ATŨMWO 26

1NAKE Agiripa akĩĩra Paulo, Wĩ na rũtha wĩarĩrĩrie wee mwene. Na hĩndĩ ĩo Paulo agĩtambũrũkia guoko, agĩitĩka gũcokia ũhoro wake atĩrĩ:

2Nĩngũigua ngenete mũno, mũthamaki ũyũ Agiripa, nĩ ũndũ nĩngũrekwo ndĩĩarĩrĩrie ũmũthĩ mbere yaku ũhoro wa maũndũ mothe marĩa ’thitakĩtwo namo nĩ Ayahudi, 3na makĩria nĩ ũndũ ũrĩ mũũgĩ na kũmenya mĩtugo yothe ya Ayahudi na maũndũ mothe marĩa moranagio nĩo: tondũ ũcio ndagũthaitha ũ’thikĩrĩrie ũtegũthethũka.

4Rĩu-rĩ, Ayahudi othe nĩmoĩ ũhoro wa mĩthiĩre yakwa ĩrĩa ndũire ’thiaga nayo kuuma ndĩ o mũnyinyi, o kĩambĩrĩria rĩrĩa ndatũũrainie na andũ a rũrĩrĩ rũakwa, o na kũrĩa Jerusalemu: 5#Atũm 23.6; Filip 3.5.nao nĩmanjũĩ kuuma o tene, na mangĩenda-rĩ, maahota kũheana ũira wa ũrĩa ndatũire ndĩ Mũfarisai, ndĩĩrutanĩirie na kĩyo kĩnene kũrũmia maũndũ mothe ma ndini iitũ. 6Na rĩu ndũgamĩte haha njirithĩrio ũhoro wa ũrĩa ndũire njĩrĩgĩrĩire kĩĩranĩro kĩrĩa Ngai erĩire maithe maitũ. 7Nakĩo nĩkĩo mĩhĩrĩga iitũ ikũmi na ĩĩrĩ ĩĩrĩgagĩrĩra kũhingĩrio, ĩgagĩtũũra ĩturagia ndu ĩkahoya Ngai na kĩyo mũthenya o na ũtukũ. Na rĩrĩ, mũthamaki ũyũ, kĩĩrĩgĩrĩro o ro kĩu nĩkĩo ’thitakĩirũo nĩ Ayahudi! 8Nĩ kĩ gĩgũtũma mũtue atĩ gũtingĩĩtĩkĩka atĩ Ngai nĩariũkagia andũ akuũ? 9#Atũm 8.3; 22.4,5.Niĩ-rĩ, ti-itherũ kwĩ hĩndĩ ndonaga, atĩ nĩnjagĩrĩirũo nĩ gwĩka maũndũ maingĩ ma gũthahĩrĩria rĩĩtwa rĩa Jesu wa Nazarethi. 10Na noguo ndekire kũrĩa Jerusalemu: ngĩgĩikia andũ aingĩ aamũre korokoro-inĩ, ndarĩkia kũheo wathani nĩ athĩnjĩri-Ngai arĩa anene, o na rĩrĩa maatuĩrĩirũo atĩ moragwo nĩndetĩkanagia na ituĩro rĩu. 11Ningĩ nĩ kũgeria ndageragia kũmaringĩrĩria marume Ngai, nĩ kũmaherithagia kaingĩ thunagogi-inĩ ciothe. Na tondũ wa ũrĩa ndamarakarĩire mũno ta ndĩ mũgũrũki, ngĩmathingata o matũũra-inĩ ma mabũrũri mangĩ ngĩmanyariraga.

12Na rĩrĩa ndekaga ũguo-rĩ, ngĩkorũo ngĩthiĩ Dameski ’heetwo wathani na hinya nĩ athĩnjĩri-Ngai arĩa anene. 13Na rĩrĩ, mũthamaki ũyũ, o mĩaraho, ndĩ njĩra, ngĩkĩona ũtheri uumĩte Igũrũ, ũkengete kũrĩ riũa, ũkĩnjarĩra na mĩena yothe o na andũ arĩa twarĩ nao njĩra-inĩ. 14Na rĩrĩa twagũire thĩ ithuĩ othe, ngĩigua mũgambo ũkĩnjarĩria na mwarĩrie wa Ahibirania, ũkĩnjũria, Saulu, Saulu, ũ’nyariraga nĩkĩ? Nĩ hinya harĩ wee ũgĩikia hati wathecwo na mĩcengi. 15Ngĩkĩmũũria atĩrĩ, Wee nĩwe ũ, Mwathani? Nake Mwathani akiuga atĩrĩ, Nĩ niĩ Jesu ũrĩa ũnyariraga. 16No rĩrĩ, ũkĩra wĩrũgamie na magũrũ; nĩ gũkorũo ũndũ ũrĩa ũtũmĩte nguumĩrĩre nĩ ũyũ, atĩ ngũtue ndungata o na mũira, ũtuĩke wa kuumbũranĩra maũndũ marĩa wonete, o na marĩa ũgacoka kuona ndakuumĩrĩra rĩngĩ. 17Nĩ kũhonokia ngakũhonokia kũrĩ andũ anyu, o na kũrĩ andũ a Ndũrĩrĩ ingĩ o arĩa ngũkũrekia kũrĩ o, 18nĩguo ũkamahingũre maitho, magarũrũkĩre ũtheri matigane na nduma, o na magarũrũkĩre Ngai matigane na hinya wa Shaitani; nĩ getha marekagĩrũo mehia mao na magaĩrũo igai hamwe na arĩa maamũrĩtwo magatherio nĩ ũndũ wa kũnjĩtĩkia.

19Gwagĩtuĩka ũguo, mũthamaki Agiripa, ndiigana kũrega gwathĩka nĩ kĩoneki kĩu ndonirio kiumĩte Igũrũ, 20#Atũm 9.20,28,29.no kũheana ndaheanire ũhoro, ngĩĩraga andũ atĩ nĩmaagĩrĩirũo nĩ kwĩrira magarũrũkĩre Ngai, na mekage maũndũ marĩa maringaine na ũhoro wa kwĩrira, ngĩambĩrĩria Dameski, ngĩcokerera Jerusalemu, o na bũrũri wothe wa Judea, o na kwa Ndũrĩrĩ iria ingĩ o nacio. 21Ũndũ ũcio nĩguo watũmire Ayahudi ma’nyitĩre hekarũ thĩinĩ, magerie kũnjũraga. 22No rĩrĩ, nĩ ũndũ wa kuona ũteithio ũrĩa uumaga kwĩ Ngai, nĩkĩo ndũire ndĩ o ho o na ũmũthĩ; na ngoimbũragĩra andũ ũhoro, arĩa matarĩ igweta o na arĩa marĩ igweta, na gũtirĩ ũndũ njaragia thengia o maũndũ marĩa anabii o na Musa moigire atĩ nĩmagoka: 23#1 Kor 15.20; Isa 42.6; 49.6.namo nĩmo maya, atĩ Kristo no mũhaka akanyarirĩka, o na atĩ nĩakahunjĩria andũ a rũrĩrĩ ruitũ o na arĩa a Ndũrĩrĩ ingĩ ũhoro wa ũtheri, nĩ ũndũ wa gũtuĩka ũrĩa wa mbere wa kwamba kũriũka oime kũrĩ arĩa akuũ.

24Na rĩrĩa earagĩrĩria ũguo, Fesito akĩmwĩra na mũgambo mũnene atĩrĩ, Paulo, nĩ kũgũrũka ũgũrũkĩte; gũthoma kũrĩa kũingĩ ũthomete nĩkũrakũgũrũkia. 25Nowe Paulo akiuga atĩrĩ, Aca, ndigũrũkĩte, mũnene ũyũ mũgathe Fesito, no kwaria ngwaria mohoro ma ma, o marĩa matakĩrĩ ma ũgũrũki. 26Amu-rĩ, mũthamaki nĩoĩ maũndũ macio, nĩkĩo ndaaria nake itarĩ ũndũ ngũhitha: nĩ ũndũ nĩnjũĩ o wega atĩ gũtirĩ o na ũmwe wamo ũtũire ũrĩ mũhithe kũrĩ we; nĩ ũndũ ũhoro ũcio ndwekĩirũo gaturi-inĩ. 27Rĩu rĩ, mũthamaki Agiripa, nĩũgĩĩtĩkĩtie anabii? Nĩnjũĩ atĩ nĩũmetĩkĩtie. 28Nake Agiripa agĩcoka akĩĩra Paulo atĩrĩ, Anga ũrenda kũndua Mũkristiano na ndeto o ro nguhĩ! 29Nake Paulo akĩmwĩra atĩrĩ, O na ingĩtuĩka nguhĩ kana o ndaya-rĩ, Ngai arogĩtũma gũtuĩke atĩ towe wiki, no ningĩ o na andũ aya othe mekũnjigua ngĩaria ũmũthĩ, matuĩke o ta niĩ, thengia o mĩnyororo ĩno.

30Nake mũthamaki na barũthi na Berinike, o na andũ arĩa maaikarĩte nao magĩgĩũkĩra. 31Na maarĩkia kwehera, makĩaranĩria makiuga atĩrĩ, Mũndũ ũcio ndarĩ ũndũ ekaga wa gũtũma oragwo kana ohwo. 32Nake Agiripa akĩĩra Fesito atĩrĩ, Mũndũ ũcio nĩangĩahota kuohorũo, atangĩacokirie cira riiko gwĩ Kaisari.

Currently Selected:

ATŨMWO 26: OGKBIBLE

Highlight

Copy