Gate 25

Pa rugute tipa ye aYisaraere na tumbatumba agamahe

(Gate 35:4-9)

1Yekova ki ya fu Mose, 2“Mo gúmba ha fu awiri aYisaraere, ya i ye na tumbatumba gamahe fere; agu aboro dunduko du nyemuhe kpotoyo yo, mo aróga tumbatumba gamahe be kina yo tipa re. 3Gere nga gu tumbatumba gamahe oni ka rogoda ha be yo; nga dahabu, na feda, na sirigi, 4na gire ni gbaya ha, na gu du ngungungu, na gu du ni zamba ha, na ndindii giri nzibi, na mange meme, 5na kpoto abaakandoro, nga gu i azamasi he azamasa, na kpoto du wa ga agbodi, na ngua du wa mbegure, 6nzeme tipa we, tome fuõngua tipa gu nzeme i nambeda ha, na tipa wene fuõngua, 7na agu kikiipa ambia nga oniki, na wene ambia tipa efoda, na tipa mangu ngbaduse. 8I mángi kparakpara ba tipa re, ya mi nye dagba yo kindi. 9Mo amánga banye, na agu ahe nikadu vuru he yo kina kuti kpia gu mi akayúgo ho foro.

Pa Sanduki Dezirepai

(Gate 37:1-9)

10“I ka manga sanduki rogo gu ngua du wa mbegure; bagizaha ki du wa bagiza mbiribe ue na bebere he, patihe ki du wa bagiza mbiribe sa na bebere he, na basonaha ki du wa bagiza mbiribe sa na bebere he a. 11Mo ki dadi he ni ndikidi dahabu, vuruhe yo na ti kpotoho a, mo ka dada ha, mo ki mangi he kirikiri rogo dahabu wa kpakpari. 12Mo ki taki abenge rogo dahabu biama tipa ha, ki moi ra ti anduhe biama, abenge ue ki du ku pavuruhe ku bani na gu kura abenge ue ki du ku bani. 13Mo ki mangi angbongbo rogo gu ngua du wa mbegure, ki dadi he ni dahabu. 14Mo ki moi angbongbo ku rogo agu abenge nikadu ti pavuru sanduki tipa tinda sanduki ti ni. 15Agu angbongbo re ki du rogo agu abenge du ti sanduki; i aróga nga ha ku sa yo te. 16Mo ki moi gu dezirepai mi ka fu foro ku vuru sanduki yo. 17Mo ki mangi bainapai rogo ndikidi dahabu; bagizaha ki du wa bagiza mbiribe ue na bebere he, pati he ki du wa bagiza mbiribe sa na bebere he. 18Mo ki mangi kpia akeruba ue rogo dahabu; mo amánga ha rogo tata dahabu, auru bainapai ku bani na ku bani. 19Mo mángi gu keruba sa ti gu mburuhe ku bani, na gu kura keruba a sa ti gu kura mburuhe; mo amánga akeruba ti amburuhe ue rogo kina gu bete dahabu wa sa na bainapai. 20Akeruba ki zaraga apupoho ku ari ki dadi bainapai na apupoho, kpakpu gu sa ki du sa gu kura ha; kpakpu akeruba ki du koyo du bainapai ni. 21Mo ki moi bainapai ku ri sanduki; mo ki moi gu dezirepai mi ka fu foro ku vuru sanduki yo. 22Yo mi ka angbisa ro ni ki nifura na mo ba ri bainapai, dagba agu akeruba du ue ba ri sanduki dezirepai, tipa agu apai dunduko mi afú foro ni rugute fu awiri aYisaraere.

Pa mbisa tipa Kpokuta Yugopai

(Gate 37:10-16)

23“Mo ki mangi mbisa rogo gu ngua du wa mbegure; bagizaha adú wa bagiza mbiribe ue, patihe ki du wa bagiza mbiribe sa, basonaha ki du wa bagiza mbiribe sa na bebere he. 24Mo ki dadi he ni ndikidi dahabu, ki mangi dahabu wa kina kpakpari pavuru rihe kirikiri. 25Mo ki mangi bangbandaha kirikiri, patihe ki du wa pabe boro, ki mangi dahabu tipa ha kirikiri wa kina kpakpari. 26Mo ki mangi abenge rogo dahabu tipa ha, ki moi ra ti atukpuhe biama nga gu du ti anduhe biama. 27Abenge adú mbembedi na bangbandaha tipa angbongbo nga gu i ka atinda mbisa ti ni. 28Mo ki mangi angbongbo rogo gu ngua du wa mbegure, ki dadi he ni dahabu, ya i nitindi mbisa ti ni. 29Mo ki mangi gaha akurungbu, na abaarikare, na gaha akambu, na gaha ainga tipa uka he na ni; mo amánga ha rogo ndikidi dahabu. 30Mo ki nimoi kpokuta yugopai ri mbisa ku bara bangire na uru dedede.

Pa baduawe ni dahabu

(Gate 37:17-24)

31“Mo ki mangi baduawe rogo ndikidi dahabu. I mángi mburu baduawe na katakpaha rogo tata dahabu; gaha ainga, agorõho, na gaha mbumbuda, i ka manga ha rogo kina gu bete dahabu sa; 32abehe ki du sita kuru pavuruhe yo, abe gu baduawe re ki kuru biata ku bani, gu kura abehe biata ki kuru ku bani a; 33i amánga ainga biata wa ambumbuda anzari ti gu behe sa, gorõho sa na mbumbudaha a sa, na ainga biata ni mangimangi he wa kina ambumbuda anzari ti gu kura behe, gorõho sa na mbumbudaha a sa ― kina wo i ka manga tipa agu abehe sita ka kuru ti katakpa baduawe. 34Ti katakpaha i mángi ainga biama wa kina ambumbuda anzari, agorõho na ambumbudaha a, 35gu gorõho sa tii abehe ue, ni mangimangi he sa na ni; kina wo i ka manga tipa agu abehe sita ka kuru ti katakpa baduawe. 36Agorõho na abehe i mángi he rogo kina gu bete dahabu sa, wa du he dunduko i táki he rogo gu bete ndikidi dahabu sa. 37Mo ki mangi awehe saba; i ki tigi awehe, si nihasi rago ku barangba ha. 38Gaha awaza na gaha asaani kingiriwe i amánga ha rogo ndikidi dahabu. 39Oni amánga ha rogo gu taranda sa nga ga ndikidi dahabu du baroãha wa akiro 59, na aũhe dunduko. 40Mo ki bi he ya mo mángi he kuti gu kpiaha i ayugo ho foro ri bagangara yo.

Currently Selected:

Gate 25: ZB1978

Highlight

Copy