AKOLOSAI 1
1
1NĨ niĩ Paulo, mũtũmwo wa Kristo Jesu nĩ ũndũ wa ũrĩa Ngai endete, twĩ na Timotheo mũrũ wa Ithe witũ, 2tũkũmũtũmĩra marũa maya inyuĩ andũ arĩa aamũre, o inyuĩ ariũ a Ithe witũ mũtũire thĩinĩ wa Kristo mũrĩ ehokeku o kũrĩa Kolosai. Mũrogĩa na Wega o na thayũ ciumĩte kũrĩ Ngai Ithe witũ.
3Nĩtũcokagĩria Ngai ngatho, o we Ithe wa Mwathani witũ Jesu Kristo, tũkĩmũhoyagĩra hĩndĩ ciothe, 4nĩ ũndũ nĩtũiguĩte ũhoro wa ũrĩa mwĩtĩkĩtie Kristo Jesu, o na wa ũrĩa mwendete andũ arĩa othe aamũre, 5nĩ ũndũ wa wĩrĩgĩrĩro ũrĩa mũigĩirũo Igũrũ. Naguo nĩguo mwaiguire ũhoro waguo o mbere, rĩrĩa mwahunjĩirio ũhoro-ũrĩa-wa-ma, o Ũhoro-ũrĩa Mwega 6ũcio ũkinyĩte kũrĩ inyuĩ; naguo nĩ gũciara ũciaraga maciaro thĩ yothe, ũkĩongererekaga; na noguo wĩkaga o na thĩinĩ wanyu, kuuma mũthenya ũrĩa mwaiguire na mũkĩmenya Wega wa Ngai na ma. 7#Kol 4.12; Filem 1.23.Naguo nĩguo mwarutirũo nĩ mwendwa witũ Epafara, ũrĩa tũrutithanagia wĩra nake, o we ũrĩ mũtungatĩri wa Kristo wa kwĩhokeka ithenya-inĩ riitũ; 8nake nĩwe watũmenyithirie wega ũrĩa mũtũire mwendaine mwĩ thĩinĩ wa Roho.
9Nĩ ũndũ wa ũguo o na ithuĩ-rĩ, gwata mũthenya ũrĩa twaiguire ũhoro ũcio wanyu, tũtitigithagĩria kũmũhoera na kũmũthaithanĩrĩra, atĩ Ngai amũiyũrie ũmenyi wa kũmenyaga ũrĩa endaga, na amũheage ũũgĩ wothe na ũtaũku wothe, marĩa ma kĩĩroho, 10nĩguo mũthiage na mĩthiĩre ĩrĩa yagĩrĩire andũ a Mwathani, na mũmũkenagie maũndũ-inĩ mothe, mũgĩciaraga maciaro mawĩra-inĩ marĩa mothe mega mũrutaga, na mũkĩongagĩrĩrũo ũmenyi wa kũmenyana na Ngai. 11Ningĩ atĩ mũhotithagio na ũhoti wothe, kũringana na hinya wake ũrĩa wĩ na riri, nĩ getha mũkiragĩrĩrie mũno mũtegũthethũka, na mwĩ na gĩkeno; 12na ningĩ mũcokagĩrie Ithe witũ ngatho, we ũtũtuĩte andũ aiganĩru a kũgayanĩrio igai hamwe na andũ arĩa aamũre, kũrĩa kwĩ na ũtheri. 13Nake nĩwe watũhonokirie agĩtũruta watho-inĩ wa nduma, agĩtũthamĩrĩria ũthamaki-inĩ wa Mũriũ ũrĩa endete mũno. 14#Ef 1.7.Ũcio nĩwe watũkũũrire, nĩ gũtũrekera mehia maitũ.
15Nake nĩwe mũhianĩre wa ũrĩa Ngai ahaana, o we ũtonekaga, na nĩwe waambire kũrigithathwo indo ciothe itaanombwo. 16Tondũ rĩrĩ, indo ciothe ikĩũmbwo nĩciombirũo na ũndũ wake, iria irĩ Igũrũ, o nacio iria irĩ thĩ; iria cionekaga o na iria itonekaga; o na ciatuĩka nĩ itĩ cia ũnene kana ene wathani, kana mothamaki, o na kana mahinya, ciothe-rĩ, nĩ kũũmbwo ciombirũo na ũndũ wake, nĩguo ituĩke ciake. 17Nake we nĩwe ũtũire o ho mbere indo ciothe itaanagĩa, nacio ciothe itũũraga inyitanĩtio nĩwe. 18#Ef 1.22,23.Ningĩ nĩwe Mũtwe wa mwĩrĩ, arĩ guo kanitha: nake nĩwe wa kĩambĩrĩria, na nĩwe irigithathi rĩa andũ arĩa maanakua; nĩ getha maũndũ-inĩ mothe atuĩke nowe wa mbere. 19Nĩ gũkorũo ũiyũru wothe wa Ngai nĩwetĩkĩrire gũtũũra thĩinĩ wake; 20#Ef 2.16.nĩguo atĩ na ũndũ wake maũndũ mothe macoke kũiguithanio na Ngai, nĩ ũndũ wa ũrĩa aarehire thayũ na ũndũ wa thakame ĩrĩa yaitirũo mũtharaba-inĩ wake, mo mothe-rĩ, maiguithanio na Ngai no ũndũ wake, o na mangĩtuĩka nĩ ma gũkũ thĩ, o na kana ma Igũrũ.
21Na inyuĩ-rĩ, o inyuĩ mwatũire mwamũranĩtio na Ngai, mũkagĩa ũthũ nake ngoro-inĩ cianyu, na mũgekaga ũũru-rĩ, nĩ inyuĩ rĩu aiguithanĩtie na Ngai, 22nĩ ũndũ wa ũrĩa aakuire arĩ na mwĩrĩ wa gũkũ thĩ, nĩ getha amũrũgamie mbere yake mũrĩ atheru, na mũtarĩ na ũũgũ, na mũtarĩ na ũcuke: 23mũngĩgĩkorũo mũrũmĩtie ũhoro wa gwĩtĩkia, na mwĩhandĩte thĩinĩ waguo mũtekwenyenyeka, na mũtatiganĩte na kĩĩrĩgĩrĩro kĩrĩa kĩa Ũhoro-ũrĩa-Mwega mwaiguire - o Ũhoro ũcio ũhunjĩirio andũ othe a gũkũ thĩ; naguo nĩguo niĩ Paulo ndatuirũo ndungata yaguo.
24Na rĩu nĩ gũkena ngenaga nĩ ũndũ wa mĩnyamaro ĩrĩa ’nyamaragio nayo nĩ ũndũ wanyu, na nĩ’hingagia thĩinĩ wa mwĩrĩ wakwa mwene matigari ma mathĩna marĩa Kristo aathĩnirio namo, ngamahingia nĩ ũndũ wa mwĩrĩ wake, nĩguo kanitha: 25naguo nĩguo ndatuirũo ndungata yaguo, kũringana na wĩra ũrĩa ndaheirũo nĩ Ngai wa kũmũroraga, nĩ getha ngahingie ũhunjia wa Ũhoro wa Ngai. 26Naguo Ũhoro ũcio no ũrĩa watũire; hitho-inĩ kuuma agu na agu, o njiaro-inĩ ciothe: no rĩu nĩũguũrĩirio andũ ake aamũre 27o arĩa Ngai onire arĩ wega amamenyithie ũrĩa ũhoro ũcio wa hitho ũingĩhĩirio riri kũrĩ andũ a Ndũrĩrĩ - naguo nĩ atĩrĩ, atĩ Kristo nĩatũũraga thĩinĩ wanyu, arĩ we kĩĩrĩgĩrĩro gĩa gũkagĩa na riri. 28Ũcio nĩwe tũhunjagia ũhoro wake, tũgĩtaaraga mũndũ o wothe na tũkĩrutaga mũndũ o wothe, twĩ na ũũgĩ wothe, nĩ getha tũkarũgamia mũndũ o wothe aagĩrĩire kũna thĩinĩ wa Kristo. 29O na niĩ-rĩ, nĩ wĩra ũcio ndutaga ngĩũnogagĩra, ngĩĩgiaga kũringana na hinya ũrĩa andutithagia wĩra naguo arĩ thĩinĩ wakwa.
Currently Selected:
AKOLOSAI 1: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
