Gate 36

1“ABesarere na Oriaba nikamanga sunge, na agu akumba dunduko du na tatamana, nga agu yo Yekova amoi rugatinapai ku kpotoyo yo na inahe, ka ina waĩ i ka manga gu sunge dunduko nga ga kparakpara ziazia ba, ringbisi he kina kuti gu pa ha dunduko Yekova arugu he.”

Pa ye aboro na tumbatumba agamahe kpaima

2Mose ki yambu aBesarere na Oriaba, na agu akumba dunduko du na tatamana, nga agu yo Yekova amoi tatamana ku kpotoyo yo, nga agu yo dunduko kpotoyo yo awo ti yo i ye sa sunge ka manga ha; 3i ki rogodi gu tumbatumba agamahe re be Mose dunduko nga gu awiri aYisaraere aye na ni tipa gu sunge nga sunge kparakpara ziazia ba, ka manga ha na ni. I ki niye na awiso na kura agamahe fu ko kindi na nyemuhe, 4si du aboro tatamana nangia agu yo nanamanga sunge dunduko nga ga kparakpara ziazia ba, i aye ba gayo sunge yo dunduko nga gu i amanga. 5I ki ta gumba pai fu Mose, niya, “Aboro naye na bakere ahe ki susi gu rengbe ka manga gu sunge na ni nga gu Yekova arugu pa manga ha.” 6Mose ki rũ ndika, i ki taki pande he ku bataya yo dunduko, ki ya. “Ka kumba na de nimángi nga kura sunge ki niye na tumbatumba agamahe berewe tipa kparakpara ziazia ba ya.” Si du i akaraga aboro ti ni ti ye na ahe; 7bambiko agu ahe nadu be yo si arengbe na manga sunge dunduko, si ki susi a.

Pa manga Banye

(Gate 26:1-37)

8Agu akumba dunduko nadu na tatamana dagba aborosunge yo i ki mangi banye na asiasi aroko ti ni bawe; i amangi he na sunge bangbasiaha na kpia akeruba ti ni rogo tutu ndindii giri nzibi, na gire ni gbaya ha, na gu du ngungungu, na gu du ni zamba ha. 9Bagiza gu roko sa adu wa bagiza mbiribe 28, patihe adu wa bagiza mbiribe biama; aroko dunduko adu wa sa.

10Ko ki zungudi aroko bisue, gu kuti kura ha. Gu kura aroko bisue ko ki zungudi he a, gu kuti kura ha. 11Ko ki mina agire ni gbaya ha ku pavuru gu zungudizungudi aroko sa ti kina pangbaha; ko ki mangi minamina gire a wo ti kina pangba gu zungudizungudi akura aroko re a. 12Ko amina agire 50 ti gu roko sa, na 50 ti pangba ue he bazungaha yo, minamina agire ti gu sa ki du wa sa kuti gu minamina agire ni ba sa sa du ti gu kura ha. 13Ko ki mangi angorã 50 rogo dahabu, ki kpika aroko na angorã gu kuti kura ha; were banye ki du sa.

14Ko ki mangi aroko rogo mange ameme ni bamburoko ku ri banye; ko amangi aroko wa 11. 15Bagiza gu roko re ni ba sa sa adu wa bagiza mbiribe 30, patihe ki du wa bagiza mbiribe biama; agu aroko 11 adu wa sa. 16Ko ki zungudi aroko bisue wa sa, ki zungudi aroko sita wa sa a. 17Ko ki mangi minamina agire 50 ti pangba gu roko du pavuru gu zungudizungudi he sa re na minamina agire 50 a ti pangba gu roko du pavuru gu kura zungudizungudi roko re. 18Ko ki mangi angorã 50 rogo sirigi ka kpika bamburoko na ni si du wa sa. 19Ko ki mangi roko tipa dada bamburoko ni kpoto abaakandoro nga gu i azamasi he azamasa, na gu ni kpoto wa ga agbodi a Ku ri he.

20Ko ki mangi agbaraga tipa banye rogo gu ngua du wa mbegure, ki rugu he ku ari. 21Bagiza agbaraga ni ba sa sa adu wa bagiza mbiribe bawe, patihe ni ba sa sa ki ngia bagiza mbiribe sa na bebere he. 22Ũzungahe ue adu ti agbaraga dunduko ni ba sa sa, si ki zungu gu gbaraga sa kuti kura ha; wo ko amangi tipa agbaraga banye dunduko. 23Were ko ki mangi agbaraga: agbaraga 20 tipa gu pavuru banye du ku sudiyo; 24ko ki mangi anduhe 40 rogo feda tii agu agbaraga yo 20 re, anduhe ue tii gu gbaraga yo sa tipa gaha azungahe ue, na anduhe ue tii gu kura ha yo tipa gaha ũzungahe ue. 25Ko ki mangi agbaraga 20 tipa gu ue pavuru banye du ku nodiyo, 26na anduhe 40 rogo feda, anduhe ue tii gu gbaraga yo sa, na anduhe ue tii gu kura gbaraga yo sa. 27Ko ki mangi agbaraga sita tipa gu gii banye du ku dioyo. 28Ko amangi agbaraga ue tipa atukpu banye ku gii he yo. 29Si ki du ni zungudizungudi he in mburuhe yo, na ti rihe yo da ti bambata benge; wo ko amangi he re tipa atukpuhe ue. 30Agbaraga ki du muambi, na anduhe 16 ni feda; anduhe ue tii agbaraga yo dunduko ni ba sa sa.

31Ko ki mangi angbongbo rogo gu ngua du wa mbegure, bisue tipa agu agbaingii du pavuru banye ku bani, 32na angbongbo bisue tipa agu agbaraga du pavuru banye ku bani a, na angbongbo bisue tipa agu agbaraga du gii banye ku dioyo. 33Gu ngbongbo du bebere he yo ko amangi he si susi bebere rago tona ti mburuhe yo ki da ti digidaha yo. 34Ko ki dadi agbaraga ni dahabu, ki mangi abengehe rogo dahaou tipa ba angbongbo, ki dadi angbongbo ni dahabu.

35Ko ki mangi róko kparaba rogo gire ni gbaya ha, na gu du ngungungu, na gu du ni zamba ha, na tutu ndindii giri nzibi; ko amangi he na kpia akeruba ti ni, ni sunge bangbasiaha. 36Ko amangi adangbaha biama rogo gu ngua du wa mbegure, ki dadi he ni dahabu; angorãha adu ni dahabu, ko ki taki feda ka manga anduhe biama tipa ha. 37Ko ki mangi asiasi roko kparaba tipa ngbadimo bamburoko rogo gire ni gbaya ha, na gu du ngungungu, na gu du ni zamba ha, na tutu ndindii giri nzibi ni sunge kendegekendege he; 38na adangbaha bisue na angorãha. Ko ki dadi ri adangbaha na angbongboho ni dahabu; ono anduhe bisue adu ni sirigi.

Currently Selected:

Gate 36: ZB1978

Highlight

Copy