Gate 37

Pa manga Sanduki Dezirepai

(Gate 25:10-22)

1Were Besarere ki mangi sanduki rogo gu ngua du wa mbegure; bagizaha adu wa bagiza mbiribe ue na bebere he, patihe ki du wa bagiza mbiribe sa na bebere he, basonaha ki du wa bagiza mbiribe sa na beberehe. 2Ko ki dadi he ni ndikidi dahabu vuruhe yo, na ti kpotoho a, ki mangi gu he pati he kirikiri rogo dahabu du wa kina kpakpari. 3Ko ki taki abenge biama tipa ha rogo dahabu, ami adu ti anduhe biama, abenge ue adu ku pavuruhe ku bani, na abenge ue ku bani a. 4Ko ki mangi angbongbo rogo gu ngua du wa mbegure, ki dadi he ni dahabu, 5ko ki moi agu angbongbo re ku rogo abenge yo ti apavuru sanduki ka tinda ha ii ni. 6Ko ki mangi bainapai rogo ndikidi dahabu; bagizaha adu wa bagiza mbiribe ue na bebere he, patihe adu wa bagiza mbiribe sa na bebere he. 7Ko ki mangi kpia akeruba ue rogo tata dahabu. Ko amangi he auru bainapai ku bani na ku bani, 8gu keruba sa ku bani na gu kura keruba sa ku bani a; ko amangi akeruba rogo bete gu dahabu sa na bainapai ti amburuhe ue. 9Akeruba ki zaraga apupoho ku ari, ki dadi bainapai na apupoho, kpakpu gu sa ki du sa ga gu kura ha; kpakpu akeruba ki du koyo du bainapai ni.

Pa manga mbisa

(Gate 25:23-30)

10Ko Ki mangi mbisa rogo gu ngua du wa mbegure; bagizaha adu wa bagiza mbiribe ue, patihe ki du wa bagiza mbiribe sa, basonaha ki du wa bagiza mbiribe sa na bebere he; 11ko ki dadi he ni ndikidi dahabu, ki mangi dahabu wa kina kpakpari ku pavuru rihe kirikiri. 12Ko ki mangi bangbandaha kirikiri, patihe ki du wa pabe boro, ko ki mangi dahabu wa kina kpakpari pavuruhe kirikiri. 13Ko ki taki abenge biama rogo dahabu tipa ha, ki moi ra ti atukpuhe biama nga gu du ti anduhe biama. 14Abenge ki du mbembedi na bangbandaha tipa angbongboho, nga gu i atinda mbisa ti ni. 15Ko ki mangi angbongbo rogo gu ngua du wa mbegure, ki dadi he ni dahabu, i nitindi mbisa ti ni. 16Ko ki mangi agu aũsunge ka du auru mbisa ni ndikidi dahabu, nga gaha akurungbu, na gaha abaarikare, na gaha ainga, na gaha akambu, tipa uka ahe na ni.

Pa manga baduawe

(Gate 25:31-40)

17Ko Ki mangi baduawe rogo ndikidi dahabu. Ko amangi mburuhe, na katakpaha rogo tata dahabu, gaha ainga, agorõho, na gaha ambumbuda adu na ni wa sa. 18Abehe ki du sita nakuru pavuruhe yo, abe gu baduawe re ki kuru biata ku bani, gu kura abehe biata ki kuru ku bani a; 19ko amangi ainga biata wa ambumbuda anzari ti gu behe sa, gorõho sa na mbumbudaha a sa; na ainga biata ni mangimangi he wa kina ambumbuda anzari ti gu kura behe, gorõho sa, na mbumbudaha a sa ― wo ko amangi tipa agu abehe sita nakuru ti katakpa baduawe. 20Ti katakpaha ko amangi ainga biama wa kina ambumbuda anzari, agorõho na ambumbudaha a, 21gu gorõho sa tii abehe yo ue, ni mangimangi he wa sa na ni, gorõho sa tii gu abehe yo ue, ni mangimangi he wa sa na ni, tipa agu abehe sita nakuru ti ni. 22Agorõho na abehe ko amangi he rogo gu bete dahabu sa; wa si adu dunduko i ataki he rogo gu bete ndikidi dahabu sa. 23Ko ki mangi awehe saba, na gaha awaza, na gaha asaani kingiriwe rogo ndikidi dahabu. 24Ko ki mangi he na aũhe dunduko rogo taranda sa nga ga ndikidi baroãha wa akiro 59.

Pa manga Bamotumo fuõngua

(Gate 30:1-5)

25Ko ki mangi bamotumo nga ga fuõngua rogo gu ngua du wa mbegure; bagizaha adu wa bagiza mbiribe sa, patihe ki du wa bagiza mbiribe sa; bagiza pavuruhe biama adu wa sa, basonaha adu wa bagiza mbiribe ue, agbangaha ki du na ni wa sa. 26Ko ki dadi kpotoho ni ndikidi dahabu, rihe, na pavuruhe kirikiri, na agbangaha a; ko ki mangi he kirikiri rogo dahabu a wa kpakpari, 27ko ki mangi abenge ni dahabu ue tii kpakpari yo, ku bani na ku bani, ami adu tipa angbongbo ue ka atinda ha ti ni. 28Ko ki mangi angbongbo rogo gu ngua du wa mbegure, ki dadi he ni dahabu.

Pa manga nzeme mbeda na fuõngua

29Ko ki mangi kparakpara ziazia nzeme tipa mbeda ha, na ziazia fuõngua ni wene fuõ tomengua, a wa bangbasia gu sunge re naamanga ha.

Currently Selected:

Gate 37: ZB1978

Highlight

Copy