ATŨMWO 27

1NA rĩrĩ, gwagĩtuwo atĩ tũthiĩ Italia tũhaicĩte marikabu, Paulo na andũ amwe angĩ maarĩ ohe makĩneo mũnene ũmwe wa athigari igana wetagwo Julius, ũrĩa warĩ wa mbũtũ ĩrĩa ya Augusito. 2Na twarĩkia kũhaica marikabu yarĩ ya Aduramutio, ĩrĩa yakiriĩ gũthiĩra kũndũ kũmwe na kũmwe kwa Asia, kwarĩ hari-inĩ cia iria rĩrĩa inene-rĩ, tũkĩgwata rũgendo tũgĩthiĩ, twĩ na mũndũ wetagwo Arisitariko, Mũmakedonia wa Thesalorike. 3Na mũthenya ũyũ ũngĩ tũkĩroka gũkinya Sidoni, tũkiumĩra marikabu kuo. Nake Julius agĩĩka Paulo wega, akĩmũhe rũtha athiĩ akarore arata ake ateithangio nĩo. 4Na twoima kuo, tũkĩgwata rũgendo, tũgĩthiĩ na marikabu twĩgiritanĩtie na gĩthama gĩa Kuporo, nĩ gũkorũo rũhuho nĩrũagiragia marikabu ĩthiĩ wega. 5Na twarĩkia kũringa iria rĩrĩa rĩĩ gũkuhĩ na mabũrũri ma Kilikia na Pamfulia, tũgĩkinya Mura, itũũra rĩa bũrũri wa Lukia. 6Kũu nĩkuo mũnene ũcio wa athigari igana onire marikabu ya Isikanderia yendaga gũthiĩ Italia, agĩtũtonyia yo. 7Na rĩrĩa twathiaga o kahora mũno matukũ maingĩ, tũkĩya gũkinya hakuhĩ na handũ hetagwo Kinido tũkĩonaga hinya, na tondũ wa ũrĩa twagiragio nĩ rũhuho gũthiĩ na mbere, tũgĩcoka tũgĩthiĩ twĩgiritanĩtie na Kirete harĩa haringaine na kũndũ gwĩtagwo Salimone. 8Na twarĩkia gũthiathia na hinya mũno twĩgiritanĩtie na gĩthama kĩu, tũgĩkinya handũ hetagwo Bandari Nzuri; narĩo itũũra rĩrĩa rĩetagwo Lasea rĩarĩ hakuhĩ na hau.

9Na gwagĩkorũo matukũ maingĩ nĩmathirĩte, na rĩu rũgendo rũarĩ na ũgwati, kuona atĩ hĩndĩ ya gĩathĩ kĩrĩa gĩa kwĩhinga kũrĩa irio nĩyahĩtũkĩte-rĩ, Paulo akĩmataara, 10akĩmera atĩrĩ, Athuri aya, nĩnguona atĩ rũgendo rũrũ nĩrũgũtuĩka rũa mũtino, o na rũa gũtũma indo nyingĩ ciũre, na to indo iria ikuuĩtwo ciiki o na marikabu, no makĩria o na ithuĩ ithuene tũũre. 11Ĩndĩ mũnene ũcio wa athigari igana endaga gũthikĩrĩria mwathi wa marikabu, o na mwene yo, kũrĩ gũthikĩrĩria ndeto iria ciaaririo nĩ Paulo. 12Na tondũ bandari ĩo ndĩagĩrĩire gũikarũo kĩmera kĩa heho, andũ arĩa aingĩ makĩona arĩ wega kũhaica marikabu moime hau, nĩ getha makinye Foinike, kũngĩkorũo kwahoteka, na maninĩre kĩmera kĩa heho kuo. Nakuo kũu nĩ bandari ĩmwe ya Kirete ĩrorete gathigathini-mashariki na gũthinimashariki.

13Na rĩrĩa rũhuho ruumĩte gũthini rũagĩitĩkire kũhurutana kahora, makĩĩgereria atĩ nĩ hĩndĩ mekuona ũrĩa mendaga, makĩohora marikabu, magĩthiĩ megiritanĩtie mũno na gĩthama kĩu gĩa Kirete. 14No rĩrĩ, matanathiĩ mũno, makĩgũthwo nĩ kĩhuhũkanio kĩnene kĩa rũhuho rũĩtagwo Eurakulo kiumĩte gĩthama-inĩ kĩu: 15nayo marikabu yanyitwo nĩ rũhuho rũu ĩkĩremwo nĩ gũthiĩ na mbere kũrĩa yarorete, tũgĩgĩtiga kũgeria kũmĩtwara na kũu, tũgĩtwarũo o ũguo nĩ rũhuho. 16Tũgĩcoka tũgĩtwarũo na ihenya tũrorete gathama-inĩ kanini getagwo Kauda, tũkĩĩgiritania nako; kũu nĩkuo twahotire kũhaicia kamacua igũrũ rĩa marikabu, o tũkĩonaga hinya mũno. 17Nao andũ maarĩkia gũkahaicia, magĩĩkĩra marikabu hinya nĩ kũmĩthiũrũrũkĩria mĩkanda ya kũmĩohania ndikehe. Thutha wa ũguo, tondũ wa ũrĩa metigĩrĩte gũtwarĩrĩrio magaikio handũ he mũthanga hetagwo Suritisi, magĩkũnja indo iria marikabu yatwaragwo nĩcio, magĩciiga, magĩcoka gũtwarĩrĩrio o ro ũguo nĩ rũhuho. 18Na twaya kũhinyĩrĩrio mũno nĩ kĩhuhũkanio, mũthenya ũyũ ũngĩ magĩitĩka gũte mĩrigo iria-inĩ: 19naguo mũthenya wa ĩtatũ rĩ, magĩikia indo iria cia marikabu iria-inĩ na moko mao ene. 20Na rĩrĩa twaninire matukũ maingĩ tũtekwarĩruo nĩ riũa kana njata, nakĩo kĩhuhũkanio kĩnene ma gĩgĩtũũra gĩtũhinyĩrĩirie-rĩ, kĩĩrĩgĩrĩro kĩrĩa gĩothe twarĩ nakĩo gĩa atĩ hihi nĩtũkahonoka gĩgĩthira.

21Nao andũ maakorũo maikarĩte hĩndĩ ndaya matekũrĩa irio, hĩndĩ ĩo Paulo akĩrũgama gatagatĩ-inĩ kao, akĩmera atĩrĩ, Athuri aya, nĩ kaba mũngĩanjiguire, mũtige kuuma Kirete. Mũngĩekire ũguo, mũtingĩonete maũndũ maya ma kũmwĩhia, na ma gũtũma indo cianyu ciũre. 22No rĩu ndamũthaitha mũũmĩrĩrie: nĩ ũndũ gũtirĩ mũndũ o na ũmwe wanyu ũkora, no marikabu iiki. 23Tondũ atĩrĩ, ũtukũ o ũyũ nĩnyumĩrĩirũo nĩ mũraika wa Ngai o ũrĩa niĩ ndĩ wake, na nĩwe ndungatagĩra, 24nake aanjĩra atĩrĩ, Tiga gwĩtigĩra, Paulo; ndũrĩ hingo ũtakarũgama mbere ya Kaisari: na rĩrĩ, Ngai nĩetĩkĩrĩte atĩ andũ arĩa othe megũthiĩ rũgendo nawe mahonoke nĩ ũndũ waku. 25Tondũ wa ũguo, athuri aya, kĩũmĩrĩriei, nĩ gũkorũo nĩngwĩhoka Ngai atĩ nĩgũgatuĩka o ta ũguo anjĩrire. 26No rĩrĩ, tũtirĩ hingo tũtagaikio gĩthama-inĩ kĩna.

27Na rĩu-rĩ, gwakinya ũtukũ wa mũthenya wa ikũmi na ĩna tũgĩtwaragĩrĩrio ũũ na ũũ iria-inĩ rĩrĩa rĩĩtagwo Adiria, ta ũtukũ gatagatĩ atwari a marikabu makĩĩgereria atĩ nĩmarakuhĩhĩria bũrũri, 28magĩgĩikia iria-inĩ kanyamũ ga kũgera ũrĩa maĩ marikĩte, makĩona atĩ marikĩte ta futi igana na mĩrongo ĩĩrĩ. Na kahinda kanini gaathira magĩcoka kũgera rĩngĩ makĩona atĩ no futi mĩrongo kenda. 29Na tondũ wa ũrĩa metigagĩra gũikio handũ harĩ rũaro rũa ihiga-rĩ, makĩoha marikabu mũthia-inĩ wa na thutha nĩ gũikia nanga#27.29 Nanga: nĩ kĩgera kĩnene na kĩritũ kĩohaga marikabu iria-inĩ, ndĩgatwarũo nĩ rũhuo. Rora Ahib 6.19. inya iria-inĩ, magĩeterera gũkĩe mathethũkĩte. 30Na rĩrĩa atwari a marikabu maacaragia njĩra ya kuuma marikabu-inĩ, more, na maakorũo maikũrũkĩtie kamacua iria-inĩ, makĩhenania atĩ nĩmekwenda gũikia nanga iria-inĩ cia kuoha mũthia wa mbere-rĩ, 31Paulo akĩĩra mũnene ũrĩa wa athigari igana o na athigari nao atĩrĩ, Andũ aya maaga gũikara marikabu-inĩ mũtihonoka. 32Hĩndĩ ĩo athigari magĩgĩtinia mĩkanda ya kamacua kau, makĩreka kore.

33Na ruoro rũgĩtema-rĩ, Paulo akĩmathaitha marĩe irio, akĩmera atĩrĩ, Ũmũthĩ nĩguo mũninĩte matukũ ikũmi na ana mũikarĩte o ũguo mwĩimĩte irio, mũtekũrũma kĩndũ. 34Tondũ wa ũguo ndamũthaitha mũrĩe irio, nĩ ũndũ gwĩka ũguo nĩ gwa kũmũteithia, mũhonoke: tondũ atĩrĩ, gũtirĩ rũcuĩrĩ rũa mũtwe wa mũndũ o na ũmwe rũkora. 35Na aarĩkia kuuga ũguo, akĩoya mũgate, agĩcokeria Ngai ngatho andũ othe marĩ ho, agĩcoka akĩwenyũra, agĩitĩka kũrĩa. 36Nao othe magĩkĩũmĩrĩria, makĩrĩa irio o nao. 37Na ithuĩ othe arĩa twarĩ marikabu-inĩ, twarĩ andũ magana merĩ na mĩrongo mũgwanja na atandatũ. 38Nao maarĩkia kũrĩa makĩhũna, magĩikia ngano ĩrĩa yakuuĩtwo iria-inĩ, nĩ getha marikabu ĩhũthe.

39Na gwakĩa-rĩ, matiigana kũmenya bũrũri ũcio: no nĩmonire handũ hega ha gũtonyeria marikabu harĩ na mũthanga hũgũrũrũ-inĩ, makĩaranĩria mamenye kana hihi maahota gũtwaratwara marikabu igũrũ rĩaguo. 40Na maarĩkia kuohora marikabu ĩtigane na nanga, magĩcitiga iria-inĩ, na hamwe na ũguo makĩohora mĩkanda ĩrĩa thukani#27.40 Thukani: nĩ mũtĩ wa kũgarũra marikabu ĩthiĩ o harĩa mũmĩtwari angĩenda. Rora Jak 3.4. yohetwo nayo. Naguo tama ũrĩa mũnyinyi wekagĩrũo mbere ya marikabu makĩũhaicia ũnyite rũhuho, magĩthiĩ na mbere marorete hũgũrũrũ-inĩ. 41No rĩrĩ, maakinya handũ harĩa maria merĩ magomanĩire, magĩtũma marikabu ĩĩikie hũgũrũrũ-inĩ: naguo mũthia wa mbere wayo ũkĩgũtha thĩ, ũgĩikara o ro ũguo, ũkĩrema kũrutĩka: no mũthia ũrĩa wa na thutha ũgĩitĩka kuunĩkanga nĩ ũndũ wa kũhũrũo na hinya nĩ makũmbĩ ma maĩ. 42Nao athigari magĩtaarana atĩ andũ arĩa ohe moragwo, mũndũ wao ndakae gũthambĩra, ore. 43Nowe mũnene wao akĩmagiria meke ũguo mendete, nĩ kwenda kũhonokia Paulo, agĩathana atĩ arĩa mekũhota gũthambĩra meikie iria-inĩ maambe makinye thĩ hũgũrũrũ-inĩ; 44nao arĩa angĩ-rĩ, amwe makinye kuo megwatĩrĩire mbaũ, na angĩ megwatĩrĩire icunjĩ ingĩ cia marikabu. Ũguo noguo gwatuĩkire atĩ andũ othe magĩkinya thĩ hũgũrũrũ-inĩ, magĩkĩhonoka.

Currently Selected:

ATŨMWO 27: OGKBIBLE

Highlight

Copy