Gate 24

Nyakasa pa zungahe

1Yekova ki ya fu Mose, “Oni yé kono du mi ni, oni na Arona na Nadaba, na Abiu, na ga aYisaraere abaakumba 70, ka irisare, ono ka oni mbédi nga kono ya. 2Kina Mose ni sa ko nikambeda na Yekova; ono ka akura yo yé nga ki mbedi ya, ka boro dákpa nga na ko a ya.”

3Mose ki ye ki gumba sangba Yekova dunduko fu aboro, na pa asarangbanga dunduko; aboro ki mongo karaga pai wa sa, ki ya, “Agu apai dunduko gumba Yekova ha ani amánga ha amanga.” 4Mose ki ke sangba Yekova dunduko. Ko ki guari kina ngbatutu wiso, ki dua bamotumo ti mburu bagangara, na duadua ambia 12 ki ringbisi he kina kuti angbatunga aYisaraere 12. 5Ko ki kedi paranga akumba dagba awiri aYisaraere yo, i ki tumo ni zozo amotumo, na agu amotumo nga ga zereda ni abaabagara fu Yekova. 6Mose ki di bebere kurera ki moi he ku rogo akurungbu, gu kura bebere kurera ko ki uka ha kuti bamotumo. 7Ko ki di kitabu mokido, ki gedi he ku tu aboro yo; i ki ya, “Agu apai dunduko gumba Yekova ha ani amánga ha amanga, ani agía sangbako agia.” 8Mose ki di bete kurera ki migidi he ku ri aboro, ki ya, “Oni ngére, gu kure nga ga zungahe nga gu Yekova azunga fu roni rogo agi apai re dunduko.”

9AMose ki ndu na Arona, na Nadaba, na Abiu, na ga aYisaraere abaakumba 70, 10i ki bi ga aYisaraere Mbori; he ki du tii nduko yo wa kina vurukporo nga gu i asikisa gu wene ambia auru he nga safero, si adu giangiri wa kina ngbangbaturũ. 11Ko amaa nga beko kuti ga awiri aYisaraere agbia te; i ki bi Mbori, ki ri riahe ki mbiri he.

Pa Mose ri Bagangara Sinai yo

12Yekova ki ya fu Mose, “Mo yé kono du mi ni ku ri bagangara no, ki sungu no; mi ki fu kpasakpasa ambia foro, na agu andika na arugute nga gu mi ake paha mbata, ya mo yuau paha fu yo.” 13AMose ki guari na Yosua nangia gako mounda, Mose ki ndu ku ri ga Mbori bagangara yo. 14Ko ki ya fu abaakumba, “Oni súngudi rani erẽ ki da ho ani ka yega ni berewe kono du oni ni; oni ngére, aArona na Uru nanye na oni; gu ni du na ngbanga ni ki ndu koyo du yo ni.”

15Mose ki ndu ku ri bagangara yo, dubo ki dadi bagangara. 16Ga Yekova taarimo ki sungu ri Bagangara Sinai, dubo ki dadi he rame ki du sita; ti saba rame ko ki yambu Mose bebere dubo yo. 17Ga Yekova taarimo ki du bangiri awiri aYisaraere wa we narita he rururu ri bagangara yo. 18Mose ki rimi ku bebere dubo yo, ki dakpa ku ri bagangara yo. Mose ki raki ku ri bagangara yo tipa uru 40 na yuru 40 a.

Currently Selected:

Gate 24: ZB1978

Highlight

Copy