AKOLOSAI 2
2
1TONDŨ rĩrĩ, ngwenda mũmenye ũrĩa ndĩĩgiaga nĩ ũndũ wanyu na kwĩgia kũnene ma, gwata arĩa a Laodikia, o na andũ arĩa othe matarĩ maanyona ũrĩa ’haana ũthiũ. 2Na ndĩĩgiaga ũguo nĩ getha ngoro ciao ciũmagĩrĩrio, tondũ wa ũrĩa mohanĩtio na wendani, nĩguo matũũre maingĩ hĩirio mũno ũmenyi hatarĩ na mathangania o na hanini, o nginya makamenya wega ũhoro ũrĩa wa hitho wa Ngai, na nĩguo Kristo. 3Nake nĩwe mĩthithũ yothe ya ũũgĩ na ya ũmenyi ĩhithĩtwo thĩinĩ wake. 4Ngũkiuga ũguo nĩ getha mũndũ o na ũrĩkũ ndakanamũhenererie na ciugo cia wara. 5Nĩ gũkorũo o na itarĩ hamwe na inyuĩ na mwĩrĩ, ndĩ hamwe na inyuĩ na ngoro, ngaikara ngĩkenaga nĩ ũrĩa nyonaga mũtabarĩre wanyu, o na ũrĩa mũrũmĩte wega ũhoro-inĩ wa kwĩhoka Kristo.
6Nĩ ũndũ wa ũguo, o ta ũrĩa mwamũkĩrĩte Kristo Jesu Mwathani, thiagai o ũguo mũrĩ thiritũ nake, 7mwĩhandĩte wega thĩinĩ wake, na mũkĩongagĩrĩrũo hinya nĩwe, o na mũgwatĩirie ũhoro ũrĩa mwĩtĩkĩtie, o ta ũrĩa mwarutirũo, mũgĩkĩragĩrĩria gũcokia ngatho.
8Wĩmenyagĩrĩrei mũtikanatahwo nĩ mũndũ o na ũrĩkũ na maũũgĩ make na mathara ma tũhũ, marĩa marũmanĩrĩire na irĩra cia andũ, na makaringana na maũndũ marĩa ma ndũire ma gũkũ thĩ, na matirũmanĩrĩire na Kristo. 9Nĩ gũkorũo ũiyũru wothe wa Ũngai nĩũtũire thĩinĩ wake arĩ na mwĩrĩ, 10na inyuĩ mũkaiyũrũo nĩ muoyo ũrĩa mwagĩrĩru nĩ ũrĩa mũtũire thĩinĩ wake, o we ũrĩ mũnene igũrũ rĩa ũhoro wothe wa gwathana na wa kũgĩa na hinya. 11Na mũkĩrĩ thĩinĩ wake, mwaruithirio irua rĩrĩa rĩtaruithanagio na moko, o rĩo rĩrĩa rĩa kũmwehereria maũndũ ma mwĩrĩ wa gũkũ thĩ, kũringana na ũrĩa ũhoro wa kũrua ũtariĩ thĩinĩ wa Kristo. 12#Rom 6.4.Nĩ gũthikwo mwathikirũo hamwe nake hĩndĩ ĩrĩa mwabatithirio; na nĩ thĩinĩ wa ũhoro o ũcio mwariũkanĩirio nake, nĩ ũndũ wa kwĩhoka wĩra ũrĩa Ngai aarutire rĩrĩa aamũriũkirie oime kũrĩ arĩa akuũ. 13#Ef 2.1-5.Na inyuĩ mwatũire mũrĩ akuũ nĩ ũndũ wa mehia manyu, na tondũ wa gũikara mũtaruĩte mĩĩrĩ yanyu-rĩ, nĩ inyuĩ Ngai ekĩrire muoyo hamwe na Kristo, nĩ ũndũ wa ũrĩa aatuoheire mahĩtia maitũ mothe; 14#Ef 2.15.na tondũ wa ũrĩa aahuurire ũhoro wa gũtũcuka ũrĩa waandĩkĩtwo mawatho-inĩ, na warĩ wa gũtũhoota-rĩ, agĩkĩweheria akĩũhũrĩrĩra mĩcumarĩ mũtharaba-inĩ wake; 15na aarĩkia gwĩthengeria monene macio o na mahinya, akĩmonania mbere ya mũingĩ, akĩrũhagia nĩ ũrĩa aamatoririe mũtharaba-inĩ.
16 #
Rom 14.1-6. Hakĩrĩ ũguo-rĩ, mũtikanareke mũndũ o na ũrĩkũ amũcirithie ũhoro-inĩ wa irio iria mũrĩaga, kana wa kĩrĩa mũnyuaga, o na kana wa mũthenya mwamũre, kana wa karũgamo ka mweri, o na kana wa mũthenya wa thabatũ: 17nĩ gũkorũo maũndũ macio no kĩĩruru kĩa maũndũ marĩa magoka; ĩndĩ ma yamo nĩ ya Kristo. 18Mũtikanareke mũndũ amũtunye kĩheo kĩrĩa mũtanyĩte kuona nĩ ũndũ wa ũrĩa endaga gwĩtua o mũnyinyi, agathathayagia araika, na agatũũra arũmĩtie cioneki iria eoneire, agĩĩtĩaga tũhũ nĩ ũndũ wa meciria make ma kĩĩmwĩrĩ. 19#Ef 4.16.Mũndũ ta ũcio ndatũire egwatanĩtie na Mũtwe, o we ũtũmaga mwĩrĩ wothe ũgĩe na hinya, na ũgwatanio na nyunĩro ciohanĩtio na nga, na ũkũrakũrage mũkũrĩre o ũrĩa uumaga kwĩ Ngai.
20Mũngĩkorũo nĩmwakuire hamwe na Kristo, mũgĩtigana na maũndũ marĩa ma ndũire ma gũkũ thĩ-rĩ, nĩ kĩ gĩgĩtũmaga mwathĩkĩre irĩra, o ta mũtũire gũkũ thĩ? 21Nacio nĩ ta ici: Ndũkananyite na guoko, kana ũcame, kana ũhutie. 22Na rĩrĩ, gwathanĩtwo ũguo ũhoro wa indo iria ininagwo ikĩhũthĩrũo; nacio irĩra icio no cia ũtaarani na ũrutani wa andũ. 23Nacio-rĩ, ti-itherũ ciĩonanagia ta arĩ cio ũũgĩ, nĩ ũndũ wa mũndũ gwĩtuĩra mĩhoere ĩrĩa arĩhoyaga Ngai nayo, na kwĩnyihagia na kũhinyĩrĩria mwĩrĩ wake; no ha ũhoro wa kũgiria mũndũ ehũnĩrĩrie merirĩria ma mwĩrĩ-rĩ, itikĩrĩ kĩene.
Currently Selected:
AKOLOSAI 2: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
