĩu maikũrũkie mori ĩo kĩanda-inĩ kĩĩ maĩ megũtherera, na gĩkorũo gĩtarĩ gĩcimbe, kana gĩkahandwo, magĩcoke moinĩre mori ĩo ngingo hau kĩanda-inĩ kĩu, 5nao athĩnjĩri-Ngai, ariũ a Lawii, mathiathie hakuhĩ nayo, nĩ ũndũ o nĩo Jehova Ngai waku aathurire a kũmũtungatĩra, na a kũrathimanaga na ũndũ wa rĩĩtwa rĩa Jehova; o na ningĩ ngarari ciothe iria igakararanio, o na igũtha rĩrĩa rĩothe rĩkagũthanwo, ũhoro wa maũndũ macio ũgatuwo o ta ũrĩa makoiga; 6nao athuri othe a itũũra rĩu rĩkuhanĩrĩirie na mũndũ ũcio mũũrage gũkĩra macio mangĩ, methambĩre moko mao ĩgũrũ rĩa mori ĩo yunĩirũo ngingo hau kĩanda-inĩ 7nao makĩgwate kuuga ũũ; Moko maitũ timo maitĩte thakame ĩo, kana maitho maitũ makamĩona ĩgĩitwo. 8Jehova, twagũthaitha ohera andũ aku Isiraeli arĩa wakũũrire, na ndũkareke thakame ya mũndũ ũtarĩ na ũũru ĩikare o ro ũguo thĩinĩ wa andũ aku Isiraeli ĩtahoroheirio. Naguo ũhoro wa thakame ĩo ĩitĩtwo nĩũkohanĩrũo. 9Ũguo nĩguo ũkanina ũhoro wa gũita thakame ĩrĩa ĩtarĩ na ũũru, uume thĩinĩ waku, rĩrĩa ũgeka maũndũ marĩa monagwo maagĩrĩire nĩ Jehova.

10Hĩndĩ ĩrĩa ũngĩthiĩ ita-inĩ kũhũrana na thũ ciaku, nake Jehova Ngai waku acirekererie acineane moko-inĩ maku, ũcitahe-rĩ, 11ũngĩgĩcoka wone mũndũ-wa-nja mũthaka thĩinĩ wa andũ acio matahĩtwo, nawe ũigue ta ũkũmwenda, na wĩcirie atĩ nĩũkũmũtwara atuĩke mũkaguo-rĩ, 12nĩũgakĩmũinũkia gwaku mũciĩ, nake acoke enjwo mũtwe, na erenge ndwara, 13na arute nguo iria aatahirũo nacio; agĩikare gwaku mũciĩ, arĩrĩre ithe na nyina mweri mũgima; na thutha wa ũguo ũgĩtonye harĩ we, wonane nake, ũtuĩke mũthuriwe, nake agĩtuĩke mũkaguo. 14Na nĩgũgakinya atĩrĩ, atĩ ũngĩkaaga kũmũkenera, niũgakĩmũreka ethiĩre o kũrĩa akenda; no ndũngĩhota kũmwendia mbia, kana ũmũtue ta arĩ ngombo, nĩ ũndũ nĩũmwagithĩtie gĩtĩo.

15Na rĩrĩ, mũndũ angĩgĩa na atumia erĩ, ũmwe mwende na ũngĩ mũthũũre, nao makorũo nĩmamũciarĩire ciana erĩ, ũcio wendetwo o na ũcio ũthũũrĩtwo, nake mwana wa irigithathi akorũo nĩ wa ũrĩa ũthũũrĩtwo-rĩ, 16mũthenya ũrĩa mũndũ ũcio ekwĩgaĩra ciana ciake indo iria arĩ nacio, ndakanatue atĩ mwana wa mũndũ-wa-nja ũcio wendetwo nĩwe ũgũtuĩka ta arĩ wa irigithathi ithenya rĩa mwana ũrĩa waciarirũo agĩtuĩka irigithathi rĩake wa mũndũ-wa-nja ũcio ũthũũrĩtwo. 17No nĩakamenyithania atĩ mwana wa ũcio ũthũũrĩtwo nĩwe wa irigithathi, nĩ ũndũ wa kũmũhe gĩcunjĩ kĩa indo ciake ciothe igaĩtwo maita merĩ; nĩ gũkorũo ũcio nĩwe kĩambĩrĩria kĩa ũhoti wake, na kĩhooto kĩa ũrigithathi nĩ gĩake.

18Mũndũ angĩgĩa na mũriũ mũcokereru mũremi, ũtegwathĩkĩra ithe kana nyina, nake arege kũmaigua o na mangĩmũhũra-rĩ, 19ithe na nyina nĩmamũnyite mamũrute mũciĩ wao, mamũtwarĩre athuri a itũũra rĩao, o kũu kĩhingo-inĩ gĩa kũrĩa atũũraga; 20nao mere athuri acio a itũũra rĩao ũũ: Atĩrĩrĩ, mwana ũyũ witũ nĩ mũcokereru na nĩ mũremi na ndatwathĩkagĩra atũũraga arĩ mũmaramari, na arĩ mũrĩu. 21Nao andũ othe a itũũra rĩao mamũhũre na mahiga nyuguto o nginya akue; ũguo nĩguo ũkeheria ũũru ũcio uume thĩinĩ waku; nao Aisiraeli othe nĩmakaigua ũhoro ũcio, nao metigĩre.

22Na rĩrĩ, mũndũ angĩĩhia wĩhia ũrĩa ũngĩtũma oragwo, nawe ũmũũrage ũmũcuurie mũtĩ igũrũ-rĩ, 23#Gal 3.13.no mũhaka mwĩrĩ wake ndũkanaraare mũtĩ-inĩ ũcio igũrũ ũtukũ ũcio wothe; no rĩrĩ, ndũrĩ hingo ũtakaũthika mũthenya o ro ũcio; nĩ gũkorũo mũndũ ũrĩa ũcuurĩtio mũtĩ igũrũ nĩ mũrume harĩ Ngai; nĩgwĩkwo ũguo nĩ getha bũrũri ũcio Jehova Ngai waku egũkũhe ũtuĩke igai rĩaku, ndũkae kũũgwatia thahu.

Currently Selected:

GŨCOKERITHIA MAATHANI 21: OGKBIBLE

Highlight

Copy

Compare