ATŨMWO 25

1GWAGĨTUĨKA ũguo-rĩ, rĩrĩa Fesito aambĩrĩirie gwathana bũrũri ũcio, matukũ matatũ maathira, akĩambata Jerusalemu oimĩte Kaisarea.

2Nao athĩnjĩri-Ngai arĩa anene na athuri a Ayahudi makĩmwĩra ũhoro wa Paulo makĩmũthahĩrĩria: makĩmũthaitha atĩ, 3tondũ wa wega wake, etĩkĩre kũrekania, amũgĩrithie oke Jerusalemu; nĩguo mamuoherie njĩra ĩrĩa arĩũkĩra mamũũrage. 4Ĩndĩ Fesito akĩmacokeria atĩ Paulo nĩarangagĩrũo kũu Kaisarea, na atĩ we mwene akiriĩ gũcoka kuo. 5Agĩcoka akiuga atĩrĩ, Tondũ ũcio, rekei andũ anyu arĩa marĩ igweta tũthereranie nao, na kũngĩkorũo nĩkũrĩ ũndũ mũũru mũndũ ũcio ekĩte, makamũthitake arĩ o.

6Nake aarĩkia gũikarania nao matukũ matakĩrĩte anana, kana ikũmi, agĩtherera Kasarea; na mũthenya ũyũ ũngĩ, akĩroka gũikarĩra gĩtĩ gĩake gĩa gũcirĩra, agĩathana atĩ Paulo arehwo. 7Nake aakinya, Ayahudi arĩa maathererete kuuma Jerusalemu makĩmũrigicĩria, makĩmũthitakaga na maũndũ maingĩ moru na me hinya, marĩa mataahotire kuonania atĩ nĩ ma ma. 8Nake Paulo, rĩrĩa aaitĩkire gũcokia maũndũ macio, akiuga atĩrĩ, Ha ũhoro wa watho wa Ayahudi, o na wa hekarũ, o na wa Kaisari-rĩ, niĩ ndirĩ ndehia ũndũ o wothe. 9Nowe Fesito, tondũ wa ũrĩa endaga kwĩendereria harĩ Ayahudi, agĩcokeria Paulo akĩmũũria atĩrĩ, Nĩũkwenda kwambata Jerusalemu, nĩ getha ũgacirithĩrio maũndũ macio kuo nĩ niĩ? 10Nowe Paulo akiuga atĩrĩ, Nĩ kũrũgama ndũgamĩte gĩtĩ-inĩ gĩa gũcirĩra kĩrĩa gĩa Kaisari, o harĩa njagĩrĩirũo nĩ gũcirithĩrio: ndikĩrĩ ũũru njĩkĩte Ayahudi, o ta ũrĩa ũmenyete wega wee mwene. 11Nĩ ũndũ ũcio-rĩ, ingĩkorũo ndĩ mwĩhia na njĩkĩte ũndũ wa gũtũma njũragwo, ndikũrega gũkua: no rĩrĩ, maũndũ macio megũ’thitakĩra mangĩkorũo ti ma ma, gũtirĩ mũndũ ũngĩhota kũ’neana kũrĩ o. Nĩngũgĩcokia cira riiko gwĩ Kaisari. 12Hĩndĩ ĩo Fesito, aarĩkia kwaria na kĩama, akĩmũcokeria atĩrĩ, Tondũ nĩwacokia cira riiko gwĩ Kaisari, kũu gwa Kaisari nĩkuo ũgathiĩ.

13Na rĩrĩ, matukũ mamwe maathira, Agiripa ũrĩa mũthamaki na Berinike magĩkinya Kaisarea, makĩgeithia Fesito. 14Na maaikara matukũ maingĩ kuo, Fesito akĩmenyithia mũthamaki ũcio ũhoro wa Paulo, akĩmwĩra atĩrĩ, Harĩ mũndũ ũmwe haha watigirũo arĩ muohe nĩ Felike; 15na rĩrĩa ndarĩ Jerusalemu, athĩnjĩri-Ngai arĩa anene na athuri a Ayahudi makĩnjĩra ũhoro wake, magĩ’thaitha atĩ ndĩmũtuĩre ituĩro. 16Ngĩkĩmacokeria atĩrĩ, atĩ ti mũtugo wa Aroma kũneana mũndũ, athitakani na mũthitakwo mataambĩte kũrehwo hamwe monane, nake ũcio mũthitakwo aheo hĩndĩ ya kwĩarĩrĩria ũhoro-inĩ wa ũndũ ũcio athitakĩirũo. 17Tondũ ũcio rĩ, rĩrĩa monganire gũkũ, ndiigana gwĩkĩra mũhũthia, no kũroka ndarokire gũikarĩra gĩtĩ kĩrĩa gĩa gũcirĩra, ngĩathana atĩ mũndũ ũcio arehwo. 18Nao athitakani maarĩkia kũrũgama, matiigana kũmũthitaka na ũndũ o na ũmwe mũũru ta ũrĩa ndegereirie, 19no kũrehe maarehire maũndũ mamwe ma ndini yao marĩa moranagia nake, o na ũhoro wa mũndũ wĩtagwo Jesu ũrĩa wakuire, nake Paulo nĩoigaga, agwatĩirie, atĩ arĩ o muoyo. 20Na niĩ-rĩ, tondũ nĩndarigirũo nĩ ũrĩa ingĩtuĩria maũndũ ma mũthemba ũcio, ngĩmũũria kana etĩkĩra gũthiĩ Jerusalemu agacirithĩrio maũndũ macio kuo. 21No rĩrĩ, rĩrĩa Paulo aahoire atĩ cira wake ũrũgamio nĩguo ũgacirũo nĩ Kaisari Augusito, ngĩathana atĩ aikario haha o nginya ngamũtwarithia kũrĩ Kaisari. 22Nake Agiripa akĩĩra Fesito atĩrĩ, O na niĩ mwene ndenda kũmwĩiguĩra akĩaria. Nake akĩmwĩra, Nĩũkamũigua rũciũ.

23Nĩ ũndũ ũcio-rĩ, mũthenya ũyũ ũngĩ, Agiripa na Berinike magĩũka marĩ na mĩago mĩnene, magĩtonya harĩa haaciragĩrũo me hamwe na anene a athigari, o na athuri a itũũra rĩu arĩa maarĩ igweta. Nake Fesito agĩathana atĩ Paulo arehwo. 24Na Fesito agĩitĩka kuuga atĩrĩ, Mũthamaki ũyũ Agiripa, o na inyuĩ othe mũrĩ haha hamwe na ithuĩ, nĩmũkuona mũndũ ũyũ: nĩwe kĩrĩndĩ gĩothe kĩa Ayahudi kĩa’hoire kũrĩa Jerusalemu, o na gũkũ, atĩ ngacire ũhoro wake, makĩanĩrĩra makiugaga atĩ ndaagĩrĩirũo nĩ kũrekwo atũũre muoyo. 25No niĩ-rĩ, ndiigana kuona atĩ ekĩte ũndũ o na ũmwe wa gũtũma oragwo: na tondũ we mwene nĩaacokirie cira riiko, nĩguo ũgacirũo nĩ Kaisari Augusito, ngĩona arĩ wega ndĩmũtwarithie kũrĩ we. 26Ĩndĩ ndikĩrĩ ũndũ mũrũmu ingĩkĩandĩkĩra mũnene wakwa ũhoro-inĩ wake. Nĩkĩo ndamũrehe mbere yanyu, o na makĩria mbere yaku, wee mũthamaki Agiripa, nĩ getha, ũhoro wake warĩkia gũtuĩrio wega, ngĩmenye ũrĩa ndĩrĩandĩka. 27Nĩ gũkorũo nguona atĩ nĩ ũndũ ũtaagĩrĩire gũtũma mũndũ muohe itonanĩtie maũndũ marĩa athitakĩtwo namo.

Currently Selected:

ATŨMWO 25: OGKBIBLE

Highlight

Copy