Gate 35

Arugute tipa Rago Sabiti

1Mose ki dungura rimbasa awiri aYisaraere dunduko, ki ya fu yo, “Gere nga agu apai Yekova arugu he, ya oni nimangi he. 2Tipa rame sita oni ka amanga sunge, ono ti saba rame kparakpara sabiti ka adu fu roni, nga ndikidi ongoda fu Yekova; gu ni nikamanga sunge rago ho i aímo ni aimo; 3oni agínda nga we rogo gaoni akporo dunduko rago sabiti te.”

Pa tumbatumba agamahe fu Yekova

(Gate 25:1-9)

4Mose ki ya fu rimbasa awiri aYisaraere dunduko. “Gere nga gu pai Yekova arugu he. 5Oni rógodi tumbatumba gamahe dagba gaoni ahe yo fu Yekova; gu ni kpotoni yo akpí nyemu he, ni yé na ni ni ga Yekova tumbatumba gamahe, nga dahabu, na feda, na sirigi; 6na gire ni gbaya ha, na gu du ngungungu, na gu du ni zamba ha, na ndindii giri nzibi; na mange meme, 7na kpoto abaakandoro nga gu i azamasi he azamasa, na kpoto wa ga agbodi; na ngua du wa mbegure, 8na nzeme tipa we, na tome fuõngua tipa gu nzeme mbeda, na tipa wene fuõngua, 9na agu ambia nga oniki, na wene ambia tipa maa ha ti efoda, na tipa mangu ngbaduse.

Pa aũsunge tipa Banye

(Gate 39:32-43)

10“Agu akumba yé dagba roni rengbe ni abangbasia sunge, ka manga agu ahe dunduko nga gu Yekova arugu paha: nga banye, 11gaha bamburoko, na gu nadada ha, angorãha, na agbaragaha, angbongboho, adangbaha, na anduhe; 12sanduki na angbongboho, bainapai, na roko kparaba; 13mbisa na angbongboho na gaha aũsunge dunduko, na kpokuta yugopai; 14na baduawe tipa we, na gaha aũsunge, na gaha atara, na nzeme tipa we; 15na bamotumo fuõngua, na angbongboho, na nzeme mbeda, na wene fuõngua, na asiasi roko kparaba tipa ngbadimo, ti gu ngbadimo nga ga banye; 16bamotumo nga ga zozo motumo, na gaha piomarã du ni sirigi, angbongboho, na gaha aũsunge dunduko, kurungbu zundatise na andu mburuhe, 17asiasi aroko vurukporo, adangbaha, na anduhe, na asiasi roko kparaba tipa ngbadimo vurukporo; 18aneri tipa banye, na aneri tipa vurukporo, na agirihe, 19gu wene tutu aroko mangasunge tipa gu sunge nga ga kparakpara ba, na kparakpara ziazia aroko du tipa Arona nga boromotumo, na aroko tipa awiriko ka amanga pai rogo ga aboromotumo sunge.”

Pa ye aboro na tumbatumba agamahe

20Rimbasa awiri aYisaraere ki guari dunduko bara bangiri Mose. 21I ki ye dunduko nga agu yo kpotoyo yo awo ti yo, toroyo ki sa yo i kpi nyemu manga ha, i ki ye na tumbatumba gamahe fu Yekova tipa sunge bamburoko dungurati, na gaha mangapase dunduko, na tipa kparakpara ziazia aroko. 22I ki ye, akumba na ade a nga agu yo nakpi nyemu he kpotoyo yo, na apengere na atongo õse na atongo wirinzaga, na afongo gose, na angbatunga aufongo ni dahabu dunduko. Aboro dunduko nafu wowoti gamahe ni dahabu fu Yekova. 23Agu aboro dunduko i abi gire ni gbaya ha be yo, na gu gire du ngungungu, na gu du ni zamba ha, na ndindii giri nzibi, na mange meme, na kpoto abaakandoro nga gu i azamasi he azamasa, na kpoto wa ga agbodi, i aye na ni. 24Agu yo dunduko nadu na feda be yo na sirigi na rengbe tipa tumbatumba gamahe, i aye na ni ni tumbatumba gamahe fu Yekova; agu yo dunduko i abi ngua du wa mbegure be yo rengbe na gu sunge re, i aye na ni. 25Agu ade nadu na tatamana ki udi he ni beyo, ki ye na gu i audi he, nga gire ni gbaya ha, na gu du ngungungu, na gu du ni zamba ha, na ndindii giri nzibi; 26agu ade dunduko toro tatamana awo ti yo, i audi mange meme. 27Abazogo ki ye na agu ambia nga oniki, na agu ambia du tipa maa ha ti efoda, na tipa mangu ngbaduse, 28na tome fuõngua, na nzeme tipa we, na tipa nzeme mbeda, na tipa wene fuõngua. 29Awiri aYisaraere ki ye na gamahe fu Yekova na nyemuhe, akumba na ade dunduko nga agu yo kpotoyo yo akpi nyemu ka ye na ahe dunduko tipa gu sunge Yekova arugu pa manga ha ku ngba Mose.

Pa yamba Besarere na Oriaba

(Gate 31:1-11)

30Mose ki ya fu awiri aYisaraere, “Oni ngére, Yekova yambu Besarere ti kina rimoko nga wiri Uri, Uri angia wiri Ura ni ngbatunga Yuda. 31Ko ki hisi ko ni ga Mbori Toro, na tatamana, na rugatinapai, na inahe, ko rengbe na ngbatunga asunge dunduko, 32ka sanga asunge ni tatamana, ka amanga asunge rogo dahabu, na rogo feda na rogo sirigi, 33na rogo pa seka kikiipa ambia ka maa ha ku rogo ũzadahe, na rogo pa seka ngua, ka manga ha rogo asunge ni tatamana dunduko. 34Ko ki moi he ku kpotoko yo ya ko rengbe na yugo pai, i na Oriaba, wiri Aisimaka, ni ngbatunga Dana. 35Ko ahisi yo na tatamana, ya i mangi ngbatunga asunge ni tatamana dunduko, watadu gu sunge nga ga abagbakimbia na gu nga ga bangbasia sunge, watadu ga bakendege roko ni gu gire du ni gbaya ha, na gu du ngungungu, na gu du ni zamba ha, na rogo ndindii giri nzibi, watadu gu nga ga baturoko ― nga ga agu yo namanga ngbatunga gini sunge, na agu yo nasanga asunge ni tatamana.

Currently Selected:

Gate 35: ZB1978

Highlight

Copy