ATŨMWO 24

1NA matukũ matano maathira, Anania, mũthĩnjĩri-Ngai ũrĩa mũnene, marĩ hamwe na athuri amwe magĩtherera, magĩthiĩ na wakiri wa kũmaarĩrĩria wetagwo Teritulo; na makĩhe barũthi ũhoro wa Paulo wa kumũthahĩrĩria. 2Nake Paulo aarĩkia gwĩtwo, Teritulo agĩitĩka kũmũthitaka akiuga ũũ,

Atĩrĩrĩ, mũnene ũyũ mũgathe Felike, tuonaga thayũ mũno nĩ ũndũ waku, naruo rũrĩrĩ ruitũ rũrũngagĩrũo maũndũ moru, makaagĩra, tondũ wa ũrĩa ũbaragĩrĩra maũndũ maitũ wega. 3Na tũkaamũkagĩra ũteithio ũcio mahinda mothe o na kũndũ guothe twĩ na ngatho nyingĩ. 4No rĩrĩ, nĩ getha ndigakũnogie makĩria, ndagũthaitha nĩ ũndũ wa tha ciaku atĩ ũtũthikĩrĩrie tũkwĩre tuugo tũnini. 5Nĩ gũkorũo mũndũ ũyũ-rĩ, nĩtũmuonete arĩ mũndũ mũnanu, ũtũmaga Ayahudi mokĩrie ngũĩ kũndũ guothe kũrĩa matũũraga gũkũ thĩ, na nĩ mũtongoria wa thiritũ ĩrĩa ĩĩtagwo Anazari; 6ningĩ nĩaageririe gũthahia hekarũ, nĩkĩo twamũnyitire. [Na nĩtũngĩamũtuĩrĩire kũringana na watho witũ; 7no rĩrĩ, Lusia, mũnene ũrĩa wa mbũtũ ya athigari nĩokire, akĩmũruta moko-inĩ maitũ nĩ gũtũgiginya mũno, 8agĩgĩathana atĩ amũthitaki moke kũrĩ wee.] Na nĩũrĩhota kũmenya wega ũhoro wa maũndũ macio mothe twamũthitakĩra, wamũũrangia ũhoro wake wee mwene. 9Nao Ayahudi magĩĩtĩkania nake makiuga atĩ maũndũ macio oiga noguo matariĩ.

10Na rĩrĩa barũthi aamũheneirie na guoko atĩ arĩ na rũtha kwaria, Paulo agĩcokia ũhoro atĩrĩ,

Kuona atĩ nĩnjũĩ atĩ nĩũtũire ũciragĩra rũrĩrĩ rũrũ mĩaka mĩingĩ, nĩngũitĩka gũcokia ũhoro ũcio waario ngenete. 11Tondũ rĩ, wahota kwĩmenyera atĩ gũtithirĩte matukũ ikũmi na merĩ nginya ndathiĩ Jerusalemu kũhoya Ngai: 12o na gũtirĩ hingo maanangora ngĩkararania na mũndũ o na ũrĩkũ, o na kana ngĩũkĩria ngũĩ hekarũ-inĩ kana thunagogi-inĩ, o na kana itũũra-inĩ. 13O na ningĩ-rĩ, matingĩhota kuonania kĩhooto kũrĩ wee kĩa maũndũ macio maa’thitakĩra rĩu. 14No nĩ kuumbũra ngũkuumbũrĩra atĩrĩ, atĩ nĩndũire ndungatagĩra Ngai wa maithe maitũ na Njĩra o ĩrĩa ĩtuagwo nĩ andũ aya thiritũ ya kũhĩtithania. Ĩndĩ maũndũ mothe marĩa merekanĩrĩire na watho witũ, o na marĩa maandĩkirũo nĩ anabii, nĩmo ndũire ndĩmetĩkagia. 15Ngagĩtũũra ndĩĩhokete Ngai, ngĩĩrĩgagĩrĩra atĩ kwĩ hĩndĩ gũkariũkio andũ arĩa athingu o na arĩa matarĩ athingu, o ta ũrĩa andũ aya o nao matũire merĩgĩrĩire. 16Naho ha ũhoro-inĩ ũcio, nĩ kwĩrutanĩria ndĩĩrutanagĩria niĩ mwene gũikara hingo ciothe ndĩ na thamiri ĩtarĩ ũcuke maũndũ-inĩ ma Ngai, o na ma andũ. 17#Atũm 21.17-28.Na rĩrĩ, mĩaka mĩingĩ yathira ndĩ ũgeni, nĩndokire kũrehere andũ a rũrĩrĩ ruitũ mbia iria ciahothetwo nĩ ũndũ wa tha, o na indo cia kũrutĩrũo Ngai. 18Na rĩrĩa ndahang’anagia na maũndũ macio, andũ aya nĩmaangorire hekarũ-inĩ ndĩĩtheretie, gũtarĩ andũ monganĩte, o na kana ngũĩ kuo. No rĩrĩ, nĩhaarĩ Ayahudi amwe moimĩte Asia- 19nao nĩo mangĩagĩrĩirũo nĩ gũkorũo marĩ haha harĩ wee ma’thitake, mangĩkorũo me na ũndũ mekũnjukĩra. 20O na kana ũkĩreke andũ aya moige, o ene, ũũru ũrĩa monire hĩndĩ ĩrĩa ndarũgamirio kĩama-inĩ, 21#Atũm 23.6.tiga hakorirũo no ũhoro ũyũ ũmwe ndoigire na mũgambo mũnene nũngiĩ harĩ o atĩrĩ, Nĩ ũhoro wa kũriũka kwa arĩa akuũ ngũcirithĩrio ũmũthĩ mbere yanyu.

22No Felike, tondũ nĩaamenyangĩte makĩria mohoro ma Njĩra ĩo, akĩrũgamia cira akiuga atĩrĩ, Rĩrĩa Lusia, mũnene ũrĩa wa mbũtũ ya athigari arĩũka, nĩrĩo ndĩrĩtua cira wanyu. 23Agĩgĩatha mũnene ũrĩa wa athigari igana atĩ Paulo arangĩrũo, no atige gũtindĩrĩrũo mũno, na arata ake matikagirio mamũteithagie.

24Na rĩrĩ, matukũ mamwe maathira, Felike agĩũka marĩ na mũtumia wake Dirusila, ũrĩa warĩ Mũyahudi, akĩgĩrithia Paulo; na oka, akĩmũthikĩrĩria akĩheana ũhoro wa gwĩtĩkia Kristo Jesu. 25Na rĩrĩa aaragia ũhoro wa ũthingu, na wa mũndũ kwĩgirĩrĩria merirĩria ma mwĩrĩ, o na wa cira ũrĩa ũgoka-rĩ, Felike akĩmaka, agĩcokia atĩrĩ, Rĩu wĩthiĩre; na rĩrĩa ndĩrĩona hĩndĩ njagĩrĩru, nĩndĩrĩgwĩta ũũke. 26Na ningĩ aatũire erĩgagĩrĩra atĩ hihi nĩarĩhakwo na mbia nĩ Paulo. Nĩkĩo aamwĩtaga kaingĩ makĩria, materetage nake. 27No rĩrĩ, mĩaka ĩĩrĩ yathira, Felike akĩrĩbũrũo nĩ Porikio Fesito; na tondũ nĩendaga gũkenia Ayahudi, Felike agĩtiga Paulo arĩ muohe.

Currently Selected:

ATŨMWO 24: OGKBIBLE

Highlight

Copy